DI DIESSEIS DJADUMINGU SIKLO B

Promé Lektura : Yeremias 23, 1-6
Salmo : Salmo 23, 1-6
Di dos Lektura : Efesionan 2, 13-18
Evangelio : Marko 6, 30-34

Den e pasashi aki nos ta haña tres personahe: e apòstelnan ku a yega di nan mishon; e hendenan ku hamber di un palabra di Speransa, ku tabata sigui Hesus unda ku ela bai; i Hesus, ku mustrando e sensibilidat ku ta karakterisá su persona ta sinti duele di e hendenan ku tabata kana sin rumbo i sin wardadó. E amor di Kristu pa su pueblo i e speransa ku nan tabata haña den persona di Hesus parse ta e aksènt sentral di e Evangelio aki.
Kiko nan tabata mira den Hesus? Kiko su palabranan tabatin? Kiko tabata e loke tabata atraé asina tantu hende na Hesus? Ta kere ku e hendenan tabata haña palabranan respaldá pa un testimonio, nan tabata haña imágen di un Dios serkano i kompasivo, nan tabata haña bida i pas den su enseñansa i e forma den kua E tabata biba. Hesus tabata pa nan un wardadó i no un hende ku tabata risibí salario. E tabata dispuesto pa duna bida pa su karnénan; E no tabata papia ku nan manera hende ku no konosé nan, sino ku tabata profundamente komprometí ku nan bida. Ta p'esei nan tabata haña den Hesus un speransa di bida, un sentido pa nan sufrimentu i un serkania di Dios den persona di Hesus.
Awendia nos mester di bon wardadó. Guiadónan komprometí ku nan fe i ku e Pueblo di Dios, lidernan ku no ta guia nos den kaminda di mentira i superfisialidat, sino ku sa di mustra nos e kaminda berdadero , e kaminda di Kristu. No ta trata di inventá kaminda nobo, sino tin ku bira kara pa Hesukristu i E lo guia nos na e bèrdat i felisidat.
Awendia tin hopi lider falsu den nos sosiedat: lidernan musikal ku ke purba guia nos na apsolutisashon di plaser i sentido; lidernan di pelíkula ku ta purba kombensé nos ku ta nan forma di biba ta esun mas adekuá pa nos felisidat; lidernan komersial ku kubriendo nan mes ku bandera di merkado liber, ta ofresé produktonan ku ni nan mes lo tabata kapas di usa òf kumpra. En- fin, tin un kantidat di protagonista ku na final di kaminda tin buraku paden, bashí i sin sentido trasendente di e ser humano i di bida. Pero asina mes, nos ta mira míles di nos “kore bai e otro banda di riu ” pa sigui nan i buska felisidat na nan banda.
Laga nos habri nos wowo, felisidat ta den Kristu i su mensahe. E ta plenitut di hende i su kaminda e forma di yega na tal plenitut. Den ningun hende nos ta haña kompashon, serkania, kompromiso, solidaridat, pas, amor den bida ku E ta ofresé na nos. Pakiko kana buska loke ta dilanti nos nanishi? Nos tin’e den su Palabra, nos tin’e den su Kurpa i su Sanger, nos tin’e den kada ruman ku tin nesesidat di ta stimá i den esnan ku tambe a disidí di stima. Laga nos skucha nos wardadó i sigui su palabra ya ku E ta e úniko ku a demostrá nos ku su mes bida ku su palabra TA palabra di Bida Eterno.
E siman aki, kohe un Beibel i trata na “skucha” Dios den su Palabra. Puntr’é , busk’é den bo orashon i si bo por aserka bo mes pa risibié den komunion. ; E i únikamente E ta esun ku lo guiabo riba kaminda berdadero di pas i amor.