DI DOS DJADUMINGU DI PASKU DI RESUREKSHON FIESTA DI DIOS MIZERIKÒRDIA

Promé Lektura : Echonan 4, 32-35
Salmo : Salmo 118: 2-4, 16a-18, 22-24
Di dos Lektura : 1 Huan 5, 1-6
Evangelio : Huan 20, 19-31


Nos tin mas ku sufisiente motibu pa felisitá nos mes: ...Hesus, E mes ku a muri riba krus a resusitá. Hopi ta e situashonnan ku ta demostrá nos esaki i ta shen i shen mion di persona, kende a lo largu di siglonan a garantisá nos esaki ku un bida plenamente konsagrá na djE.
Den istoria di religionnan tin fundadónan na kende ta atribuí milager, kuramentu maravioso, kombershonnan profundo di bida. En kambio, na ningun di nan ta atribuí resurekshon.
Kiko ta den realidat loke nos komo kristian ta kere ora nos ta papia di resurekshon? Kiko ta loke nos ta kere ora nos afirmá resurekshon di Hesus?
Resurekshon no ta reanimashon di un restu, no ta laga e kurason ku a para bolbe kuminsá bati; no ta duna buèlta na e bida di debilidat i morto pa alarga esaki ku algun aña mas. Nò !!!. Resusitá no ta esaki pa nos komo kristian. Resurekshon ta transformashon total di e persona kompletu , su realisashon pleno, su entrada den Bida, den Bida di Dios. Bisa ku Hesus a resusitá ke men ku El a triunfá, ku ela ser konstituí pa Dios den Señor, den Hende Nobo. I asina pues, afirmá ku e Reino ku E tabata prediká ta realmente posibel. O sea: Tin speransa pa esnan pober, esnan marginá, esnan krusifiká di tera tal manera E a anunsiá na nan!
Banda di e afirmashon aki di resurekshon di Hesus evangelio ta konfundí nos. Na lugá di sinti alegria di goso e apòstelnan tabata abatí, bruá. Loke tabata mantené nan uní tabata miedu i no e alegria di resurekshon. No ta nada straño ku e promé saludo di Hesus pa nan ta esun di "Pas sea ku boso". Hesus no ta reklamá nan kobardia i nan falta di konfiansa den djE. E enkuentro ku esun resusitá tabata pa e promé kreyentenan un eksperensia ku a reanimá nan fe i nan bida.
Por ta ku hopi kristian di awendia ta siguidónan ku konvikshon di Señor: nan ta kumpli ku norma ku efisiensia, nan ta resaltá den aktonan litúrgiko... tur esaki ta maravioso semper i kuando e ta kontribuí na krea testigunan outéntiko di e resurekshon.
Tomas tambe tabata apòstel, ela hasi e mesun proseso ku e otronan, pero e no tabata huntu ora Señor a bishita nan pa promé biaha. El a bai den komunidat di disipelnan na kua Esun resusitá ta aparesé p'asina nan por hasi un profundo eksperensia di fe. Tomas den su mes tabata karga duda i temor. Mesun kos ta pasa ku kristiannan ku ta alérgiko na bida di komunidat. No ta nifiká ku nos tin ku pèrdè nos identidat individual i laga pa e biba den komunidat. Dios ta yama nos kada un, individualmente, pero ta yama nos pa hasi e eksperensia di fe den e komunidat di Iglesia. Komunidat di Iglesia tin e privilegio pa komuniká e mensahe di pordon di Dios pa humanidat i kontinuá ku trabou di Señor. Pa biba i eksperimentá esun resusitá e promé eksperensia el a duna den fraternidat.
Ku aparishonnan di esun resusitá nos fe ta haña kuminsamentu. Nos ta kere pasobra Señor a resusitá. Pa bida por aparesé mester pone morto un banda. No tin prueba mas grandi ku di superá e bashí di morto, di einan ku algu asina grandioso ta difísil pa kapta i pa akseptá sin fe.
Ora nos ta duda di fe ta pasobra nos no a pasa den e eksperensia di e resurekshon. Nos ta pidi pa "mira" pa por kere
ora loke nos mester ta eksperimentá pa mira. POR mira esun resusitá ta un don di Dios, ku E ta konsedé na esun ku ke.
E konfeshon de fe di Tomas ta konfeshon outéntiko di fe di e kreyente. Nos no a mira i nos ta kere, ta p'esei Hesus ta yama nos bienaventurá.
E bienaventuransa di nos ku no a mira ta basá riba konfiansa den e Palabra promé ku den prueba. No ta mira e Palabra i en kambio e tin poder pa transformá nos pa eksperimentá kombershon i resurekshon. TA kristian ta akseptá e Palabra ku pleno konfiansa.
E aparishonnan no tabata suphetivo, ni imaginativo, sino real. No ta un kreashon di fantasia humano, sino kurpa real di Señor.
Ora ku hende alehá ta puntra unda Dios ta, masha bon nos por bisa ku e ta laga mira su mes den tur parti di bida. Pa mir’E mester di wowo di fe i konfiansa den amor.