DI DIESUN DJADUMINGU SIKLO A

Promé Lektura : Eksodo 19, 2-6
Salmo : Salmo 100, 1-3. 5
Di dos Lektura : Romanonan 5, 6-11
Evangelio : Mateo 9, 36 -10, 8



Loke ta yama nos atenshon ta e motivashon di Hesus pa manda pa su disipelnan pa hiba e Bon Notisia di e Reino: “Ora Hesus a mira e multitut, el a haña duele di nan pasobra nan tabata flaku i desampará manera karné sin wardadó. Manera nos por mira, ta amor pa e pueblo ta loke ta motivá Hesus pa manda su disipelnan i únikamente esun ku lo a konosé mas. Kier men, e disipelnan no a sali den kampaña pa kombèrtí, pa anunsiá ku Hesus tabata e Mesías i ku E tabata entre nan; sino mas bien nan ta Sali pa hiba e Bon Notisia ku lokual nan tabata ke pa Sali na kla ku Dios no a bandoná nan, ku su amor tabata ku nan i ku ya e e Reino di Dios tabata serka.i ku lo a duna sentido na tur nan sufrimentu. E disipelnan no tabata buska pa oumentá e kantidat di hende ku tabata den nan serkania sino pa duna testimonio di ku Dios tabata kompadesé den nan sufrimentu i ku E tabata buska moda pa aliviá esaki..
Asina nos por mira den e akshon aki di Hesus un kontinuidat íntimo ku e akshon di Dios di den tèstamènt Bieu. Si Dios den Tèstamènt Bieu a mustra su mes manera un Dios providente i protektor, ku tabata kompadesé sufrimentu di su pueblo i ku e tabata manda mensahero pa hiba mensahe di konsuelo i speransa; pues di e mesun manera Hesus, ora El a mira su pueblo desampará i sin wardadó ta manda su disipelnan bai hiba e Bon Notisia di presensia di Dios entre nan. Ta e amor di Dios pa su Pueblo ta loke ta move Kristu pa realisá e akshon aki.
Ya ku no ta un ideologia e loke nos tin ku transmití sino un testimonio di e amor di Dios, nos tin ku siña e método ku Hesus ta siña su disipelnan: e Promé ta orashon, pues kon nos ke duna testimonio di amor di Dios si nos no a eksperensiá paden di nos e mirada amoroso i tierno ku ta sana tur kos? Di dos ta e mandamentu; e mandamentu aki no kier men ku e ta manda algun hende i otronan no, sino ku ta nifiká ku nos no ta bai hibando un mensahe propio sino e mensahe di esun ku a manda nos. Keda sin aktua manera esnan mandá lo ta manera palomba mensahero ku ta sali bula sin e mensahe ku e lo mester a bai hiba.
Di tres ta e akshon transformadó; lo a parse ku nos lo por a libra nos mes di e mensahe aki pasobra nos ta pensa ku nos no por hasi milagernan ku tin deskribí aki .Pero den realidat e milagernan aki tin un mensahe profundo den kua nos tur por partisipá: kura e leproso lo a nifiká aseptá esnan ekskluí ( pasobra leprosonan no por a drenta den siudatnan); resusitá morto (ta duna bida na tur esnan ku ta kana manera “zumbi”, den soño di plaser, di egoismo, envidia, etc.
un sentido di bida mas profundo i real); ekspulsá demoño lo por kompará ku intento di transformá tur struktura ku ta rondoná nos ku no ta permití nos biba manera ruman i biba plenamente humano.

Laga pa e siman aki nos lo por hasi esfuerso pa implementá e método aki ku Hesus ta proponé na nos: hasi orashon, habri wowo pa mira nesesidat di esnan ku ta rondoná nos i disidí na hasi algu ku por transformá e mundu ku ta rondoná nos. Nos no ta papiando di kosnan grandi, simplemente duna pordon ku no a duna, papia ku hende ku kua tabatin un kombersashon pendiente., bishitá un hende malu, duna nos mes kuenta di esun ku nunka a tuma noshon di dje.