DI DOS DJADUMINGU ATVÈNT SIKLO B

Promé Lektura : Isaías 40, 1-5. 9-11
Salmo : Salmo 85, 9a-14
Di dos Lektura : 2Pedro 3, 8-14
Evangelio : Marko 1, 1-8


E evangelio di San Marko ta kuminsá ku un bon notisia ku no ta propio di dje; ta e bon notisia di "Hesukristu, e Yu di Dios". Esaki ta laga nos pensa den nos método i formanan di evangelisá den nos manera propio; hende ku hopi biaha mas ku prediká e bon notisia di Hesus loke nos ta hasi ta konsiente o inkonsientemente nos ta prediká di nos mes.
Ta resultá ku nos ta hasi di e mensahe evangéliko un sorto di kos filtrá i nos ta seft’é for di e manera ku nos ta i ta komprond’é, for di nos skemanan mental i for di e smalitu ku nos kurason ta. Na mas ku un okashon nos a yega di puntra nos mes si e sefta personal ei ku nos ta usa for di nos skemanan sikológiko, emoshonal, spiritual... ta alkansá di transmití loke realmente Hesus ke pa nos transmití na otro... Pero nos tin un siguridat: nos palabra torpe semper lo haña iluminashon pa medio di Lus di Spiritu Santu den kurasonnan ku di bèrdat ke skucha...
Transmití e palabra interior aki di Hesus, notisia ku ta traspasá duresa di kurasonnan, únikamente por ser hasí saliendo di un aktitut profétiko i for di un kombershon sinsero.
Ser profeta no ta fásil, nunka tabat’asina. E profeta tambe ta hañ'é traspasá pa medio di e Palabra, pero e ta konsiente di esaki. E sa ku e palabra di Dios mester di tempu pa ser skuchá. Profetanan berdadero no ta desesperá ni bira amargá, i ta p’esei nan mensahe ta yen di bida i speransa mas ku di doló i tristesa. Abo i ami ta profeta? Por ta ku sí, kisas na algun momentu... Hopi bia nos ta pensa ku ser profeta ta di semper ta entre duda i speransa, entre skuridat i lus. E profeta no ta heridá ku su pregunta sin kontesta sino ku e ta sana di hopi doló esnan ku ta rondon’é ku su humildat i su siguridat.
Huan Boutista ta aparesé riba e kaminda aki di bida ku semper ta duru. E ta bisa ku e tabata den desierto. Desierto, pa hopi di nos ku ta kreyente, no ta un lugá di morto sino di bida. Algun predikadó ta enfatisá e falta di importansha di lugá bandoná, lubidando ku tur loke tin den desierto ta buska bida. Serunan di santu, animá pa bientu semper ta buska mihó akomodashon. E palunan, animalnan, matanan ta kustumbrá di biba den ambiente mas ku inkómodo, pero nan ta kapas di sobrebibí ku poko, ku kasi nada, ku mas deseo ku realidat..
Den Tèstamènt Nobo ora ta hasi uso di e palabra desierto komo athetivo den refiriendo na hende esaki ke men "bandoná", desolá, privá di amigu i famia... No ta esun ku ta hañ'é den soledat, ta esun ku ta hañ'é alehá di bida, di amigu, di loke ta dunabo bida... No ta straño antó ku Huan lo batisá den desierto, na un lugá ku ta konosí ku tin ménos awa. Awa ta símbolo di bida i e bon notisia ta nesesario pa bida floresé inklusive na lugá i situashonnan mas kontrali . Nos ta pensa riba nos momentunan di difikultat i problema... nos ta kòrda riba e desierto di Huan Boutista..
Huan tabata bisa e hendenan ku "nan mester a kombèrtí nan mes na Dios". Kombèrtí ta nifiká kambia nos manera di pensa, kambia di aktitut i kombèrtí bo mes na Dios. Den fondo bida di tur ser humano ta transkurí den sekura di desierto, di bida ku ta lucha i e awa generativo di Dios.
E Palabra ta deskribí nos un Huan dòrna ku masha poko kos material. Simplemente e ta bisa nos di su bistí i di su kuminda pober. Miéntras ku kuentanan bíbliko ta deskribí pa nos e poder material di hopi hende, nos Huan ta menshoná esun ku apénas tin loke ta nesesario pa por sobrebibí. Bon lès pa nos ku ta krea tantu i tantu nesesidat... Nos ta kere ku pa Huan loke di bèrdat ta import’é ta permanesé den Dios sin tin e kosnan ku bida ta ofresé nos.
Ta bon i legítimo aspirá di ta mas. Kristiandat ta krea balansa den resignashon i e lucha pa superashon diario. Stanka ta nifiká muri, pero superá bo mes pa krea envidia i odio ta pió. E Boutista ta humiá su mes den su poder miéntras ku otro hende loke nan ta hasi ta humiá otro ku nan poder.
Evangelio ta finalisá bisando nos pa medio di palabra di Huan ku awa lo transformá den Spiritu Santu. Loke ta material lo uni na e realidat di Dios. Bon anunsio pa Pasku di Nasementu kaminda karni ta uni ku Dios pa forma un solo realidat. Dios a tuma nos karni pa e desierto di nos bida yena ku bida kada dia, na kada instante. Loke no sa ta ku si nos kurason lo ta asina habrí pa eksperimentá no e ekonan bashí di desierto, sino e presensia amoroso di Dios ku a bira hende pa salba nos... Loke atvènt ta laga pa nos ta e espera ku konfiansa ku nos kurason lo ta kombèrtí si òf nò, a lo ménos ku espektativa pa Hesus nase den dje.