DI SINKU DJADUMINGU DI KUARESMA SIKLO B

Promé Lektura : Yeremias 31-34
Salmo : 51, 3-4, 12-13, 14-15
Di dos Lektura : Hebreonan 5, 7-9
Evangelio : Huan 12, 20-33


Ya nos ta riba e di sinku djadumingu di Kuaresma i preparando nos pa biba Semana Santa ku intensidat. Den lekturanan di awe nos ta skucha un referensia kla di parti di Hesus tratando loke lo sosodé den e próksimo dianan, su entrega total na proyekto di Tata, e Pashon, Morto i Resurekshon di Hesus.

Nos por repartí e teksto den tres sekshon: un introdukshon, kaminda algun griego (prosélitonan) tabata buska diálogo ku Hesus; despues, kontenido sentral di e mensahe, kaminda Hesus ta anunsiá su entrega definitivo; i un konklushon ku parse ta e kontesta di Dios tata riba desishon di Hesus pa kontinuá su kaminda te na morto. Laga nos analisá kontenido sentral di e Evangelio.

Hesus ta mustra nos den e palabranan aki su konsientisashon di loke ta sper’é den e próksimo dianan. Ela mira kon su mensahe no a keda bon risibí pa dirigentenan di e pueblo hudiu i E sa kiko lo sosodé kuné si e kontinuá ku anunsio di e Reino di Dios. Ta p'esei, e palabranan tokante e grano di trigo ta reflehá un referensha kla na su bida. Hesus ta kompletamente kombensí di ku e mensahe ku Ela prediká no ta di djE, sino di su Tata; E ta kumpliendo ku e yamada ku Dios a hasi na djE pa bai i establesé su Reino entre hende. Ta p'esei, Hesus tin miedu, pasobra E sa ku E no ta dispuesto na traisioná e mishon ku Dios a konfia na djE i di otro banda e ta duna su mes kuenta ku kumplimentu di e mishon aki lo por okashoná su morto.

Ki revelashon mas inkreibel nos tin den e Evangelio aki! Hesus, ta LAGA NOS MIRA su parti humano den forma kla. Hesus tin miedu. Ta di kiko Hesus tin miedu? Miedu di sufrimentu, miedu di morto, miedu na sa ku lo ser rechasá pa tur esnan ku a bisa di ta su siguidónan, miedu talbes ku hinter su bida lo tabata inútil si hende no aseptá su mensahe. Ta masha iluminante ku Hesus no ta ninga e eksperensia aki, pues e ta permití nos pues sinti nos mes serka di Hesus, e ta permití nos kontemplá su humanidat ku klaridat. Sinembargo, Hesus no ta laga e miedu aki inmobilis’é , E ta disidí ku konvikshon i madures pa akseptá konsekuensianan di su mishon, pues e ta kombensí ku pa biba ku plenitut e mester buska pa kontestá riba e yamada ku su tata a hasi na djE.

Por último, lo a bin kontesta di Dios Tata: “Mi a glorifik’é i lo mi bolbe glorifik’é ”. E palabranan aki ta íntimamente relashoná ku Resurekshon, pasobra ta glorifikashon di e YU realisá pa e Tata ta sirbi komo kontesta na su entrega total.

Mira e forma ku Hesus a enfrentá su vokashon i a disidí pa kumpli kuné apesar di e menasa ku esaki tabata enserá, ta fortalesé i iluminá nos den nos propio kontesta na Dios Tata.

Nos tur ta yamá pa Dios; yamá pa biba amor riba egoismo, biba pordon riba odio, hustisia riba inhustisia, bèrdat riba mentira, solidaridat riba insensibilidad, felisidat riba plaser pasahero, PAS RIBA GUERA. Ademas, kada un di nos ta yamá tambe pa biba tur esaki den situashon spesífiko, manera matrimonio, komo yu, komo mayor, komo saserdote, manera esnan konsagrá, komo misionero, ets. Sinembargo, hopi biaha nos ta sinti MIEDU ora nos pensa di konsekuensia ku korespondé na Señor; na lugá di enfrentá miedu, nos ta desviá , dunando mitar kontesta , òf ora ta kumbiní nos, òf nos ta negoshá ku Dios riba loke ku nos ke hasi si òf nò.

Laga nos siña di Hesus pa sa di asumí nos responsabilidat… kompletu.! Laga nos sa kon laga nos plaser i egoismo un banda pa asumí den nos bida, e bida ku Dios a duna nos. Laga nos rekordá ku si e grano di trigo no muri, e lo no por duna fruta.

E siman aki, hasi esfuerso pa kumpli ku e intenshon di Kuaresma ku no por a kumpli kuné; òf pensa riba un hende ku tabata ke pordoná, stima òf sirbi den kualke forma i hasié e siman aki. Laga nos riska muri pa nos piká pa por resusitá ku plenitut ku nos Señor riba Pasku di Resurekshon.