DI BINTISHETE DJADUMINGU SIKLO A

Promé Lektura : Isaias 5, 1-7
Salmo : Salmo 80, 12-16. 19-20
Di dos Lektura : Filipi 4, 6-9
Evangelio : Mateo 21, 33-43

E promé lektura ta yuda nos hopi pa komprondé mihó e personahenan di e pasashi aki ku Hesus ta kompartí ku nos. Doño di e kunuku ta Dios, e kunuku di wendreif ta su pueblo, e kultivadonan ta e dirigentenan religioso di su pueblo, esnan ku e doño ta manda pa pidi su parti di e frutanan ta e profetanan i e yu di e doño ta Hesus. E otro kultivadonanan ku ken e ta hür e kunuku aparentemente ta e pueblo renobá ku lo a nase for di resurekshon di Kristu i esun mandá pa Spiritu Santu. E deskripshon aki por yuda nos komprondé mihó e dos mensahenan ku e pasashi aki ta kontené: e rechaso di Hesus i di su Reino di parti di e ansianonan i saserdotenan; i e designashon di un era nobo pa e Pueblo di Dios kaminda Kristu lo tabata e piedra prinsipal.

Ta parse ku e krítika prinsipal ta bai dirigí na dirigente di e komunidat ku a hasi di fe di e pueblo un instrumento pa sirbi nan interes i pa tin poder; ademas nan a lubidá ku e frutanan di e fe aki tabata di Señor. Ki aktualidat e tentashon aki tin pa tur esnan ku tin den nan man almanan ku no ta pertenesé na nan! I nos no ta papiando únikamente di saserdotenan, sino tambe di tur tata di famia ku tin den nan man almanan di Dios, ku nan tin ku guia pa yega serka nan Tata berdadero, i ku tin bia pa motibu di nan ignoransia òf pasobra nan kurason ta será di manera ku nan no ke rekonosé ku nan yunan a ser poné den nan man pa ser guia na Dios i no únikamente pa satisfasé nan nesesidatnan di afekto.
Awor, e di dos tema tokante formashon di e Pueblo di Dios, kaminda Kristu lo ta e piedra prinsipal, tin un gran relevansia den bida di tur kristian. Nos tur ta forma parti di e “kunuku di wendreif dibino”, di e Pueblo aki di Señor, i komo parti di djE nos ta yamá pa duna fruta. Kon nos por duna fruta si nos no ta keda uní na e ranka di wendrùif ku ta Kristu? I si nos ta sinti nos mes uní na Kristu, ki klase di fruta nos ta dunando?
No laga nos pèrdè memoria, Dios a bendishoná nos ku tur klase di don, material i spiritual, awor ta toka nos pa duna Dios bek su parti. Laga nos entrega na Dios loke E ta pidi nos ku alegria, ku gratitut: sea ta nos tempu, nos pordon, nos esfuerso pa mehorá kualke situashon, nos ilushon i nos abilidat, tur kos, apsolutamente tur loke nos ta poseé i nos ta , nos ta konsagrá nan na Señor, komo sirbidónan ku ta rekonosé di ken tur loke nos tin a yega na nos.
E siman aki, laga nos entregá parti di nos tempu, pa yuda esun ku tin nesesidat di dje. Dios ke “su parti”, laga nos ta atento pa entreg’é ora e tin mester di dje