DI TRES DJADUMINGU SIKLO B

Promé Lektura : Yonas 3, 1-5. 10
Salmo : Salmo 25, 4-5a. 6-7. 8-9
Di dos Lektura : 1 Korinto 7, 29-31
Evangelio : Marko 1, 14-20


Nos por parti e evangelio di awe den dos parti prinsipal: e promé anunsio di Hesus i e skohementu di un komunidat chikí di parti di Hesus pa realisá tal anunsio.
Marko ta kuminsá e bida públiko di Hesus splikando e promé anunsio ku Hesus a hasi na Galilea. Talbes esakinan no tabata e palabranan eksakto di Kristu, pero si nos por bisa ku su kontenido den esaki tabata esensial : kuminsamentu di tempu di salbashon, kombershon i eksigensia pa tin fe den e Bon Notisia. Loke ta hala atenshon ta ku Hesus no ta kuminsá papiando di su mes, kier men, E no a bisa: “alegrá boso pasobra ya Ami ku ta e Mesias a yega”, ni E no a pretendé gloria mas grandi ku esun ku su Tata a dun’é. Hesus tabata konsiente ku lo mas importante tabata inisio di e reinado definitivo di su Tata i ta p’esei E tabata pidi kombershon pa por bib’é.
Pero ta di kiko tal Reino tabata konsistí? Hesus ku su obra i palabranan lo a trata na aklará kua tabata prinsipio básiko di e Reino. Promé ku tur kos Reino tabata nifiká serkania di Dios ku su Pueblo, presensia salbadó di Dios. Pero no un salbashon nashonalista, ku lo libra nan únikamente di romanonan; sino un salbashon integral ku tabata inkluí hinter humanidat i den kua tabata proklamá hustisia, solidaridat, igualdat, pordon i relashon ku Dios komo nos Tata komo kaminda di pleno realisashon.
Ta p’esei Kristu tabata pidi kombershon, pasobra e kaminda ku E tabata proponiendo tabata nifiká kiebro ku hopi práktikanan sosial i religioso ku no tabata reflehá prinsipionan di e Reino; ademas, ta p’esei Kristu tabata pidi fe den su Palabra, pues esaki tabata e Bon Notisia den kua nan tabatin ku kere pa por biba balornan di Reino. Otro kondishon di e reino lo tabata siguimentu di Hesus ke men kondishon di dje pa e disipelnan.
Kombershon ta un palabra masha frekuente den nos fe, pero kiko ta kombertí?
Kombertí ta kambia di mentalidat. Fe i kombershon ta dos kara di e mesun moneda. No por eksistí kombershon sin fe ni fe sin kombershon outéntiko.
Marko ta konta tokante e yamada di e promé kuater disipelnan. Esaki ta laga bon kla ku lo no por a biba e Reino di manera aisla; e Reino di Dios den forma nesesario tabata hasi referensia na e Pueblo di Dios.

Kuantu bia nos no a skucha e palabra: Reino di Dios òf mihó bisá reinado di Dios? Nos ta kere masha hopi bia. Pero, nos a komprondé ku nos fe ta un lucha berdadero , òf revolushon ku ta purba hinka presensia di Dios definitivamente entre hende? Tin bia nos ta pensa ku ora nos ta biba nos fe nos ta hasiendo un berdadero akto di piedat ku tin komo úniko fin pa laga nos sinti pas interior; manera ku nos fe tabata un akto individual den kua e únikonan envolví ta Dios i ami. Pero ora nos kontemplá Hesus bibando balornan di e Reino di Dios, nos ta duna nos kuenta ku su relashon personal ku Dios no únikamente tabata fuente di pas interior, sino tambe fuente di transformashon den sosiedat.
Nos no por pèrdè for di bista ku kombertí i tin fe ta nifiká akseptá palabra di Kristu den su totalidat, loke mester hiba nos no únikamente na buska una relashon Tata- Yu ku Dios ku ta yena nos ku pas; sino tambe e tin ku hiba nos na un kompromiso konkreto ku nos sosiedat kaminda nos tin ku duna testimonio di presensia di Dios, di su amor pa nos, di hustisia, di solidaridat i di su mizèrikòrdia, pues ta asina so Dios lo reina riba hinter humanidat, tantu den kurason di hende komo den nos manera di kombibí. E ora ei si nos lo por identifiká ku klaridat Reino di Dios i su presensia entre nos.
Laga nos habri nos mes pues pa e mensahe di Kristu ku ta yama nos pa kombertí i akseptá un fe ku ta transformá tantu nos interior komo loke tin rondó di nos.
I e Reino aki di kua Hesus ta papia ku nos ta real i ta sperando di keda plenamente hinká paden di nos, falta únikamente nos parti: akseptá i biba segun e Evangelio di Hesus.

Laga nos trata e siman aki pa biba komo berdadero siudadanonan di e Reino: laga nos akseptá e reto ku Kristu ta pone nos dilanti e siman aki: kombertí, kier men kambia e situashonnan ku no ta laga nos sinti pas (tantu interno komo eksterno); i biba Reino di Dios segun su Evangelio, ke men, bibando ku hustisia, goso i pas den nos bida.