DI BINTIDOS DJADUMINGU SIKLO A

Promé Lektura : Yeremias 20, 7-9
Salmo : Salmo 63, 2-6. 8-9
Di dos Lektura : Romanonan 12, 1-2
Evangelio : Mateo 16, 21-27


Tin vários palabra den e Evangelio aki ku por yuda nos komprond’é mihó. Na prinsipio esaki ta bisa: “Hesus a kuminsá anunsiá”; kier men, ku esaki tabata e promé biaha ku Hesus tabata papia ku su disipelnan di e aserkamentu di su morto; i nan kontesta no a tarda: “Dios lo no permití esaki!” Ta kiko Hesus a eksperensiá pa hasi tipo di afirmashon asin'aki? E disipelnan no a komprond’é, tur kos tabata bai asina bon; si E tabata e Mesias (Evangelio di siman pasá), ¿no ta di suponé ku E tabatin ku reina na Israel i ekspulsá e Romanonan? Dikon muri?
Aki nos ta toka tema fundamental pa Hesus: morto. Di nada lo a sirbi establesé un Reino ku lo no por a vense morto. Kier men, si su Bon Notisia tabata pretendé di duna un sentido na eksistensia kompletu di hende, e anunsio aki lo mester tabatin un posishon dilanti morto komo realidat serka i menasante pa tur hende. Hopi hende a buska moda di proponé un órden personal i sosial ku ta permití tur hende biba felis, pero tur i kada un di nan a kontra na final di e kaminda ku e último realidat aki di hende: morto. Tur reino di mundu, for di esun mas simpel t’e esun mas poderoso ta terminá aki. E Emperador Romano i esun mas miserabel di su reino a terminá birando parti di e mesun tera. Ta p'esei , si Hesus a anunsiá un Reino distinto na tur reino di mundu, lat òf trempan mester a enfrentá e realidat aki.

Awor, Hesus a kuminsá tuma nota di kua lo tabata su destino pa vários rason: a rekonos’é komo profeta (kendenan a kaba matá dor di nan pueblo), el a keda akusá di blasfemia (akusashon ku tabata meresé morto), tambe pa ta saná pa Beelzebul (otro akusashon ku lo a meresé morto), El a yama Herdodes “zorro” (esun ku a mata Huan Boutista), El a reta outoridatnan violando shabat, aserkando pekadornan i yamando nan hipókrita, asesino, grafnan blanchá. Riba tur esaki, tabata e konsenshi (ku nos a mira den e promé lektura ku Yeremías) di ta hasiendo loke ta korekto; kier men, di ta kumpliendo ku boluntat di su Tata. Por lo tantu, no t’asina ku E lo tabata buska morto, pero e tabata sa ku hasi boluntat di su tata lo por a okashoná e morto aki i E no tabata dispuesto pa “kumpra” algun aña mas di bida traishonando su mishon di kumpli ku boluntat di Su Tata. Aki nos ta komprondé perfektamente e delaster palabranan di e Evangelio aki: “¿Di kiko ta sirbi hende gana mundu hinté, si e ta pèrdè su bida ?”

Asina, nos ta mira kon Hesus su konfiansa di Hesus ta poné den Dios. E ta konvensí ku si E pone su konfiansa den Dios, su tata lo no lag’é su so. Hesus tin e siguransa ku e dunadó di bida, di bida berdadero , ta Dios i no hende; i ku si E ta fiel na djE, su Tata lo no lag’é bandoná na morto. Nos no ta papiando di ku no lag'é muri, sino ku E lo no permití ku morto lo vense riba dje. Ta p'esei Hesus a kuminsá ta papia di Resurekshon. I asina nos ta rekonosé Hesus su posishon dilanti di morto: “Ta Dios tin e delaster palabra riba hende i no morto”.

Kua ta e problema ku Pedro i e demas disipelnan? Nan no a duna nan mes kuenta di e trasendensia, di e profundidat di e mensahe di nan Maestro. Nan ta buska e bida aki, e bida ku ta kaba, i nan no por a mira mas ayá di dje. Ta p'esei Hesus a skual Pedro: “Bo moda di pensa no ta esun di DIOS , sino esun di hende.”.

Den sosiedatnan kaminda kere den Kristu i ser sinsero ku e yamada ku Dios ta hasi na hende, no ta impliká morto físiko, ta difísil tin biaha komprondé radikalidat di Hesus. Tin otro sosiedatnan aktualmente kaminda nan fe si ta enserá un riesgo bibu i talbes nan lo por yega na mihó komprondementu di ku Hesus den e aspekto aki. Pero pa hopi di nos ku no ta den e situashon aki: kiko Hesus ta siña nos?

Promé: ku nos tur tin un mishon radikal i dibino komo sernan humano na bida i ku no por permití nan mes ku miedu, flohera i falta di konsientisashon ta pone ku nos no ta reakshon ku tur nos forsa pa defendé nos mishon. Nos tur ta yamá pa biba nos donnan ku plenitut i e bos di nos konsenshi, pero, kuantu bia nos no ta pone nos prinsipio i nos konsenshi un banda djis pa sinti nos mes akseptá, pa alkansá un posishon sosial mas kómodo , pa “deshasí” di un hende no deseá, òf pa por alkansá metanan humano, ku al fin i al kabo lo pasa bai ?
Di dos: Hopi bia nos ta pensa ku biba balornan evangéliko (amor, pordon, solidaridat ku esnan mas pober, union, rektitut, sinseridat, etc.) ta toka únikamente esnan ku ke ta “masha radikal” den nan manera di biba. Pero en realidat, ser kristian i no hasi esfuerso pa biba e balornan aki den forma radikal no tin sentido. Ser kristian i sigui Kristu, nunka mester pensa ku tin posibilidat pa biba e balornan aki na mitar parti ; E ta pidi nos pa biba nos prinsipio i balornan ku e konfiansa fihá den nos Tata i no den rekonosementu di algun persona.

Por último: Riba ki bida nos ta konsentrá riba e bida ku lo terminá, òf e bida eterno?

Purba hasi esfuerso pa hasi algu pa pone un banda un ke otro bisio personal ku ta alehá nos di e bida berdadero i ku únikamente ta laga un bashí den nos interior.
Hasiendo esaki nos lo por a biba e siman aki ku sinseridat di nos konsenshi.