DI SHETE DJADUMINGU DI PASKU DI RESUREKSHON

Promé Lektura : Echonan 1, 15-17
Salmo : Salmo 103, 1-2. 11-12. 19-20ab.
Di dos Lektura : 1 Huan 4, 11-16
Evangelio : Huan 17, 11b-19

Ningun di nos a konosé Hesus. I ningun di nos a mira Dios. Pero nos tur ta manera e mucha ku yen di entusiasmo i imaginashon a kai sinta pa krea un pintura di Dios. Ora su mama a mir’é, ela bis’é: Kon bo ta bai na pinta Dios si ningun hende sa kon E ta? I e mucha, den tur su inosensia a kontesta: boso lo sa ora mi kaba mi pintura.
Ami, tambe a purba di pinta Hesus ku mi no a konosé i ku palabra e Dios ku mi a no mira: palabranan di Santa Skritura i mi palabranan. I algun hende lo por a bisa: kon mi por papia di un hende ku nunka mi a mira?
I mara ami tambe lo por a bisa ku inosensia di e mucha: boso lo sa ora mi kaba di papia; boso lo sa ora ku boso skucha proklamashon di e Palabra; boso lo sa ora ku boso kuminsá biba segun E Palabra; nan lo sa ora ku nan stima manera Dios ta stima.
Nos sa ku un hende ta e mihó futbolista, no pasobra prensa ta informá, sino pasobra e ta gana e weganan i ta hasi su trabou bon.
Nos sa ku Dios ta amor, no pasobra padernan ta bisa nos, sino pasobra Hesukristu a duna bida pa nos tur, pa esnan bon i esnan malu.
Nos sa ku Dios ta amor, no pa loke nos ta bisa òf manera nos ta pint’é, sino pa e bon ku nos ta hasi pa otronan.
Dios no ta un siñansa maravioso. Dios ta un bida simpel i entregá.
Nos ta potrèt di Dios i di Hesukristu ora nos ta stima. Nos ta embahadornan di Dios i di Hesukristu i nos tin ku representá nan bon, nos tin ku papia bon i nos tin ku hasi loke nan ta hasi, STIMA.
Hesus, den e evangelio di awe, ku ta su diskurso di despedida, ta hasi un orashon pa nos, su disipelnan, su siguidónan. Hesus ta resa pa nos.
"Hesus hisando su wowo na shelu i a bisa: Tata santu warda esnan ku Abo a duna mi, pa nan tur sea un. Awor mi ta bin bèk serka Bo. Mi no ta pidi pa bo kita nan for di riba mundu, pero si bo protehá nan kontra di malbadonan. Santifiká nan pa medio di bèrdat".
Esaki ta e orashon di Hesus pa nos. Ki diferente di nos orashon!
Nos ta resa i nos ta pidi kos strabagante, kos for di òrdu innesesario i tin bia skandaloso.
Hesus ta pidi su Tata santu union di su siguidónan. Union ta señal di amor; divorsio ta señal di falta di amor. .... "inkompatibilidat di karakter", forma fini pa bisa ku amor a kaba di bisa ku amor a kaba, ku nos no por soportá otro mas.
Dios no ta separá di su yunan. Su fieldat ta pa semper, i Hesus ta resa pa nos no separá ni de Dios ni di e rumannan.
Hesus ta kabes di e kurpa, di Iglesia, i nos mester ta uní kun’E pa medio di amor i uní na komunidat ku huntu nos ta forma.
Laga nos tur ta UN. Un den e Dios ku ta salba nos.

Tabatin dos hòmber ku a noufragá i landando, nan a alkansá un isla isolá. Un di nan tabata grita desesperá: aki nos lo bai muri, aki no tin awa ni lus, no tin nada.
E otro a bisé pa no tene miedu, konfia den mi. Mi ta gana shen mil dòler pa siman.. I di kiko bo dòlernan lo sirbi nos aki riba, e kompañero a bis’é.
No preokupá bo pasobra tur siman mi ta duna un désimo na mi iglesia i sigur, sigur, ku mi pastor lo haña mi.
Dios no ta pidi nos un désimo. Dios ta pidi nos shen por shentu di nos amor. I Dios no ke esaki únikamente p’E, E ke pa nos dun’é esaki na nos rumannan.’E union ku Hesus ta resa p’e ta union den amor , den e úniko Dios i Tata di nos tur.
Aki, den misa nos ta bin pa selebrá unidat di Hesus i den Hesus. Hopi i tur distinto, hopi i tur manchá ku e mesun pikánan, hopi pero tur mirando e mesun Señor, keriendo den e mesun Tata i guiá pa e mesun Spiritu.
Aki, nos ta biba alegria di orashon i don di la unidat. Aki nos tur ta sinti nos mes komo ruman. Pero Señor ke pa e unidat aki ta prolongá parti pafó.
"Mi no ta resa pa boso saka esakinan for di riba mundu, ma pa boso defendé nan kontra di e malbado".
Nos mundu chikí, yen di egoismo, droga, krímen divorsio, odio, soledat, fèrmidat… mester salba e mundu aki i riba e mundu aki nos ta yamá pa biba nos fe, duna speransa na tur hende i praktiká amor. I for di e mundu chikí aki, tin biaha difísil pa komprendé i pa akseptá, nos tin ku traha un brùg pa yega na un mundu mas grandi, mas limpi, mas puru ku mas fraternidat, e mundu di amor di Dios.
Nos ta biba, traha, sufri i muri riba nos mundu chikí, pero nos ta di e mundu di Hesus.
I mandá na mundu pa kontinuá e tarea ku Hesus a kuminsá:
• anunsiá e Dios amor.
• ser embahadornan di Dios.
• sana mundu.
• derotá e maligno.
• krea unidat entre hende.