zondag 1 maart 2009

DI PROMÉ DJADUMINGU DI KUARESMA SIKLO B

Promé Lektura : Génesis 9, 8-15
Salmo : 25, 4-9
Di dos Lektura : 1Pedro 3, 18-22
Evangelio : Marko 1, 12-15


Nos ta kuminsá e promé djadumingu di kuaresma i e lekturanan ta introdusí nos na loke lo ta nos eksperensia anual di kombershon. E promé lektura di e promé tres simannan di kuaresma ta konta nos di e tres aliansanan mas importante di e pueblo di Israel: e aliansa ku Noé, e aliansa ku Abraham i finalmente e Aliansa ku su Pueblo Israel pa medio di Moises. Esaki ta marka pa nos kua ta sentido di e temporada di kuaresma aki.: “renobá nos aliansa, nos pakto, nos amor ku Señor”. Dios a primintí hopi bia di protehé nos, guia nos i alimentá nos ku su amor i su pas, den un palabra salba nos; pero... nos...., kon nos a respondé na tal aliansa?

Pa kana e kaminda aki di kombershon, nos mester ta konsiente ku nos no por kan’é nos so , sin yudansa di Señor; ta p'esei den e Evangelio di e djadumingu aki nos ta skucha loke a sosodé ku Hesus. Marko ta masha simpel ora e ta konta nos di e momento ei di bida di Hesus, pero den su poko palabranan nos ta haña loke ta esensial di e eksperensia di Hesus..
Nos ta skucha kon Hesus ta ser guiá PA E SPIRITU den direkshon di desierto. E promé ku nos lo por a puntra ta: ta kiko Hesus tabata bai hasi den desierto? Pa a bai topa ku Satanas; òf pa topa ku e bestianan salbahe ku e evangelista ta menshoná; òf akaso E lo a bai pasobra einan e angelnan tabata? Pakiko Hesus tabata bai den desierto? Si Hesus ta guiá pa e Spiritu di Dios, lo mas sigur ta ku Hesus tabata kana den desierto buskando pa topa ku Dios, su Tata. E ora ei desierto ta un lugá di enkuentro, di renobashon di e aliansa ku Israel a hasi ku Dios den desierto. Pa
e motibu aki presensia di Spiritu ta primordial; pues ta Esun ku ta transformá kurason di hende, ta e Spiritu di Dios ku ta pèrmití nos topa kara- kara ku Señor i por último ta pa medio di djE hende por biba e aliansa ku Dios.
Sinembargo, si Hesus tabata ser guiá pa e Spiritu, ta kon bin Ela topa ku Satanas? Akaso e no tabata guiá pa Dios mes? Definitivamente Hesus tabata ser guiá pa e Spiritu di Dios mes, pero laga nos kòrdá ku mishon di Satanas ta presisamente “saka nos” di e relashon aki, destruyé, evitá ku e union aki entre Dios i hende ta realisá. E ora ei, si Hesus tabata kana pa yega na enkuentro ku Señor, ta di komprendé ku Satanas lo a purba di strob’é. Pero na final, Hesus ta vense, i di bèrdat ta logra topa ku Dios, su Tata; i ta p’ esaki su eksperensia di desierto ta prepar’é pa kuminsá ku su mishon: introdusí Reino di Dios entre hende; ke men, restablesé e aliansa eterno ku Dios a realisá ku Israel.

E aliansa aki ku Dios a establesé ku Noé i ku despues a hib’é na plenitut ku Hesus, ta e mesun aliansa ku ta sostené nos awe komo yunan di Dios. E promesa di Dios , di keda ku nos, pa protehá nos i guia nos riba kaminda pa yega na su Reino ta real i aktual pa nos. Pero, kon nos ta biba e aliansa aki kuné? E kuaresma aki nos a drenta ta un tempu privilegiá presisamente pa “hasi kaminda règt”, pa nos arepentí di nos fayonan, di bira kara pa mira e Krus di Kristu i rekonosé ku nos no a korespondé na amor asina grandi manera Hesus ta meresé.
Kuaresma ta tambe tempu di Spiritu, pues meskos manera Ela duna impulso na Hesus pa drenta den desierto, e ta animá nos pa renobá nos relashon ku Señor. Nos no ta laga Satanas vense nos, e lo purba laga nos sinti ku nos ta bayendo bon, ku nos no mester kombèrtí; pero nos kriterio no mester ta di mediokridat sino di santidat. Laga nos bolbe na e Krus di Kristu, esaki mester ta e midí di nos amor; si nos no ta biband’é asina ta pasobra tin algu ku nos tin ku mehorá algu den nos bida.

E siman aki laga nos pensa di un birtut riba ku nos ke traha durante hinter kuaresma, por ta karidat pa esun ku nunka nos ta tene kuenta kuné, sensibilidat pa esun ku ta sufriendo, pasenshi, prudensia, speransa dilanti di nos problemanan, ets. Laga nos ser guiá durante e kuarenta dianan aki pa e Spiritu, librando nos di tentashon i rekonosiendo Dios den tur loke ta rondoná nos.