DI DIESNUEBE DJADUMINGU SIKLO B

Promé Lektura : 1Reinan 19, 4-8
Salmo : Salmo 34, 1-8
Di dos Lektura : Efesionan 4, 30-5,2.
Evangelio : Huan 6, 41-51

Den nos sosiedat nos ta balorá gesto i akshonnan ku ta duna bida. Korantnan ta sita pa nos ehèmpel di personanan ku pèrdiendo nan bida, tabata kapas pa mantené esun di otro. Tambe donashon di órgano pa transplante ta haña masha bon kobertura den nos sosiedat, ya ku kolaborá pa duna bida, pa mantené rosea aliento vital, tin un nifikashon mas ku profundo.
Den e Evangelio di awe Hesus ta laga nos mira kon haña bida, pero no únikamente bida físiko sino esun eterno.
Den nos mundu di awe e palabra "eterno" no tin bon akohida. Instabilidat ambiental ta laga hende kere ku nada ta eterno. Nan ta bisa ku "nada ta eterno", ku "no ta eksistí amor eterno", ku "no tin amistat eterno..." E défisit aki di eternidat den bista di hende kisas ta determiná pasobra nan no ta komprondé e konsepto bon. Ora Hesus ta bisa "Mi ta sigurá boso ku esun ku tin fe, tin bida eterno", E ta bisando nos ku fe ta duna sentido profundo na nos eksistensia, ku realmente por biba bida ku plenitut.
Hopi hende a bin ta kustumbrá pa anda fásil ku nan bida pensando ku por biba bida ku superfisialidat, sin plenitut. Hesus ta rekordá nos ku nos yegada na mundu ta pa nos bib’é felis, awor, akí, i mas ayá inkluso den morto mes.
Pa komprondé e realidat aki ku Kristu ta pone nos dilanti, nos mester di lus di fe. Sin fe nos no por komprondé infinidat di oportunidat ku bida ta ofresé nos. Akaso nos no a hasi aktonan di fe konstantemente den nos bida diario? Subi un oroplanu pa hasi un biahe sin tin e siguridat apsoluto di ku e piloto tin sufisiente preparashon pa hiba nos felismente na nos destino, i, sin embargo nos ta konfia... No ta un akto di fe ku nos ta hasi ora nos ta bai un restorant i nan pone kuminda pa nos i nos no ta pidi garantia di kalidat di e produktonan...? I t’ asina ta e gesto di kada dia, nos ta hasi innumerabel akto di fe.
E fe na kua Hesus ta referí ta e fe sobrenatural. Si mi ta konfia sernan humano, débil manera ami, Dikon mi no ta konfia den Señor i den su Palabra? Biba fe ta nifiká hasi un síntesis real i bibu entre loke ta dibino i loke ta humano.
Den mitologia griego e diosnan tabata biba leu di sernan humano, nan tabata hasi nan bida diario na semehansa di e personanan. Hesus ta ofresé nos e berdadero kara di Dios. E ta un Dios ku nos.
Kontestá for di fe ta nifiká biba realidatnan aki di e dos mundunan, esun humano i esun sobrenatural, bon definí den un solo eksistensia. Ta p'esei ku e kristian outéntiko semper tin Dios den kurason, eternidat den mente, i mundu bou di su pia... Rechasá e ofresementu di Hesus ta nifiká pèrdè bida riba e mundu aki i esun benidero, miéntras ku aksept’é ta haña bida berdadero riba e mundu aki i gloria eterno den esun benidero. Ta toka kada ser humano pa e skohe.
Hesus ta afirmá ku e ta "e pan ku ta duna bida".
Eukaristia pa nos katóliko ta e sakramento mas importante, e sentro di nos bida den kontesta na Dios. Biba Eukaristia no ta únikamente logra un komunidat di bida, sino un íntimo union ku Kristu. No por konosé e misterio di Dios midiendo esaki únikamente ku kriterionan terenal. Nos tin ku profundisá den e oséano di fe.
Si kualke bida mester alimentá su mes pa kontinuá, e pan ku Hesus ta duna nos ta E mes. E pan ta su mes karni; ta e alimento spiritual ku ta mantené nos bida den djE. Eukaristia ta e signo desisivo di amor komo entrega ku Dios tin pa nos. Alimentá nos mes ku Eukaristia ta laga nos ser formá pa Dios i biba, awor si, un bida outéntiko humano i spiritual den plenitut.