EPIFANIA DI SEÑOR òf FIESTA DI TRES REI

Promé Lektura : Isaias 60, 1- 6
Salmo : Salmo 72, 1-2. 7-8. 10-11. 12-13
Di dos Lektura : Efesionan 3, 2-3a, 5-6
Evangelio : Mateo 2, 2-12

Nos ta selebrá festividat di Epifania di Señor: manifestashon di Señor na tur pueblo. Un selebrashon solèm i espektakular na Oriente, i no ménos mester ta den Iglesia i realidat di Oksidente. Dikon? Ni mas ni ménos pasobra, fe kristian, ta un legado di kasi binti siglo. Un herensia ku, riba anochi di nos historia, a sa di iluminá i duna koló ku e strea di fe, na arte, pintura, sosiedat, muzik i a diseñá e forma pa kapta i komprondé bida mes.
Ta p'esei mes, Epifania, tin vigensia total mei mei di nos. Dilanti di esnan ku no ta atmití ningun tipo de manifestashon religioso, nos ku ta kristian, lo duna motibu di nos fe; nos lo pone nos mes riba kaminda; nos lo sigui e strea di fe –i no di e korto sirkuitonan ideológiko -; nos ta alsa bista na mas altura di nos mes pa risibí e lus ku ta baha di shelu i duna nos mes kuenta ku Dios ta sigui bibu, aktivo, komprometí ku kousa di hende.
*Hesukristu, awe manera den tal tempu, ta dal den hopi “Herodes” kende su presensia ta molostiá nan. Nan ke un reino na nan antoho; sin mas étika ku bienestar partikular òf e simpel estétika; ku pensamentu úniko i sin mas referensia ku e nihilismo puru i duru, pragmatismo òf humanismo.
*Hesukristu, awe manera den e tempu ayá ta sigui di ta skondí pa wowo di hopi poderoso, i ta sigui siendo deskonosí pa miónes di hòmber i muhé ku, leu di e suseso di su Nasementu, ta spera ku un hende lo hiba un palabra pa nan, un referensia di Hesu Kristu. Ta nos lo ta e “Epifania” di Dios den mundu?
Nos mester ta “Epifania” den e sirkulo ku nos ta move. Tin hopi di nos hendenan ku ta lubidá e amor ku Dios tin pa nan. Laga nos kombibí ku nos famianan na kende e “herodesnan ” nobo di konsumo, di kosnan mundano , materialismo òf di aparensha, tabata por ku e Yu chikí ku nan tabatin den nan kurason. *Nos lo ta kapas di haña e strea ku ta kondusí nos, huntu ku esnan ku mas nos stima, na entrada di e Portal di Bètlehèm?
*Nos lo ta Epifania òf nengashon di Dios? Nos lo ta manifestashon òf opstákulo di su presensia? Nos lo duna bida òf nos ta destruyé ku nos timides apostóliko? Interogante ku, riba e dia aki di Tres Rei, ta eksigí un kontesta di nos.
Nos ta gusta e dia di Epifania pasobra, entre otro kosnan, e Magonan no a keda na porta di e palasio di Herodes; pasobra nan tabata sa di distinguí entre bon i malu; entre traishon i bondat; entre strea i wowonan eksesivamente iluminá pa medio di maldat, ... den Herodes. Nan a preferá di konfia i sigui e lus di fe, e lus di Dios asta ku riesgo di ser konsiderá komo hende bobo. I, ora nan a regresá nan reino, leu di haña nan mes ruiná, a enrikesé nan mes poniendo Dios riba tur kos.
Laga nos tambe habri nos kurason. Laga nos sinti presensia di e Niño den kueba di nos alma. Laga ku e strea di fe sigui guia nos riba kaminda di nos bida i ku, na final, nos por ofresé Señor tur loke nos ta i tin.
Felis manifestashon di Dios na tur pueblo! Laga nos ta Epifania!