Bo tin derechi di rabia, pero...

Bo tin derechi di rabia,
pero bo no mester trapa dignidat dje otro.

Bo tin derechi di sinti yalurs di triunfo di otro,
pero bo no mester deseá nan malu.

Bo tin derechi di kai,
pero bo no mester keda na suela.

Bo tin derechi di frakasá,
pero bo no mester sinti bo mes derotá.

Bo tin derechi di kibuká,
pero bo no mester sinti duele di bo mes.

Bo tin derechi di tin un mal dia,
pero bo no mester permití ku e ta bira kustumber.

Bo tin derechi di tuma desishon robes,
pero bo no mester keda pegá na tal momentu.

Bo tin derechi pa ta felis,
pero bo no mester lubidá di ta gradesido.

Bo tin derechi di pensa riba futuro,
pero bo no mester lubidá presente.

Bo tin derechi di buska bo superashon,
pero bo no mester lubidá bo balornan.

Bo tin derechi di triunfá,
pero no mester ta a kosta di otro.

Bo tin derechi di inbentá,
pero bo no mester lubidá Dios.

Bo tin derechi di biba na pas,
pero bo no mester konfundí e derechi aki
pa ta mediokre òf konformista.

Bo tin derechi pa biba den rikesa,
pero bo no mester lubidá kompartí ku esnan ménos fortuná.


Bo tin derechi pa desanimá,
pero bo no mester pèrdè speransa.

Bo tin derechi riba hustisia,
pero bo no mester konfundié ku vengansa.

Bo tin derechi di eksitá,
pero bo no mester keda sin ta kortes.

Bo tin derechi riba mihó mañan,
pero bo no mester origin’é den un awe froudulento.

Bo tin derechi pa ta positivo,
pero bo no tin nodi di ta arogante.

Djadumingu di Kristu Rei siklo A

Promé Lektura : Ezekiel 34, 11-12. 16-17
Salmo : Salmo 23, 1-6
Di dos Lektura : Korinto 15, 20-28
Evangelio : Mateo 25, 31-46


Ta notabel ku tur e figuranan ku Hesus ta trese dilanti den e pasashi aki: promé e ta presentá su mes manera e Yu di Hende ku lo bini na final di tempu yen di gloria, señalando ku esaki su karakter di Mesias; despues E ta kompará su mes ku e Wardador ku konosé i ta kuida su karnénan; despues komo rei i hues ku lo huzga ken lo drenta den su Reino i ken lo no por hasi esaki. Si nos buska un faktor komun entre tur e figuranan, nos lo a yega na konklushon di ku Hesus ta tur esaki komo ku el a sa di entregá su bida pa su pueblo. Laga nos splika, Hesus por proklamá su mes komo Mesias, Wardadó i Rei di e pueblo de Dios, pasobra E a entregá su bida asta te yega na morto p'asina pueblo aki tin bida. Esaki ta fundamentu di su reinado, su sirbishi , su entrega i su solidaridat hibá t’e den ekstremo. Asina nos lo por komprondé e palabranan ku El a bisa: “ E Yu di hende no a bini pa hende sirbié sino pa E sirbi nan i pa E entrega Su bida pa liberashon di tur hende”.

Otro elemento importante ta e kantidat di biaha ku Hesus ta identifiká su mes ku esnan ku tin semehansa ku e Reino; por ehèmpel ku mucha “Kualke di boso ku risibí un mucha manera esaki den Mi nòmber, ta risibí Mi mes”; òf esnan ku a mand’é: “Esun ku risibí boso, ta risibí AMI, esun ku risibí Ami ta risibí esun ku a manda Mi”; i den e pasashi aki, ku esun ku tin hamber, esun ku tin set, esun sunú, esun den prison, etc.

Ku e dos elementonan aki: sirbishi komo signo esensial di Kristu i su identifikashon ku e ruman, nos lo por komprondé e mensahe di e Evangelio mihó. Kristu lo bin pa pidi kuenta na kada ken di loke el a risibí, pasobra ta E komo Dios ta esun ku a “repartí” e talentonan den su Reino, pero e forma den kua nos tin ku kontest’é lo no ta ku nos palabra- sino ku nos obranan. Kier men, lo esensial den siguimentu di Kristu mester ta karidat pa próhimo, pa esun den nesesidat; i for di aki den tur sentido mester sali nos akshonnan komo kristian i yunan di e Reino di Dios.

E djadumingu aki, riba kua nos ta selebrá Solemnidat di Kristu Rei, mester sirbi nos pa pensa: riba kiko mi ta basa mi realisashon komo kristian ? riba mi asistensia na misa, den mi orashonnan di piedat, evitando di mata, forniká i hòrta? Nada di esaki tin sentido si e no bai kompañá di un bon “dosis” di akto di karidat konkreto. E nòmber kristian no por separá su mes di aktitut di sirbishi i di solidaridat ku esun den nesesidat. Mester rekordá ku nos tur, for di nos boutismo, nos ta rei huntu ku Kristu, pero ku e reinado aki ta ehersé den sirbishi i amor konkreto i berdadero pa e ruman. Si nos asistí na misa, ta presisamente pa alimentá nos mes i pa por stima esnan rondó di nos ku mayor plenitut; si nos resa un rosario ta pa rekordá e obra redentor di Kristu, i motivá pa medio di dje nos ta imitá su testimonio; si nos no ta mata, no ta basta; nos tin ku promové i defendé bida. I asina, kada un di nos aktividatnan nos mester realisá nan, tratando di duna bida na e siñansa aki di Hesus ku ta bisa nos: “ E Yu di hende no a bini pa hende sirbié ma pa E sirbi nan i p’E entrega Su bida pa liberashon di tur.”

Talbes e siman aki nos lo por hasi esfuerso pa duna sirbishi manera Kristu a sirbi; ku su sensibilidat pa rekonosé nesesidat di esnan ku tabata rondon’é, ku su afan pa hasi ku tur hende sinti nan mes akseptá pa e SER ku e ta i ku e solidaridat aki ku a hib’é pa duna su bida pa kada un di nos. E ora ei si nos lo por grita ku nos bida: “Biba Kristu Rei”.