Djadumingu di Kristu Rei siklo A

Promé Lektura : Ezekiel 34, 11-12. 16-17
Salmo : Salmo 23, 1-6
Di dos Lektura : Korinto 15, 20-28
Evangelio : Mateo 25, 31-46


Ta notabel ku tur e figuranan ku Hesus ta trese dilanti den e pasashi aki: promé e ta presentá su mes manera e Yu di Hende ku lo bini na final di tempu yen di gloria, señalando ku esaki su karakter di Mesias; despues E ta kompará su mes ku e Wardador ku konosé i ta kuida su karnénan; despues komo rei i hues ku lo huzga ken lo drenta den su Reino i ken lo no por hasi esaki. Si nos buska un faktor komun entre tur e figuranan, nos lo a yega na konklushon di ku Hesus ta tur esaki komo ku el a sa di entregá su bida pa su pueblo. Laga nos splika, Hesus por proklamá su mes komo Mesias, Wardadó i Rei di e pueblo de Dios, pasobra E a entregá su bida asta te yega na morto p'asina pueblo aki tin bida. Esaki ta fundamentu di su reinado, su sirbishi , su entrega i su solidaridat hibá t’e den ekstremo. Asina nos lo por komprondé e palabranan ku El a bisa: “ E Yu di hende no a bini pa hende sirbié sino pa E sirbi nan i pa E entrega Su bida pa liberashon di tur hende”.

Otro elemento importante ta e kantidat di biaha ku Hesus ta identifiká su mes ku esnan ku tin semehansa ku e Reino; por ehèmpel ku mucha “Kualke di boso ku risibí un mucha manera esaki den Mi nòmber, ta risibí Mi mes”; òf esnan ku a mand’é: “Esun ku risibí boso, ta risibí AMI, esun ku risibí Ami ta risibí esun ku a manda Mi”; i den e pasashi aki, ku esun ku tin hamber, esun ku tin set, esun sunú, esun den prison, etc.

Ku e dos elementonan aki: sirbishi komo signo esensial di Kristu i su identifikashon ku e ruman, nos lo por komprondé e mensahe di e Evangelio mihó. Kristu lo bin pa pidi kuenta na kada ken di loke el a risibí, pasobra ta E komo Dios ta esun ku a “repartí” e talentonan den su Reino, pero e forma den kua nos tin ku kontest’é lo no ta ku nos palabra- sino ku nos obranan. Kier men, lo esensial den siguimentu di Kristu mester ta karidat pa próhimo, pa esun den nesesidat; i for di aki den tur sentido mester sali nos akshonnan komo kristian i yunan di e Reino di Dios.

E djadumingu aki, riba kua nos ta selebrá Solemnidat di Kristu Rei, mester sirbi nos pa pensa: riba kiko mi ta basa mi realisashon komo kristian ? riba mi asistensia na misa, den mi orashonnan di piedat, evitando di mata, forniká i hòrta? Nada di esaki tin sentido si e no bai kompañá di un bon “dosis” di akto di karidat konkreto. E nòmber kristian no por separá su mes di aktitut di sirbishi i di solidaridat ku esun den nesesidat. Mester rekordá ku nos tur, for di nos boutismo, nos ta rei huntu ku Kristu, pero ku e reinado aki ta ehersé den sirbishi i amor konkreto i berdadero pa e ruman. Si nos asistí na misa, ta presisamente pa alimentá nos mes i pa por stima esnan rondó di nos ku mayor plenitut; si nos resa un rosario ta pa rekordá e obra redentor di Kristu, i motivá pa medio di dje nos ta imitá su testimonio; si nos no ta mata, no ta basta; nos tin ku promové i defendé bida. I asina, kada un di nos aktividatnan nos mester realisá nan, tratando di duna bida na e siñansa aki di Hesus ku ta bisa nos: “ E Yu di hende no a bini pa hende sirbié ma pa E sirbi nan i p’E entrega Su bida pa liberashon di tur.”

Talbes e siman aki nos lo por hasi esfuerso pa duna sirbishi manera Kristu a sirbi; ku su sensibilidat pa rekonosé nesesidat di esnan ku tabata rondon’é, ku su afan pa hasi ku tur hende sinti nan mes akseptá pa e SER ku e ta i ku e solidaridat aki ku a hib’é pa duna su bida pa kada un di nos. E ora ei si nos lo por grita ku nos bida: “Biba Kristu Rei”.