DI DIESDOS DJADUMINGU SIKLO A

Promé Lektura : Yeremías 20, 10-13
Salmo : Salmo 69, 8-10. 14. 17. 33-34
Di dos Lektura : Romanonan 5, 12-15
Evangelio : Mateo 10, 26-33

Tin un palabra ku ta figurá ku sierto frekuensia den bukinan di Tèstamènt Nobo, ta e palabra "miedu". Na vários okashon ta bisa nos "no tene miedu..."
Miedu ta konstante den bida di e ser humano. Ta algu asina normal den hende meskos ku amor òf bida mes. Si nos profundisá den istoria di humanidat ta mira kon miedu tabata e loke ku a duna impulso pa reakshoná i buska splikashon pa e promé primatenan. Pero tambe nos ta mira miedu den animal i mata. Ta eksistí un miedu universal ku ta lucha pa por tin protagonismo den bida di e persona.
Señor ta bisa ..."No tene miedu di hende" . Nos temornan no ta eksklusivamente interno, tambe for di pafó ta alkansá nos situashon ku ta desekilibrá nos spiritualmente. Hopi persona a pasa di ta kriatura di Dios pa ser yunan di miedu, i ta p'esei kada bia Skritura ta kòrda nos riba e superashon ku nos mester tin di nos miedu.
Hesus ta avisá nos ku no semper su mensahe ta bon risibí, pero ta invitá nos pa tin pas i serenidat, pa no tene miedu. Apesar di ku nos ta biba den un mundu amplifiká , den hopi sosiedat Evangelio ta molostiá pasobra e ta kibra skemanan ku mundu a establesé .Desaroyo di ideologia ku no ta kondusí na felisidat ku Dios ta deseá ta un opstákulo pa biba Evangelio. Nos mishon komo kristian di e momentu aki ta pa sigui anunsiá sin kompleho i ku profundo rèspèt pa e otro e bon notisia di Evangelio.
Predikashi kristian lo desaroyá den un mundu hostil. Hesus ta duna nos otro método i otro forma pa komprondé bida i nos relashonnan ku Dios, ku nos mes i ku otronan. No mester straña nos ku e mensahe di salbashon ta proboká tenshon den e mundu ku mester di salbashon.. Ta sosodé ku komo persona nos ta kere ku loke nos ta hasi , semper nos ta hasié bon. Nos ta pensa ku nos bon intenshon ta mas ku sufisiente pa yuda ku Dios ta presente riba mundu, pero nos ta mira ku mundu no ta kambia, ku realidat di e ser humano ketu bai ta bira pió, ku realidatnan di pobresa, inhustisia i miedu ta bai ta habri kaminda ku mas forsa ku e propio Evangelio. Hesus ta atvertí nos no debilitá den e propósito aki i sigui plama predikamentu di Evangelio. Nos no ta kontra mundu sino pa e mundu stimá pa Dios.
Predikashi i persekushon ta aparesé komo komplementario. Hesus ta duna nos animo i ta kurashá nos pa perseverá dilanti peliger. Kisas peliger mas grandi ku nos ku ta purba di ta fiel na Hesus ta esun di desánimo. Ta un lucha i mira ku kasi nada ta kambia rondó di nos Ta hasi
esfuerso pa hopi bia keda sin haña muestra di ku nos mishon ta dunando fruta segun e Evangelio. Nos tin mester di e serenidat i e energia ku únikamente Dios por duna nos.
Si nos prediká i anunsiá Kristu su resurekshon ku miedu E lo no ta presente den e mensahe. Nos mester prediká Señor for di nos mes miseria, pero tambe for di nos propio fortalesa.
Evangelio semper ta konsistí di libertat, nunka e ta un menasa òf un tirania basá riba miedu. Kada un di nos mester puntra nos mes si Evangelio ta libra nos di e bèrdat di miedu òf , en kambio e ta hundi nos mas den laberinto di nos miseria.
Por ta konfundibel ku nos, esnan ku mester ta kargadó di e Evangelio di bida, nos no ta topa e reseptividat ku nos lo a gusta den personanan ku nos ta kombidá pa konosé Hesus. Ta masha probabel ku Evangelio, danki Dios lo no sea nunka, opheto fásil di konsumo. Inklusive por ta ku hopi biaha nos ta sinti nos mes desilushoná i turdí.
Únikamente ta keda nos pa sigui dilanti den e Palabra ku konfiansa, ku forsa den sakramentunan i e resurekshon ..... , semper Resurekshon di Hesus.