DI BINTIUN DJADUMINGU SIKLO B

Promé Lektura : Yozue 24, 1-2a. 15-17. 18b
Salmo : Salmo 34, 1-2. 15-22
Di dos Lektura : Efesionan 5, 21-32
Evangelio : Huan 6, 60-69


Tin kristian ku ta komprendé fe manera un akumulashon di dògma i di kosnan ku a bis’é, na kua e mester ahustá su mes den forma sumiso. Biba asina no ta humano ni kristian. Biba fe no ta akseptá ideanan sin mas sino eksperimentá forsa di e bida den nos eksistensia diario.
Ken por duna nos e sensashon ei di plenitut den bida, den nos bida di kada dia?
Sin ningun duda ... Hesus. Evangelio no ta pa yora òf pa konformá bo mes. Evangelio ta " bon notisia" i un bon notisia ku no ta kaba ni ta blikia segun tempu ta pasa. Skonde tras di muraya di Evangelio pa no konfrontá e propio realidat di bida, ta señal mas ku evidente di pobresa spiritual. E mensahe di Hesus ta aparesé dilanti hende i dilanti di siguidónan di e Evangelio di awe, no komo un mensahe difísil pa komprendé, sino difísil pa akseptá. Su mensahe ta na tal momento tabata kontené e afirmashonnan aki:

Hesus a presentá su mes komo e bida mes di Dios.
El a baha di shelu
Pa yega na eternidat hende mester someté su mes na djE.

No ta riba plano intelektual ta kaminda ta eksistí difikultat di manera ku hopi hende ta bira kristian, sino e ta den e demanda moral di Kristu. Akseptá algun idea no ta kompliká bida pa nos.
E salto mortal ta ora e ideanan ei tin ku bira bida i transformá nos bida.
Tin kristian ku ta pensa ku sigui e mensahe di Hesus di manera intelektual, únikamente den idea, ta mas ku sufisiente i no ta bèrdat. Evangelio ta haña su sentido berdadero únikamente ora un persona ta aksept’é p'asina e transformá su bida. Kambia amargura den goso, falta di speransa den speransa i odio den amor, ¡Evangelio ta duna nos tarea aktivo.
Tin algun hende ku ta tribi di afirmá ku e mensahe kristian no tin moral spesífiko. E ta algu asina manera pega na un kousa sin ku e ta mishi ku mi bida di tur dia, manera si eksigensianan di e palabra no ta toka ami. Evangelio mester hiba nos na un bida moral di kalidat di mas haltu.
Desafionan aktual pa e kombershon outéntiko na kristianismo no ta e prinsipionan dògmátiko, sino e prinsipionan moral. Hopi hende ta rechasá Kristu no pa prinsipio meramente intelektual sino pa tur loke ta suponé di ta kambio práktiko den nan bida. E siguidónan di Hesus di e Evangelio no ta tarda pa duna nan mes kuenta ku akseptá loke Hesus ta proponé, ta nifiká un kambio radikal den nan manera di biba tur dia.. Ei ta kaminda fe ta haña su plenitut: den bida.
Tin hende ku a kustumbrá na pensa di un manera i pa biba di lo kontrario, ehèmpel di e situashonnan ei nos ta topa den polítika, den medisina, den religion i den kualke otro aktividat humano. Fe den Hesus no ta sinta den SA, sino den biba i ser transformá dor di dj’É .
Hesus ta bisa ku kere den djE ta garantia di salbashon, pero esnan ku a skuch’é no a kaba di aksept’é. Señor ta bisa nan: "E kos aki ta ofendé boso? Suponé ku boso mira Yu di hende subi bai bèk kaminda E tabata promé?" Ta e anunsio di Asenshon. Ku su resurekshon Hesus ta garantisá su kredensialnan di divinidat. Kada dia nos komo kristian mester puntra nos mes tokante kiko ta nifiká den mi bida práktika akseptashon di resurekshon di Kristu.
Señor ta sigui bisando ku e úniko kos apsolutamente impresindibel ta e poder di duna bida di e Spiritu. Karni no por hasi nada... Tin persona ku ta identifiká "karni" ku "kurpa" i esaki no estriktamente ta asina. Den Beibel "karni" ta nifiká "morto i kobardia" i "spiritu" ta nifiká "bida i forsa".
For di aki masha bon nos por afirmá ku akseptá e Spiritu ta nifiká laga bo ser guiá i lucha kuné pa un kambio real i efektivo di nos bida di kada dia. Kaminda tin tristesa, amargura permanente, tenshon interior... Dios no tei einan. Kaminda tur e realidatnan aki ta eksistí pero ta lucha pa superá nan, ei ta atrayendo presensia di e Spiritu.
Kristu ta e úniko ku por duna nos propósito berdadero pa nos bida, i ademas e ta laga pa nos poder pa desaroyá e propósito aki frente e konstante oposishon ku ta bini pa nos di paden i pafó. E tabata sa ku algun hende lo a rechasé, pero ta bèrdat ku ningun hende lo por aksept’é a ménos ku e Spiritu di Dios ta mov’é. Ta p'esei no ta straño ku ta Pedro kende ta afirmá ku firmesa e balor di su palabra, rekonosiendo di bèrdat ken Hesus ta. Bon siñansa pa nos bida komo di kristiannan di awe.