Orashon di Mainta

Ta resultá mi fásil kòrda ku mi mester resa pa hende ku ta bibando un reto; i mi ta resa. Pero talbes mi no ta kòrda resa pa esnan pa kua tur kos ta kana bon.
Ta p'esei awe i tur dia lo mi kòrda yama danki pa tur e personanan ku tin den mi bida.
Mi a ser bendishoná ku hopi relashon speshal: famia, amigu, kompañero di trabou i hasta personanan ku kua mi tin únikamente un vínkulo pasahero.
Kada biaha ku mi topa ku e personanan speshal aki mi tin un flamante oportunidat pa bendishoná nan i risibí un bendishon di nan.
Ora mi resa pa otronan, mi ta ekspandé mi vishon pa inkluí hende di hinter mundu, esnan ku ta serka i esnan ku ta leu, pues nan ta parti di mi famia mundial.