San Hosé i Pasku di Nasementu

Señor Hesus, Hosé, e hòmber hustu i noble, rekto i digno, sensibel i respetuoso, hòmber di kurason grandi, a akseptá ser bo protektor, bo guardian.
Ela kuida Maria, a proteh’é, a yud’é p’asina Abo por a nase sin problema; tabata E ku a sòru pa kosnan p'asina Abo lo a krese den barika di Bo Mama; E tabata esun ku a preokupá p’Abo i Maria, Bo Bírgen Mama.
E tabata esun ku su trabou di karpinté a haña loke Maria tabatin mester pa alimentá su mes, ya asina lo bo por a krese sano i fuerte.
Tabata Hosé kende a akseptá pa kambia su plannan pa biba ku bo Mama, i a akseptá ser Bo tata dunando Bo nòmber, hasi Bo su yu i asina desendiente di David.
Señor, mirando kon Hosé a sa di hasi Bo boluntat, nos ta pidi Bo, pa nos por tin e mesun aktitut i sentimentu di Hosé. Ku nos lo biba manera Abo pidi nos.
Señor yuda mayornan di famianan na ser kada biaha mas kariñoso i mas serka di nan yunan, na ser mihó esposo (a), mas atento kuidadoso ku nan esposa, pa nan ta no únikamente esnan ku ta trese pan na kas, sino pa nan ta hendenan di Dios, fiel i servisial, hendenan ku ta duna nan bida kuidando, protehiendo i yudando nan famia manera Hosé a hasié.

Laga den e Pasku aki famia ta mas uní, stima otro mas, manera Boso a biba na Nazaret.

Señor bendishoná kada famia dor di interseshon di Hosé i La Bírgen Maria.

Amèn.