DI TRES DJADUMINGU SIKLO A

Promé Lektura : Isaías 8, 23b-9,3
Salmo : Salmo 27, 1. 4. 13-14
Di dos Lektura : 1Korintio 10. 13-17
Evangelio : Mateo 4, 12-23


E evangelista ta konta nos di kuminsamentu di bida di Hesus. Den dje ta resaltá e komienso ku Hesus ta hasi for di Galilea i no for di Herusalèm. Galilea tabata un region aksentuá pa komersio mas ku pa e fervor religioso. Ta p'esei e evangelio ta papia di e pueblo ku tabata kana den skuridat i di teranan di sombra. Den e promé parti nos ta rekonosé ku Hesus a disidí di kuminsá leu di Herusalèm; mei mei di skuridat, kaminda mas tabatin mester pa lus ku e lo mester a hasi presente entre su pueblo lo a bria.
E di dos momentu ku e evangelio aki ta presentá na nos ta e mensahe di Hesus: kombertí !!!. Despues e forma pa kombertí ta: ...pa. siguié.
Ta p'esei diferente bia nos ta skucha den evangelionan ku un multitut grandi tabata siguié di un lugá pa otro. Kombèrtí tabata nifiká, laga e bida di pasado atras i di siguié den su peregrinashon di e enkuentro ku su Tata. Esnan promé yamá pa Hesus: .... Pedro, Andrés, Hakobo i Huan, ta asina un muestra signo pa e promé kristiannan. No tantu pa laga nan trabou òf famia, sino pa nan a laga nan bida di skuridat i di sombra pa sigui e lus ku lo a bria entre nan.

Kiko ta nifiká pa nos sigui Hesus ? Hopi hende a liga siguimentu di Kristu na esnan ku ta laga nan kas i konsagrá nan bida pa medio di bida religioso òf di saserdosio. Sinembargo, siguimentu di Kristu ta loke mester karakterisá tur kristian. Kristu no ta pidi nos pa djis sigui algun idea (esaki ta un ideologia e kristianismo), sino pa nos sigui’E.
E diferensha ta sinta den ku nos ta sigui’E pasobra E a stima nos i no pasobra Ela kombensé nos di algun bèrdat. Ta p'esei Hesus ta pidi nos pa laga tras tur loke ta alehá nos for di su amor òf ta stroba nos di sa ku E ta stima nos. Esaki ta e kombershon ku Kristu ta pidi ora e pidi pa nos sigui’E.
Legumai trampa ta nifiká bira lomba pa tur loke ta alehá nos di Dios: mentira, bisio, mará na sierto idea òf kos. Laga nos pensa den e “amor” ei ku ta stroba nos di kumpli ku nos responsabilidat komo esposo òf esposa; den nos preokupashon eksagerá pa bisti òf di TIN; trabou eksagerá ku no ta permití nos biba òf e sosiegu tambe eksagerá ku no ta laga nos ser solidario ku otro.
Awe Hesus ta yama nos pa kombertí i siguié. Kada ken sa KI nòmber e ta duna e trampanan ku e mester legumai pa por sigui esun ku a pidi nos nos kurason mas ku nos rason.

Nos no por sigui Hesus si nos no konosé, ni atendé kuné. E siman aki nos lo por a buska e persona di Hesus, den Beibel, den un amigu ku ta papia ku nos di djE, riba Internet. Unda ku ta, laga nos buska Hesus pa komprendé ta ken ta esun nos tin ku sigui.