EPIFANIA DI SEÑOR òf FIESTA DI TRES REI

Promé Lektura : Isaias 60, 1- 6
Salmo : Salmo 72:1-2, 7-8, 10. 12-13
Di dos Lektura : Efesionan 3, 3-3a
Evangelio : Mateo 2, 2-12


Den e teksto Mateo ta enfatisá rekonosementu di Hesus komo Rei (oro), Señor (sensia) i Redentor (mira) di parti di e magonan di Oriente; i e rechaso di Hesus komo rei di Israel di parti di Herodes i outoridatnan hudiu. Konstantemente Mateo ta keda bòrda riba e dos temanan aki: e karakter universal di e mensahe di Hesus i rechaso di e outoridatnan religioso pa e mensahe di Hesus.

Fiesta di Epifania tin su sentro den e rekonosementu ku e magonan di Oriente ta duna Hesus komo Rei, Señor i Redentor; ta p'esei nan ta yam’é fiesta di Epifania òf Manifestashon di Dios na mundu. Ta konsiderá ku e fiesta aki mester yuda nos reflekshoná riba universalidat di e mensahe di Kristu. Tin bia nos komo kristian ta “akapará” e mensahe di Kristu di tal manera ku kasi nos ta hasi imposibel ku algun hende mas lo enrikesé nan mes di djE. Nos mester ta konsiente ku Kristu a bini pa liberá hinter humanidat i ta p'esei su mensahe mester ta universal.
Grandioso di e suseso aki di e magonan ta ku e ta hasi ku Hesus ta “evangelisá” te ainda sin papia; ke men, e yu chikí, drumí den un pesebre, ya tabata un mensahe di salbashon ku a mobilisá e magonan pa busk'E i pa nan ador’E. Kua tabata e mensahe ku a transformá bida di magonan aki? E persona di Hesus ta representá pa tur hende enkarnashon di e hende perfekto; laga nos analisá den ki sentido esaki ta sosodé. Hende ta un ser ku ta haña su realisashon den apertura na e otro, i su realisashon perfekto den su apertura na Dios. Por lo tantu, den Hesus nos ta haña e hende ku ta habrí di tal manera pa Dios, ku ta Dios mes ku a bira hende, i tambe e ta habrí pa otro di tal forma ku tur sentido di su eksistensia ta nos. Ta p'esei , e mensahe di Hesus no por limitá su mes na algun práktika religioso. Su mensahe ta yega na punto mas profundo di e ser humano; E ta realisashon pleno di tur aspirashon di e ser humano. Ta p'esei den djE tur hende por haña un mensahe di speransa i di salbashon.
Kiko e realidat aki ta siña nos? Bon, mi ta kere ku hopi bia nos a redusí nos siguimentu di Kristu na algun práktika religioso, kaminda e ser kristian ta: batisá, bai misa, i mas o ménos sigui e dies mandamentunan. Pero e fiesta di awe ta bisa nos ku esaki no ta lo úniko di nos kristianismo. Ser kristian ta aseptá ku den Kristu nos ta haña un manera perfekto di TA humano, ku den djE nos ta haña e kaminda perfekto riba nos pa hasi boluntat di Dios . Ser kristian ta biba for di e bèrdat, hasi bon i buska di manera radikal amor komo prinsipio di akshon. Ser kristian ta biba e radikalidat aki ku apertura na e otro (mi ruman) i n’e Otro (Dios), hañando nos realisashon pleno den duna i no den risibí.
Di e manera aki, e miembro konfeshonal di e totalidat no ta un berdadero kristian, sino esun ku ta hasi su mes realmente humano pa medio di su bida kristian Si nos tur lo a biba nos kristianismo asina , por tin sigur ku hopi otro ruman lo a aseptá e testimonio di Kristu komo testimonio pa nan mes bida. E ora ei berdaderamente nos lo ta promoviendo e mensahe UNIVERSAL ku Hesukristu a bin pa trese pa nos.

Laga nos reflekshoná e siman aki riba: Unda mi ta basando mi siguimentu di Kristu, den kumplimentu ku algun rito, òf den mi esfuerso pa biba plenamente komo humano, tumando Kristu komo modelo? Mi ta dunando testimonio di mi kristianismo ku mi akshon òf únikamente ku rito? Laga nos kòrda ku tur nos ritonan religioso mester ta ekspreshon di nos akshonnan di kada dia.