DI DOS DJADUMINGU DI KUARESMA SIKLO A

Promé Lektura : Génesis 12,1-4
Salmo : 33, 4-5, 18-19, 20-22
Di dos Lektura : 2Timoteo 1, 8-10
Evangelio : Mateo 17, 1-9


Esaki ta otro pasashi manera esun di e Bienaventuransanan, Ta yama nan “ikono” di e Evangelio, pasobra nan ta mustra nos ku figuranan simpel realidatnan profundo ku tin bia nos no por mira den un promé lektura. Asina, e pasashi aki di transfigurashon ta manera e ta pidi hopi di nos pa por imaginá Moises y Elías papiando ku Hesus, i esaki iluminá pa un lus ku ta brota for di su interior ku kasi a siega e apòstelnan.Den nos tempu ku efektonan di sine no ta masha difísil realisá tal esena,, pero kontempl’é den realidat lo tabata bastante deskonsertante pa e apòstelnan.
Enfin, laga nos trata na profundisá den e bèrdatnan mas profundo ku nos ta topa den e pasashi aki.
Laga nos tuma nota ku Hesus a kaba di anunsiá na nan su próksimo pashon, morto i resurekshon na Herusalèm, i e disipelnan no a komprondé ta dikon ela bisa nan esaki; echo ta ku Hesus a bisa Pedro: “Alehá bo di mi Satanas” pasobra e tabata ke konvensé pa e no bai Herusalèm pa muri. Transfigurashon lo ta asina, un konfirmashon na e apòstelnan di e bida divino, di e gloria di kua Hesus tabata duna testimonio. Ta e bida divino, e lus briante ku tabata Sali for di interior di Hesus, ku mester a manifestá su mes despues di su morto den su resurekshon. E bida divino aki, ta perfekto kumplimentu di loke Dios tabata ke transmití na hende pa medio di su promé Aliansa (Moises) i di e Profetanan (Elías); ta p'esei e dos personahenan aki lo ta importante den tal kontemplashon. Asina, nos lo por a bisa ku transfigurashon ta e manifestashon di e bida di grasia ku Hesus tabata hiba den su interior.
I kiko tur esaki ta bisa nos mes? E di dos lektura ta duna nos e pouta: “E don aki, Dios no a konsedé na nos pa medio di Kristu Hesus for di tur eternidat.” Kuantu biaha nos no ta biba buskando “pa gana shelu”, ora ku en realidat e bida divino aki ku tantu nos ke alkansá ya nos tini’é den nos interior? Fo’i ora nos a ser batisá, nos tur ta yu di Dios, den kende e ta komplasé su mes. ! Realmente nos ta biba manera yunan di Dios ku nos ta? Nos ta laga bida divino ku nos tin paden transfigurá nos ? Hopi di nos ta biba komosifuera e bon i e felisidat ta asina leu di nos, ku nan lo ta parse inalkansabel. Sin embargo, awe E Evangelio aki ta bisa nos, ku e bondat i felisidat aki ku nos ta buska pa alkansá nos tin nan den nos paden.
Transfigurá nos mes ta nifiká esaki: laga pa karidat vense nos renkor, ku nos fe i speransa ta vense nos miedu, ku nos generosidat ta vense nos insensibilidat i sieges p'asina por rekonosé e nesesidat di nos.próhimo. E lus aki ku a hasi e apòstelnan bira siegu nos tini’e den nos interior. tin Sigur ta ku kada un di nos konosé mihó kiko p’e ta nifiká pa ta transfigurá, kier men biba for di e bida divino aki di yunan di Dios ku for di boutismo nos a risibí gratuitamente.

Durante e kuaresma aki laga nos trata pa kombertí , transformá nos flakesa i debilidatnan. Awe Hesus ta bisa nos, unda nos por haña forsa pa logra e transformashon aki... den e bida ku E mes a “sembra” den nos interior. Proponé nos mes dos virtut ku kua ke biba e siman aki intensivamente i tin sigur ku fayonan lo disminuí poko poko riba nan mes.. Lus semper ta alehá skuridat.