DI TRES DJADUMINGU DI KUARESMA SIKLO A

Promé Lektura : Eksodo 17, 3-7
Salmo : 95, 1-2, 6-9
Di dos Lektura : Romans 5, 1-2, 5-8
Evangelio : Huan 4, 5-42


Kristu ta kansá di kaminda i E tin set.

E pasashi dje Evangelio di awe ta konta nos di e enkuentro di Hesus ku un muhé samaritano, kende E ta pidi pa dun'é di bebe. E muhé aki sin duda ta un muhé liber , pero di mala fama, probablemente un persona ku nos lo a trata na evitá si ela asistí na e mesun misa ku nos. I sinembargo, Dios, den su Providensia ta dirigí kos den tal forma ku e muhé aki mundano, superfisial i probablemente sin edukashon, ta risibí un revelashon ekstraordinario, ya ku Hesus ta papia kuné di término di gran profundidat i simbolismo. Kristu, meskos ku nos, tin bia ta sinti su mes kansá. E tabata hende i komo tal E tabatin debilidatnan ku nos tin, eksepto piká, E tabata sinti hamber, set, kansansio... ta p'esei E por komprendé nos. Ta konmovedor mira e Maestro kansá di kaminda i su enkargo apostóliko i sinembargo, kla pa sigui salba alma. E muhé ta bai na e pos, kaminda e ta haña Hesus sintá. E ta pidié pa dun'é di bebe, pero únikamente komo èksküs pa por drenta den un tema mas profundo. Hudiunan i samaritanonan tabata enemigu i nan tabata odia otro ya pa míles di aña, sinembargo, Kristu tin un diálogo masha bunita ku e muhé samaritano, yen di ternura, pa mustra nos ku E no ta ekskluí ningun hende di su akshon di salbashon, sino ku su amor ta ekstendé na tur alma i ku Ela bin pa salba nos tur. Un detaye di e delikadesa di Kristu, ta ku E ta kuminsá e diálogo ku un petishon, hinter un Dios ku ta pidi un fabor na un di su kriaturanan: "duna mi di bebe". E muhé samaritano ta spanta i no opstante e ta kontest’é, permitiendo asina e akshon di grasia. Ora ku e tambe dirigí su mes na Hesus ku tabata Hudiu e ta dal promé paso di su transformashon propio. Ki ehèmpel maravioso di disponibilidat i pa lubidá enemistat.

E muhé samaritano tambe tin set, pero di felisidat.

Kristu ta hasi referensia na e awa ku E lo duna nos ku di bèrdat ta kita tur nos set. E awa aki ta mirá komo símbolo di su grasia ku ta kubri tur bida spiritual. E muhé ta bolbe demonstrá su disponibilidat i apertura ora e pidi Señor di e awa ku E ta primintí. Kristu na su turno , ta probechá di interes di e muhé samaritano pa manifestá su kondishon divino na dje, ku ta permití’é mira te den profundidat di e kurason. Ta asina ta kon Señor konosé tur nos intimidat i sekretunan. E samaritano, dilanti di e deskubrimentu ku Kristu ta hasi na dje, lo por a retirá su mes tur bergonsá, sinembargo, inmediatamente e ta hasi un konfeshon di su fe sklamando: "Mi ta mira ku Abo ta un profeta". Ei ta e di dos momento di su kombershon. Ta presisamente den e aseptashon aki di Kristu den nos bida ta kaminda nos propio kombershon ta ankra.

E ta rekonosé den Kristu e Mesias i ta kompletá su kombershon.

Talbes nos no ta komprendé magnitut di e palabranan di e samaritano pasobra den realidat nos no tin idea di e enemistat ku tabata reina
entre e dos pueblonan, pero pa un samaritano rekonosé ku un hudiu tabata profeta, tabata un akto di humildat hopi grandi i ku tabata enserá vensementu propio masha fuerte. Kristu, sigur a keda konmoví dilanti e aktitut aki i ta probechá
di e okashon pa revelá n’e humilde muhé ei un bèrdat masha importante: ku ta E tabata e Mesias. I E ta hasié den forma kòrtiku bisando: "Ami ta". E samaritano ta yega na delaster etapa di su kombershon. Ya ela rekonosé su pikánan i awor e ta aseptá e doktrina berdadero: e ta rekonosé e Mesias komo Yu di Dios.

E ta kombertí den “apòstel” di Hesus.

Ta e ora ei ora e muhé, ya yen di grasia divino, ke partisipá na tur hende e loke ela eksperimentá i lubidando e motibu pa kua el a aserka e pos, e ta laga su hèmber i ta dirigí su mes na e pueblo pa kompartí loke el a deskubrí. Aki nos ta mira kon tur kombershon outéntiko ta proyektá nesesariamente na otro den deseo di ku nan tambe ta partisipá den alegria ku un hende a deskubrí. Nos a topa ku Kristu? Nos a hib’é na nos próhimo? E Evangelio ta papia ku nos di fruta di obra di e samaritano, pues E ta bisa ku " pa medio di Su palabranan hopi a kere den Kristu". Asina e tabata e instrumento ku a aserka Kristu na su rumannan, kende ya kombensí a kuminsá stima Señor i proklam’é komo nan Salbador.
E lès pa nos ta kla. E ta papia ku nos di e konsepto ku nos tin di nos propio piedat: probablemente nos lo a purba evitá un muhé manera esun di Sicar, konsiderando e komo un kaso perdí. Hesus, en kambio, a skoh’é pa kombertié i a gui’é pa hasi un konfeshon di fe. Kristu den e kaso aki ta skohe un muhé pekador i deskonosí pa ta su apòstel, pero dispuesto pa habrí pa kambio di bida i pa grasia. Laga nos pensa asina manera e samaritano, nos, apesar di nos erornan di pasado, nos lo por ser e instrumento p'asina ku Kristu yega na hopi alma. Basta únikamente ku nos arepentí sinseramente i ku nos ta dispuesto pa risibí su grasia i kombertí.