Ora Dios a krea hende muhé...

“Ora mi a krea shelu i tera, ta ku mi palabranan mi a forma nan.
Ora mi a krea hòmber, mi a form’é i a supla mi rosea di bida den dje.
Pero, abo muhé, mi a forma bo despues di a supla rosea di bida den e hòmber”
E rason? – E burakunan di bo nanishi tabata masha delikado.
Mi a laga e hòmber bai den un soño profundo pa forma bo perfektamente
i ku pasenshi. P'asina ku e lo no interferí ku mi kreatividat.
Muhé, di un wesu mi a forma bo.
Mi a skohe e wesu ku ta protehá bida dje hòmber,
e repchi, ku ta protehá su kurason i su pulmon.
Tambe e repchi ta sirbi di apoyo i ta soportá su kurpa,
esaki ta loke Ami ke p'abo hasi p’e.
Alrededor di e singular wesu aki, mi a forma bo. Mi a hasi bo perfekto i bunita.
Bo karakterístikanan ta manera e repchi, fuerte, pero delikado i frágil.
Bo ta proveé protekshon p’e órgano mas delikado di e hòmber, su kurason.
Mi ke p'abo apoyá e hòmber asina manera su repchinan ta sostené su kurpa.
Muhé, bo no a keda tuma di pianan di e hòmber, p'abo ta bou di dje,
ni tampoko di su kabes p'abo ta ariba di dje.
Mi a forma bo di su repchi, p'abo ta banda di dje
i ku e por tin bo masha serka di su kurason.
Abo ta mi angel perfekto, mi yu muhé bunita.
Bo a krese pa ta un muhé espléndido, di gran ekselensia i
mi wowonan ta yena di asombro ora mi ta mira virtutnan ku tin den bo kurason.
Bo lepnan, ta bunita ora nan ta habri pa papia ku Mi.
Bo nanishi, formá na perfekshon. Bo mannan, suave ora mishi ku nan.
Mi a karisia bo kara durante bo soñonan mas profundo.
Mi tabatin bo kurason masha serka di esun di Mi.
Di tur loke ta biba i ta hala rosea, abo ta esun ku mas ta parse mi.
Adam tabata kana ku Mi den e freskura di dia, pero e tabata sinti su mes so.
E no tabata por a mira mi ni mishi ku Mi, Únikamente e tabata por a sinti Mi.
Asina ku tur loke Ami tabata ke pa Adam lo a kompartí i eksperimentá ku Mi,
Mi a form’é den abo; mi santidat, forsa, puresa, amor, protekshon i apoyo.
Muhé, abo ta spesial, pasobra abo ta un ekstenshon di Mi.
E hòmber ta representá mi imágen; abo, mi emoshonnan.
Huntu, boso dos ta representá totalidat di Dios.
P’e rason aki, hòmber, kuida e muhé bon,
stim’é, respet’é, pasobra e ta un glas frágil.
Si bo herid’é, bo ta herida ami. Loke abo ta hasi na dje, bo ta hasi na Ami,
Ora bo hasié daño, únikamente bo ta logra daña bo propio kurason,
e kurason di bo Tata i esun di su Tata.
Muhé, apoyá e hòmber,
den humildat, demonstr’é e poder di e emoshonnan ku Ami a duna bo,
den kietut, demostrá bo forsa,
den amor, mustr’é ku abo ta e repchi ku ta protehá su ser interior.

Felipe Hutsell