Informashon di Obispado di Willemstad (di dos parti)

8. Nos ta yama bonbiní na p. Emanuel, SVD na St. Maarten for di luna di mart 2008; P. Morrison La Porte na Kòrsou i P. Toti Fuentebella na Aruba despues di nan estudio den eksterior. Bon biní i nos ta hopi kontentu ku boso presensia!
Nos ta yama danki na P. H. Nooyen, O.P. i P. S. Braham, O.P. na Kòrsou i P. Tony Peralta na Aruba ku ta bai laga nos. Masha danki pa tantu aña gastá na bienestar di nos Diósesis.

9. Nos ta animá nos seminaristanan Curtis Meris i Sendric Simon ku a risibí e ministerio di Lektornan i ta bai bek na Seminario di Trinidat pa kontinuá nan estudio, e di tres aña di Teologia i Ludceny Kirindongo ku ta sigui su estudio di Filosofia na Medellín,Colombia.

10. Situashon di santananan katóliko.
Entretantu e proseso di evaluashon di e santananan na Kòrsou a resultá den un rapòrt i estudio serio pa logra un konsepto pa un manual. Tur esaki a keda analisá un bes mas pa tur komishon i fundashon i e dokumentunan adaptá awor a bai Boneiru kaminda dia 26 di yüli lo reuní ku fundashonnan/komishonnan pa kompartí e proyekto i apliká e manual.

11. Biennan inmóvil di nos Diósesis (tereno, edifisio, etc).
Dia 28 di mei 2008 maneho di e parti importante aki tambe a haña un struktura nobo. Nos a lanta un fundashon pa asina por yega mas fásil na e fondonan nesesario. Nos tur sa ku mantenshon ta karu, sigur ora e edifisio a bai hopi atras. Meta di fundashon ta sòru pa mantenshon, tambe buska fondonan, i konsehá riba tur e responsabelnan di e biennan inmóbil di nos Diósesis.
Un di e promé pasonan ta pa yega na un lista di urgensia pa tur isla, i despues un internalisashon kompleto di tur tereno i edifisio.
Tambe lo bini un manual ku kombenionan pa mantenshon di misa, pastorí i otro edifisionan.

12. “Duc in Altum” na Kòrsou i Aruba.
Riba 22 di yüni pasá tabatin na Kòrsou entrega di sertifikado na mas ku 40 studiante ku a kaba nan estudio ku éksito i esaki a sosodé riba 4 di yüli na Aruba pa otro grupo di 30 studiantenan einan. Den tur dos evento di graduashon tabata tin un ambiente positivo ku dinamismo pa sigui forma nan mes i ofresé nan talento pa nos Iglesia lokal.

13. Nos katedral.
E trabounan di restourashon di Katedral ta bayendo mas lihé den e luna aki di yüli. E parti pafó ta kasi kla: dak, fèrfmentu, bentana. E parti paden tin mas detaye pa finalisá: ta kabando ku fèrfmentu di presbiterio (parti banda di altar); nan a pega kasi tur e granit na e muraya i pilarnan; falta instalashon di lus; pasa e mashin na e flur kompleto; e bankinan ta na Bon Futuro kaminda nos presunan ta skur i barnisá nan; falta drechamentu di òrgel i sonido. Nos ta spera ku pa kabamentu di sèptèmber renobashon di katedral lo ta kla. Pero e re-apertura ofishal lo ta 23 di novèmber na konklushon di Aña di Hubileo di Oro.

14. Drechamentu di òrgelnan.
Tres òrgel a keda renobá: Janwe; Brievengat i Suffisant. Awor na e parokianan aki ta keda e responsabilidat pa paga mitar di e kosto di e drechamentu, manera nos a stipulá; Parokia di Brievengat ta moviendo hopi bon; tin un komishon sentral di òrgel ku Dr. Keli na kabes ku ta supervisá periódikamente pa mantenshon di kada òrgel.

15. Evenementunan importante den Iglesia, Region di Amérika Latino i Karibe. Dokumentunan relevante: dia 24 di ougùstùs, Diósesis di Paramaribo lo selebrá su Hubileo di oro tambe; Nos a abri e aña di e Hubileo di Apòstel San Pablo (29 yüni 2008 -2009); den luna di òktober e Sínodo di obispunan ku e tema Palabra di Dios den bida i mishon di Iglesia, lo tuma lugá na Roma.

Nos ta pidi Dios su bendishon i protekshon di Mama Maria Inmakulada, patrona di nos Diósesis pa duna nos e selo apostóliko i kurashi pa nos sigui “rekordá pasando ku gratitut, selebrá presente ku entusiasmo i mira futuro ku speransa”.