DI TRINTA DJADUMINGU SIKLO A

Promé Lektura : Éksodo 22, 21-27
Salmo : Salmo 18, 1-4. 8. 47. 51
Di dos Lektura : 1Tesalónika 1, 5b-10
Evangelio : Mateo 21, 34-40

Na diferente okashon esnan enkargá di un ponensia òf esnan yamá pa amplia riba un tema ta kustumbrá di konkluí esaki ku siguiente remarke: “den resúmen” òf “resumiendo”. Hesus di Nazaret tambe, ta duna nos un síntesis di tur kaminda ku el a move, papia i aktua: e amor di Dios na benefisio di hende. Algun norma lo sirbi djis pa kumpli ku nan sin tene kuenta e motibu dikon a pensa riba nan? Leinan, por lo ménos algun, ta empuhe pa derechinan humano, paradigma di dignidat di hende?
1.- Awe, den un mundu agitá, konfundí, kompliká i den kua dia pa dia, kada bia di nobo, ta nase leinan – sostené pa un mayoria– na fabor di bienestar, nos lo por a puntra: E leinan ei ta hustu òf inhustu? Nan ta faboresé tur hende òf un minoria? Nan ta sirbi bienestar komun òf esun partikular? Nan ta surgi for di étika i moral òf for di simpel kapricho? E Evangelio di awe ta duna nos e esensia ku un kristian mester hiba den su bida: amor pa Dios i pa e próhimo mester sostené loke nos ta, loke nos ta bisa i loke nos ta hasi.
E doktornan di lei ku tabata proboká Hesus tabata purba na mustra dede riba nada mas ni ménos ku 613 mandamentu. Ku esaki, sin duna nan mes kuenta, nan tabata fiha asina tantu riba e buki t’e ku nan a lubidá e outor; nan tabata konsentrá asina tantu riba e teksto, di manera ku nan tabata biba ku lomba pa e spiritu ku kua el a ser skirbí; nan tabata dòrna nan eksistensia di tal manera ku, apénas, nan ta sinti doló òf e miseria di esnan ku tabata rondoná nan. Pasobra, e kestion, no tabata ken tabata kumpli mas i mihó ku lei. Hesus ta pone dede den e herida i ta kòrda nan ku, amor pa Dios, ta pasa nesesariamente pa medio di amor pa e próhimo. No por pasa ku nos manera e shofùr ku ta pretendé di ta kumpliendo den forma perfekto ku kódigo di regla di tráfiko pero, den tal opseshon , apénas e tabata disfrutá ni di e paisahe ku e tabata krusa ku su outo durante su kantidat di biahenan i loke ta pió, e tabata laga hende ku tabata tin mester di su ousilio i atenshon na pía.
2.- Awe, sinembargo, ta haña impreshon ku –tambe e mandamentu prinsipal aki di amor– hopi di nos, i tambe esnan ku no ta den Eukaristia, ta komprend’é i bib’é na nos mes manera. Hopi bia nos ta kustumbrá di bisa i skucha: “mi stima Dios i mi no mester di Iglesia” “mi ta hasi bon i esaki ta sufisiente”. I, den e frasenan aki, ku por ta pankarta di un gran bèrdat , tambe por duna motibu pa hustifikashon personal, pa no bebe di fuente di e Palabra òf , inkluso, pa stima Dios i e próhimo…pues esaki…”na nos manera” pero no “na e manera di Dios”. No ta parse nos ku t’asina ta ?
--Ora nos bisa “mi stima Dios” Nos ta hasié ku tur konsekuensia, den tur kos i riba tur kos?
--Ora nos ta pretendé di ta hasi bondat, Nos ta hasié sin distinshon, tur dia i tur ora manera Dios mes ta stima nos?
--Ora, den intento di posishoná nos mes na márgen di vivensha religioso, nos ta kustumbrá di afirmá ku “loke ta importante ta pa hasi bon” no ta parse nos ku, den fondo, tin skondí un ideologia den kua ku Dios ta konta tiki òf nada?
3.- Sí, rumannan. sufisiente nos sa ku stima Dios i e próhimo ta e resúmen òf síntesis di hinter evangelio. Pero, ora ku deskubrí amor ku Dios tin pa nos (i di otro banda, e amor ku nos tin ku ofresé na otro) ta e ora e kai na kuenta ku, restu di e mandamentunan, ta representá hinter e edifisio amoroso aki den kua ta kombibí, i e amor dibino ku e amor humano ta haña otro.

Òf di otro manera bisá: esun ku ta stima Dios, riba tur kos i esun ku ta atendé ku su próhimo manera e ta atendé ku su mes ta pasobra, ku forsa, ku perfekshon e ta kumpli ku restu di e mandamentunan , o nò?