DI BINTI DJADUMINGU SIKLO B

Promé Lektura : Proverbionan 9, 1-6
Salmo : Salmo 34, 2-3. 10-15
Di dos Lektura : Efesionan 5, 15-20
Evangelio : Huan 6, 51-58

Den ken nos fe ta fundá?

Esaki ta un pregunta ku nos tin ku hasi nos mes ku sierto frekuensia pa no pèrdè e berdadero kaminda di Hesus. Nos no ta fundamentá nos mes den loke nos ta hasi i nos ta kere den un moralidat, ni den un doktrina ni, muchu ménos, den un ideologia. Fundamentu di nos fe ta Señor mes.
Lidernan humano ta sukumbí ku paso di añanan. Tin personanan ku tabatin un protagonismo importantísimo den historia di humanidat i awe nan ta deskonosí outéntiko pa nos realidat di kada dia. A sigui lidernan humano miéntras nan tabata na bida, pero unabes ku nan a muri ta keda únikamente nan doktrina, nan ideología. Hesus no ta drenta denter di e skema aki. Nos por bisa ku Hesus nunka a bai, semper e tabata i lo keda entre nos. Ainda nos komo kristian ta sigui Hesus riba e kaminda di bida.
Evangelio di awe ta rekordá nos di nobo presensia di Hesus den Eukaristia. Eukaristia ta kontinuashon di enkarnashon di Kristu atraves di tempu. Ora san Huan ta papia di karni ku respekto na Hesus, e ta hasié pa enfatisá tur dos aspekto: Enkarnashon i Eukaristia.
Mi ta kere ku mayoria di kreyentenan i hopi di esnan no kreyente, no sa bon ku nos katóliko ta kere den presensia real di Hesus den sakramento di nos fe. Si nan krea un idea superfisial di esaki nan lo a skandalisá manera hudiunan den époka di e Maestro. No ta fásil akseptá algun realidat di fe. Pa akseptá sin ningun duda e bèrdatnan aki falta presisamente fe. Pa esun ku no tin fe, Eukaristia ta bira simplemente un rito ku mas o ménos bunitesa pero sin profundidat, sin ku e ta aportá ku nada pa e ser humano ku ta partisipá den dje. Pa e kreyente en kambio, Eukaristia ta kombertí den un espasio privilegiá di enkuentro ku Señor. Nos ta papia kuné , E ta papia ku nos. Nos ta kompartí su mesa i su sakrifisio... hopi ta e klavenan spiritual ku nos por deskubrí den un Eukaristia realmente bibá.
Ora misa ta fada esun ku ta siguié ta pasobra su FE no a yega na madures. Por ta ku algun ta rechasá inklusive e realidat di fe mes. Por ta ku nan ta bisa ku fe ta un invento. Nan ta pèrdiendo dimenshonnan fundamental den siguimentu di Señor. Por ta ku den nos parokianan kadisashi ya no tin e referensia eksplísito i sentral pa Eukaristia. No sa ku ta transmití pa e muchanan e amor pa Señor den Eukaristia ku profundidat. Nos tabatin époka kaminda nan a pone kontra di otro realidatnan di Hesus -Eukaristia frente e Hesus- próhimo. Algun hende ku frekuensia ta lubidá ku nos propio entrega na esnan mas pober i den nesesidat, mester tin su orígen i modelo na e entrega di salbashon i sin kondishon di Hesus. Nos ta partisipá na Eukaristia pa siña kon entregá nos mes manera Señor.
Ami ta gusta naturalesa; den dje tin refleho di e akshon amoroso di Dios. Si ta atmirá un paisahe bunita, na tal momento no ta "hasiendo nada" pa esnan mas pober i débil. Sin embargo, e forsa ku ta imprimí den e espíritu tal kontemplashon ta renobá energia pa un entrega mas kompletu pa esnan mas débil i den nesesidat. Nos paisahe semper mester ta Señor. Si nos kontemplá otro bista nos tarea lo no tin e resultado ku Hesus ke.
Kome su karni i bebe su sanger ta kere den Kristu. Ta nesesario alimentá nos mes ku Kristu. Nos organismo mester di tur kos pa por biba: vitamina, proteina, ets. ets. Pa esaki nos ta tuma diferente tipo di alimento. Tur loke nos bida spiritual mester nos tin den Hesus. Kuantu hende ta akudí en buska di alimento spiritual na hopi mesa i na hopi plato, pero di ningun nan ta sali satisfecho! Kiko ta den fondo e ser humano ku no ta un buskadó di eternidat ku ta trata pa e haña satisfakshon serka un hende ku di bèrdat ta yena su bida?