DI TRINTA DJADUMINGU SIKLO B

Promé Lektura : Yeremias 31, 7-9
Salmo : Salmo 126, 1-6
Di dos Lektura : Hebreonan 5, 1-6
Evangelio : Marko 10, 46-52

E pasashi aki tin komo sentro aktitutnan di Bartimeo, pa loke ta parse importante pa nos analisá e aktitutnan aki, ku Marko ta presentá komo modelo pa e kristian ku ke sigui Hesus. E promé aktitut di e siegu ta un akto di reflekshon interno: Bartimeo ta rekonosé ku e no por mira, i e sa ku su situashon por ta mihó. E di dos aktitut ta di rekonosé den Hesus e hende ku por kambia su bida, Bartimeo tin fe den Hesus i ta p'esei e ta realisá su di tres akshon: grit’é i kana bai serka djE, no ta import’é kibra ku skema òf stroba, e tabata sa ku Hesus lo por a salb’é. Por último, despues di haña den Hesus sanashon pa su sieges , Bartimeo ta sigui Hesus riba e kaminda.
Ademas di e aktitutnan di Bartimeo, ta signifikativo akshon di e komunidat ku ta aktua mas komo opstákulo ku komo yudansa p'asina e siegu por mira: nan no ta lag'é papia ni aserká Hesus, tampoko nan ta intersedé p’e, sino ku nan ta preferá pa e keda siegu i pa e no “molostiá” Hesus. (Esaki ta duna nos base pa reflekshoná riba nos aktitut dilanti di hopi hende ku ke sali di nan sieges i no ta haña den nos aliento pa sigui dilanti.)

Kuantu siegu awe ta kana sin ku ta rekonosé nan komo tal? Siegunan ku no ke mira nesesidat di nan próhimo, siegunan ku ta buska felisidat den plaser i inresponsabilidat, siegunan ku ta kana sin sa pa unda nan ta dirigí nan mes, siegunan ku no ta mira loke nan tin i por lo tantu no ta duna loke nan mester, siegunan pa trabou, siegunan pa alkohòl i bisio, siegunan pa nan egoismo, siegunan ku no ke rekonosé nan kulpa den pleitu di famia, siegunan ku no por mira den felisidat di nan pareha e fuente di nan felisidat, siegunan ku no por haña den Kristu e fuente di nan amor, siegunan pa nan forma mediokre di biba bida. Enfin, ta parse ku tin hopi Bartimeo entre nos i talbes kada un nos por identifiká nos mes ku algun tipo di sieges. Pa nos tur e pasashi aki tin un palabra: na promé lugá bo mester por rekonosé bo sieges; di dos, lo bo tin ku vense e flohera ku ta indusí bo pa sigui biba den e sieges aki; i di tres, kere den Hesus, asérkE, no tene miedu pa pidié su salbashon; i por último, disidí di siguié.

Hesus no por sana nos sin nos mes , Hesus lo a pasa bai i e siegu nunka lo a mira si e no a pone di su parti; Hesus tabatin mester di akshon di e siegu pa por a kur’é. Pero loke ta mas importante ta loke ta sosedé na final, e siegu, unabes ku e por a mira, a sigui Hesus. Si nos aserka Hesus únikamente pa E por resolvé nos sieges, pero si unabes E yuda nos, nos alehá nos mes di dJE, e ora ei nos no por bisa ku nos a kaba ku nos sieges.

Rekuperá nos bista, o ser salbá pa Hesus, ta enserá un kambio di bida, un kambio di aktitut, ku ta tradusí su mes den siguimentu de Kristu. Ora un hende yega na mira, i e duna su mes kuenta di e hopi ku el a pèrdè pasobra e tabata leu di Kristu, e no por hasi nada otro ku bras’é i siguié. Esaki ta biba serka di djE, den orashon, pa medio di su Palabra, asta den Komunion; i tambe sirbiE, den solidaridat, mizerikòrdia i hustisia.

Pues laga nos aserká Hesus, rekonosiendo nos “siegesnan”, pidiend’ E su salbashon i pa nos disidí di kana riba su kaminda, kaminda di goso inmenso, di inmenso amor i pas; pero tambe di kompromiso, responsabilidat i solidaridat.