DI TRINTITRES DJADUMINGU SIKLO B

Promé Lektura : Daniel 12. 1-3
Salmo : Salmo 16, 5. 8-11
Di dos Lektura : Hebreonan 10, 11-14. 18
Evangelio : Marko 13, 24-32

Ki dia fin di mundu lo yega?
No ta straño topa riba nos kayanan persona ku ta pertenesé na distinto grupo religioso bisando nos ku señalnan di fin di mundu ya ta presente. Nan ta bisa nos ku mundu "ta asina malu..." i nan ta mira den guera i violensia señalnan mas ku kla ku pronto e ta yega.
Ki dia Hesus lo bini atrobe?
E Evangelio di awe ta hasi referensia no na fin di mundu sino na e di dos binida di Hesus. Tur dos realidat por bai huntu, pero nan tin nifikashon mas ku distinto.
Tin kristian ku ta mira e último momentonan komo señal di tragedia si no ta di inmenso doló i sufrimentu. Tin hopi hende ku te ainda no a duna nan mes kuenta ku kere den Hesus semper ta e regalu mas bunita ku un ser humano por risibí. Binimentu bèk di Hesus na final di tempu no ta motibu di tristesa sino di speransa.
E Palabra di awe ta bisa nos ku "Lo e reuní esnan ku e skohe for di e kuater skinanan kardinal di mundu". Yegada nobo di Hesus ta pa reuní esnan ku a laga buraku den nan bida den su mensahe i den su persona. No ta pa establesé kondena sino pa uni den amor i plenitut ku riba e kaminda diario di bida semper nos falta. Binida di Hesus di nobo ta salbashon.
E final ku Hesus ta trese pa nos no ta fin natural di mundu sino final di e mundu di piká i di morto.
Nos ta asina kustumbrá di biba den e bida aki rondoná di piká i di morto, ku inklusive riba nos kaminda di tur dia nos mester un fin i un kuminsamentu di nobo. E ehersisio aki nos ta hasiendo kada bia di nobo. Kiko ta konfeshon si no ta un finalisá un bida ku intenshon di keda den un eksistensia nobo?
Pa hudiunan di e époka di Hesus destrukshon di e tèmpel tabata mará na fin di tempu. Hesus ta laga nan mira ku esaki no ta asina. Realidat ta ku Hesus a muri i a resusitá i e tèmpel a keda destruí pero no a yega ainda na final di tempu i di historia.
Señor ta hasi uso di e lenguahe i figuranan ku hopi hudiu tabata konosé i tabata usa ya pa basta siglo i a laga sa ku e lo bolbe di nobo. Si na prinsipio di Beibel ta bisa nos ku Dios a krea solo, streanan, shelu ... den e teksto di awe e ta bisa nos ku nan lo para e loke a krea nan p’e; nan ta spera un kreashon nobo. Fecha di e binida nobo aki ta mantené su mes den e mas apsoluto sekreto. E Parusía —e binida di e Yu di Hende— ta e punto kulminante i meta di hinter istoria humano.
A lo largu di siglonan nos komo ser humano a resistí tantu komo individual komo den grupo na mandato di Dios; historia humano ta ehèmpel kla di e resistensia aki. Nos a avansá den hopi realidat ku ta afektá e ser humano, pero nos no por bisa ku nos proyekto- i ambishonnan ta orientá totalmente riba Dios. Banda di e trigo yerba shimaron ta krese i siglonan ku su historia no por a konvensé tur hende ku Dios ta spera algu di nos i di e mundu riba kua nos ta. Binida definitivo di Hesus ta e gran triunfo di Dios riba e kreashon desviá di su kaminda.
Evangelio di San Huan ta bisa nos ku "na prinsipio tabata e Palabra..." E teksto aki ta rekordá nos ku na final di tur kos e palabra aki lo keda ku "e lo no pasa bai".
Mi mester konfesá ku ya tin algun aña ku kada bia di nobo den mi memoria ta aparesé un frase di Evangelio ku ta konsolá i animá mi. E ta esun di Hesus riba krus ku e ladron na kua e ta lansa su promesa: "awe lo bo ta huntu ku mi den paraiso..." E no ta laga pa spera final di tempu pa laga sali na kla su delaster lugá, E ta bis’é "awe" sabiendo Señor bon ku ora nos muri nos ta pafó di tempu i di historia. E "Awe" aki ta mas ku un anunsio i un promesa, ta e siguridat di ku esun ku pone su mes ku konfiansa den brasa di esun krusifiká tin bida nobo.
Un final paresido pa historia humano ta e promesa ku Hesus ta hasi na nos. E ta bisa nos ku na final di e kaminda E ta spera nos i ku E no ta laga nos keda nos so den e duresa di kamindanan di bida.
Final di tempu ta awe, nan ta e señalnan ku ta mira ku ta animá pa buska Dios i laga nos ser transformá pa E.
Mi ta kere ku ateo- i gnóstikonan igual ku kreyentenan mester di e binida nobo di Señor. Nos a kere pa medio di fe, sin mira; nan mester mir’é di nobo p’asina nan kurason kere. Den fondo e binida nobo di Hesus ta oportunidat definitivo ku e ta duna hende p’asina yega na e magnífiko enkuentro aki entre Dios i sernan humano. Señor ta stima nos asina tantu ku e ta bolbe di nobo p’asina loke el a krea no ta pèrdí leu di su paraiso. Historia di ser humano ta kuminsá den un paraiso i ta terminá den un paraiso. Den e promé Dios tei ku ta mira desobediensia di e ser humano; den e di dos E ta reuní ku nos di nobo pa ofresé nos su amor eterno. Ta dos momentu di un mesun historia, historia di Dios i di humanidat liberá.
Ku ami tin miedu di fin di mundu? Ni den lo mas mínimo. "Awe lo bo ta ku Mi den paraiso..."