Fiesta di tur Santu

Promé Lektura : Revelashon 7, 2-4, 9-14
Salmo : Salmo 24, 1-4a. 5-6
Di dos Lektura : 1Huan 3, 1-3
Evangelio : Mateo 5, 1-12a

Dia promé di novèmber ta selebrá fiesta di Tur Santu. Pa hinter Iglesia ta un gran selebrashon pasobra tin gran fiesta den shelu. Pa nos ta un gran oportunidat pa gradisí pa tur benefisio, pa tur grasia ku Dios a drama riba hende ku a biba riba e tera aki i ku tabata manera nos, ku mesun debilidatnan i ku tur e fortalesa ku ta bini di Dios mes . Nos ta selebrá e dia aki ku un kurason gradesidu, pasobra Dios tabata grandi ku nos i nos ta kontentu.

Awe ta un bon dia pa reflekshoná riba tur e bon spiritual i material ku pa medio di interseshon di santunan nos a risibí i nos tin te dia djawe, pues e santunan ku a deseá Gloria di Dios for di aki riba tera lo sigui dese’é den vishon beatífiko, i ta kompartí e mesun deseo di Nos Señor Hesukristu di ku tur hende lo ta salbá, ku tur hende ta glorifiká Nos Señor.

Iglesia a instituí Fiesta di Tur Santu pa e siguiente motibunan:


1. Pa alabá i gradisí Señor pa e fabor ku ela hasi na su sirbidónan, santifikando nan riba tera i koronando nan ku gloria den shelu.

2. Pa honra riba e dia aki mas e Santunan pa kende no ta hasi fiesta partikular durante aña.

3. Pa nos risibí hopi mas grasia multiplikando esnan ku intersedé.

4. Pa koregí riba e dia aki e faltanan ku den transkurso di aña nos a kometé riba fiesta partikular di Santunan.

5. Pa animá nos mas na birtut ku ehèmpelnan di tur Santu di tur edat, sekso i kondishon, ku memoria di e rekompensa ku nan ta gosa di dje den shelu.

Mester kurashá nos pa imitá en santunan i konsiderá ku nan tabata mes debil ku nos i eksponé na mesun pashonnan; ku, fortifiká pa e grasia dibino, a bira santu dor di medionan ku nos tambe por hasi uso di dje, i pa méritonan di Hesukristu a primintí nos e mesun gloria ku nan ta gosa di dje den shelu.

Ta selebrá fiesta di Tur Santu ku tantu solemnidat pasobra e ta kubri tur otro fiesta ku durante aña ta selebrá na honor di Santunan i ta símbolo di e fiesta eterno di e gloria.

Pa selebrá fiesta di Tur Santu di manera digno nos mester:

1. Alabá i glorifiká Señor pa e fabornan ku el a hasi pa su sirbidónan i pidiE pa asina tambe konsedé esakinan na nos.

2. Honrá tur Santu komo amigu di Dios i invoká ku mas konfiansa su protekshon.

3. Hasi propósito di imitá su ehèmpelnan pa un dia ser partisipante di e mesun gloria.

Ta importante pa riba e dia asina importante pa Iglesia pa nos para un ratu ketu pa pensa riba tur e bon ku Dios a duna humanidat pa medio di tantu hòmber i muhé ku fiel na bondat di Dios, fiel na su amor tabata testigu di e Reino di Señor. E kantidat di santu, i mártirnan ku a laga marka asina profundo di nan pasashi riba e tera aki ku ni tempu ni kambio di generashonnan no tabata por a kita. I si nos bisa ku ta di tur Santu ta pasobra nos tambe ta selebrá tantu Santu i Mártirnan ku Dios tabata ke tene den anonimato, i ku nos no konosé nan na nòmber pero nos sa ku pa medio di fe ku nan ta dunando gloria na Dios.

Laga nos selebrá e dia aki ku goso, i laga nos pidi Dios Nos Señor permití pa nos por disfrutá riba e tera aki di protekshon di su santunan i ku un dia e permití pa nos pa ta huntu ku nan pa glorifikE den su eternidat.

Ku Mama Maria, Reina di santunan konsedé na nos e alegria di sirbi e tera aki pa por mira i gosa di djE den bida eterno.