SANTÍSIMA TRINIDAT

Promé Lektura : Deuterenomio 4, 32-34. 39-40
Salmo : Salmo 33, 4-6. 9. 18-20. 22
Di dos Lektura : Romanonan 8, 14-17
Evangelio : Mateo 28, 16-20

Djadumingu pasá, nos a mira presensia di Spiritu den nos Iglesia i den nos bida; e djadumingu aki ta toka na nos pa profundisá den e misterio di Dios.
Den Beibel no ningun kaminda ta aparesé e palabra "Trinidat", pero sí loke e ta nifiká: Dios ta solamente UN: E ta Tata, Yu i Spiritu Santu. Ku e terminologia aki di "Trinidat" no ta ekspresá un mas di e atributonan di Dios, sino e konstitushon mes di su esensia.
Tampoko e doktrina aki ta aparesé den ningun di e otro religionnan monoteista. Ni den hudaismo ni den Islam nos ta mira e menor señal di tal kos. Doktrina di Santísima Trinidat ta eksklusivo di kristianismo.
No tin nodi di bisa ku a purba splika ku tantu pa komprondé su filosofia komo e teologia tin basta difikultat. Ser humano ta purba splika e misterio, pero profundidat di Dios ta ekstensivo pa nos kapasidat terenal limitá. Inkluso nos falta palabra pa por deskribí ku eksaktitut misterio asina grandioso.

Kon Dios por ta un den tres? Kon tres por ta unu?
Kristianismo por duna impreshon pa esun alehá di ta un fe kompliká, yen di splikashon mitar spliká, di misterio ku nan profundidat ainda ta riba kaminda di bida ta poko ménos ku inaksesibel. Por ta ku algu di esaki ta bèrdat. San Pablo mes a bisa nos ku "awor nos ta mira Dios manera den un spil, pero despues lo mir’é kara kara". Pues no ta straña nos anto dos reakshon masha humano ku nan a duna den e último episodio di e evangelio di san Mateo.
E evangelio ta bisa ku e disipelnan a reakshoná na dos manera:

• "nan ta ador’é”.- Deskubrí grandesa di Dios semper ta produsí adorashon. Mi ta kòrda ku den mi añanan di hubentut kon despues di algun ehersisio spiritual intenso nos komo mucha tabata sali yená di Dios, di atmirashon, amor i rèspèt pa nos kreadó. Algu asina nos promé rumannan di fe a sinti.
Pero no tur kos ta grandesa i bunitesa. E evangelio den kasi mes liña ta hiba nos bèk na realismo bisando:

• "pero algun a duda".- Inkluso entre esnan ku ta adorá por tin esnan ku ta duda. Debilidat i duda no ta nifiká ku fe no ta sinsero. Duda ta ripití su mes konstantemente den siguidónan di Hesus:"Lo ta awor E ta bai proklamá su reino?" "Abo ta esun ku mester bini...?" i asina kantidat sin fin di duda na kua kada un di nos tin ku duna su kontesta; su kontesta propio i personal.
Pa medio di e teksto nos por komprobá ku e disipelnan no tabata inkliná na kere ni pa pasa den desapunto, sino ku promé nan tabata ke tin prueba sigur di e bèrdat, pa despues nan pega na dje di hinter nan kurason. " Nan duda —San Jerónimo ta bisa— ta oumentá nos fe".
Nos komo hende den nos eksistensia terenal ta move entre dos parameter: adorashon i duda. Tin duda no ta malu; loke ta malu ta ora no ta haña kontesta ku Dios ta duna nos riba kada un di nan.
Den fondo Trinidat ta ni mas ni ménos ku entrega total, pleno i profundo di Dios. Deskubrí e Tata, e Yu i Spiritu santu aktuando den bo bida, ta e aventura spiritual mas grandi ku un ser humano por eksperensiá riba hinter kaminda di su eksistensia.
Laga DIOS yena e ser ku nos ta , ta e mihó manera di siguiÉ. Den e tarea aki Hesus ta laga pa nos e enkargo di batisá i proklamá Trinidat. Dikon Hesus ta bisa ku tin ku batisá den nòmber di Tata i di Yu i di Spiritu Santu?, pasobra E sa perfektamente ku den nan tin e mesun núkleo di Dios. Deskubrí esaki den nos bida di kreyente ta di laga ku sea Dios mes kende ta guia nos.
Tata ta Dios pa nos. Yu, Dios ku nos. Spiritu santu ta Dios den nos.

DJADUMINGU DI PENTEKÒSTER

Promé Lektura : Echonan 2, 1-11
Salmo : Salmo 104, 1ab, 24ac. 29bc- 31. 34
Di dos Lektura : 1Korinto 12, 3b-7, 12-13
Evangelio : Huan 20, 19-23

Den kuantu dios kristiannan ta kere? Ken ta Spiritu Santu?
Tin personanan di otro religion i kerensia ku ta pensa ku nos komo kristian te kere den tres dios distinto, algu manera un mini shelu mitológiko... Nò! Nos komo kristian ta kere den un solo Dios. Un Dios ku ta Tata, Yu i Spiritu Santu.
Ken ta Spiritu Santu? Spiritu Santu ta Dios. E no ta energia misterioso ku ta sali for di Dios, ni un rosea di e todopoderoso kompletamente impersonal. E ideanan aki ta bini di e panteísmo kontemporáneo atraves di religionnan oriental. Spiritu Santu tin personalidat propio; e no ta algu skur sin presishon. Spiritu Santu ta Dios.
Un solo Dios den tres persona ta loke nos komo kristian ta yama e "Misterio di Santísima Trinidat". E tres personanan ta partisipá den e diferente aspektonan di salbashon. Dios Tata a disponé salbashon di ser humano , realisá pa medio di e Yu, Hesukristu, i apliká pa Spiritu Santu.
Si puntra hopi hende ku ta bai Misa ku frekuensia tokante di Spiritu Santu lo haña mas ku un sorpresa.
Nan ta bisa ku E ta e gran deskonosí i tin basta bèrdat den e afirmashon ei. Ku sierto frekuensia nos ta lubidá ku ta únikamente Spiritu Santu ta esun ku por kambia kurason humano ku no ta resistí na reformá su bida segun Dios. Kombertí bo mes ta hasi kaso di e invitashonnan di Spiritu Santu den nos bida i lag’é ser transformá pa medio di djE. E Spiritu di Dios ta esun ku ta santifiká nos, esun ku ta apoyá nos riba e kaminda di Kristu, esun ku ta yuda nos den nos debilidat i ta intersedé na nos fabor; esun ku ta duna testimonio na nos spiritu di ku nos ta yunan di Dios, i esun ku un dia, na final di tempu, lo duna bida na nos kurpa mortal ku e mesun poder ku a lanta Kristu di entre mortonan.
Por parse ku Spiritu Santu ta aktua di manera eksklusivamente individual, pero bèrdat ta ku e tin un akshon desisivo den bida di komunidat. Nos komunidatnan ta debilitando i ta birando simplemente grupo di amigu si E no ta presente. Ta nota un komunidat kaminda E ta presente i ta nota tambe kaminda e no t’ei ! ...
Kada kristian mester puntra su mes kua ta e lugá ku Spiritu Santu ta okupá den nos bida. Hesus a bisa nos ku "E lo laga boso mira tur kos " (Hn 14,26). No t’asina ku mediokridat di hopi kristian ta debí ku nan ta dediká hopi tempu na otro siñansanan diferente di esnan ku Dios ta trese pa nos?
Kiko presensia di Spiritu Santu ta aportá na e kristian?
Den Iglesia nos ta bisa ku basta frekuensia "Bini Spiritu kreador", i ta bèrdat, e Spiritu ta rekreá nos bida di dia pa dia pa hasié na e imágen di loke Dios ke. Laga E transformá nos, ta nifiká keda serka di e boluntat di Dios pa nos bida.
Tambe den nos bida diario E ta mustra nos e aktitutnan ku nos mester tin dilanti e diferente situashonnan. Pa ser guia di e pueblo, profeta, rei, Spiritu Santu tabata presente. Na apòstelnan e ta duna algun kualidat pa risibí boluntat i revelashon di Dios i E ta duna nan un poder insólito pa prediká e Evangelio. Mesun kos ta pasa ku nos awe.
Ela inspirá Santa Skritura i ta fortifiká nos pa nos bib’é.
Di dia pa dia E ta presente den nos bida hasiendo ku nos ta nase di nobo ku e arepentimentu i fe den Kristu. Arepentimentu ta yega únikamente ora hende ta konsiente di piká. Ta Spiritu Santu ta esun ku ta biba den e kristian lagando su frutanan di: amor, alegria, pas, pasenshi, amabilidat, bondat, fidelidat, humildat i dominio propio.
Iglesia ta keda marká di manera definitivo pa medio di presensia di Spiritu Santu. E ta esun ku ta edifiká Iglesia i E ta esun ku ta aportá tur e elementonan nesesario pa kresementu di komunidat kristian pa medio di su karisma i donnan.

Pentekòster

Outor: Teresa Fernández

Orígen di e fiesta

Hudiunan tabata selebrá un fiesta pa yama danki pa kosecha,
50 dia despues di Pasku. Di einan e nòmber Pentekòster ta bini. Despues, sentido di e selebrashon a kambia pa yama danki na e Lei entregá na Moises.

Ku e fiesta aki nan tabata rekordá e dia riba kua Moises a subi Seru Sinaí i a risibí e tablanan di Lei i a mustra esaki na e pueblo di Israel, loke Dios tabata ke di nan. Asina nan tabata selebrá e aliansa di Tèstamènt Bieu ku e pueblo a establesé ku Dios: nan a komprometé nan mes pa biba segun su mandamentunan i Dios a komprometé su mes pa ta semper ku nan.

Hende tabata bini di hopi lugá na e Tèmpel di Herusalèm, pa selebrá fiesta di Pentekòster.

Den marko di e fiesta hudiu ta kaminda nos fiesta kristian di Pentekòster a surgi.

Promesa di Spiritu Santu

Durante Último Sena, Hesus ta primintí su apòstelnan: “Mi Tata lo duna boso otro Abogado, ku lo ta ku boso pa semper: e spiritu di Bèrdat” (San Huan 14, 16-17).

Poko despues E ta bisa nan: “Mi ta papia e kosnan aki ku boso miéntras Mi ta huntu ku boso; pero e Abogado, esta Spiritu Santu, ku Tata lo manda den mi nòmber, lo siña boso tur kos i rekordá boso tur loke Ami a bisa boso.” (San Huan 14, 25-26).

Ora nan a finalisá ku sena, E ta bolbe hasi nan e mesun promesa: “Ta kumbiní boso bini kaminda Mi ta bai, pues ora Ami bai e Abogado lo bini,... Mi tin hopi mas kos di bisa boso, pero boso lo no soportá nan aworakí. Ma ora e Spiritu di Bèrdat bin , lo E guia boso na e bèrdat kompletu,... i E lo konta boso di kosnan ku lo bai pasa” (San Huan 16, 7-14).

Den kalendario di Aña Litúrgiko, despues di fiesta di Asenshon, sinkuenta dia despues di Resurekshon de Hesus, nos ta selebrá fiesta di Pentekòster.

Splikashon di e fiesta:

Despues di Asenshon di Hesus, e apòstelnan tabata reuní ku Mama di Hesus. Tabata dia di fiesta di Pentekòster. Nan tabatin miedu di sali prediká. Di repente, nan a skucha un bientu fuerte i lenga chikí di kandela a baha riba kada un di nan.

Nan a keda yená di Spiritu Santu i nan a kuminsá papia idiomanan deskonosí.

Den e dianan ei, tabatin hopi strañero i bishitantenan na Herusalèm, ku tabata bini di tur parti di mundu pa selebrá fiesta di Pentekòster hudiu. Kada un tabata tende e apòstelnan papia den nan propio idioma i tabata komprondé perfektamente loke nan tabata papia.

Nan tur, for di e dia ei, ya no tabatin miedu i nan a sali prediká siñansanan di Hesus na hinter mundu. Spiritu Santu a duna nan forsa pa e gran mishon ku nan tabatin di kumpli kun’é : Hiba palabra di Hesus na tur nashon, i batisá tur hende den nòmber di Tata, di Yu i di Spiritu santu.
Ta riba e dia aki eksistensha di iglesia a kuminsá komo tal.

Ken ta Spiritu Santu?

Spiritu Santu ta Dios, E ta e di Tres Persona di Santísima Trinidad. Iglesia ta siña nos ku Spiritu santu ta e amor ku ta eksistí entre Tata i Yu. E amor ei ta asina grandi i asina perfekto ku e ta forma un di tres persona. Spiritu santu ta yena nos alma den Boutismo i despues, di manera perfekto, den Konfirmashon. Ku e amor divino di Dios denter di nos, nos ta kapas pa stima Dios i e próhimo. Spiritu Santu ta yuda nos kumpli ku nos kompromiso di bida ku Hesus.

Señalnan di Spiritu Santu:

Bientu, kandela, palomba.

E símbolonan aki ta revelá na nos podernan ku Spiritu Santu ta duna nos: Bientu ta un forsa invisibel pero real. Asina Spiritu Santu ta. Kandela ta un elementu ku ta limpia. Por ehèmpel, ta sende kandela riba tereno pa kita yerba malu i pa por sembra bon simia. Den laboratorionan médiko pa purifiká instrumento nan ta pasa kandela riba nan.

Spiritu santu ta un forsa invisibel i poderoso ku ta biba den nos i ta purifiká nos di nos egoismo p’asina traha kaminda pa amor.

Nòmbernan di Spiritu santu.

Spiritu Santu a risibí vários nòmber a lo largu di Tèstamènt Nobo: Spiritu di bèrdat, Abogado, Paráclito, Konsoladó, Santifikadó.

Mishon di Spiritu Santu:

1. Spiritu Santu ta santifikadó: Pa Spiritu Santu logra kumpli ku su funkshon, nos mester entregá nos mes totalmente na djE i laga nos ser kondusí ku trankilidat pa medio di su inspirashonnan p’asina nos por perfekshoná nos mes i krese tur dia den santidat.
2. Spiritu Santu ta biba den nos: Den Huan 14, 16, nos ta topa siguiente frase: “Yo rogaré al Padre y les dará otro abogado que estará con ustedes para siempre”. Tambe, 1 Korintio 3, 16 ta bisa: “Boso no sa ku boso ta tèmpel di Dios i ku Spiritu di Dios ta biba den boso?”. Ta pa e rason aki nos mester respetá nos kurpa i nos alma. E ta den nos pa obra pasobra e ta “dunadó di bida” i e ta amor.
E akseptashon aki ta kondishoná na nos akseptashon i kolaborashon liber. Si nos entrega nos mes na su akshon amoroso i santifikadó, lo e hasi maravíanan den nos.
3. Spiritu Santu ta resa den nos: Nos mester di un gran silensio interior i di un profundo pobresa spiritual pa pidi Spiritu Santu resa den nos. Laga ku Dios resa den nos siendo dóciles na Spiritu. Dios ta intervení pa e bon di esnan ku ta stim’é.
4. Spiritu Santu ta hiba nos na e bèrdat pleno, e ta fortalesé nos p’asina ku nos por ta testigu di Señor, e ta mustra nos e rikesa maravíoso di e mensahe kristian, e ta yena nos ku amor, pas, goso, fe i di speransa kresiente.

Spiritu Santu i Iglesia:

Pa medio di fundashon di Iglesia riba dia di Pentekòster, Spiritu Santu ta esun ku ta konstruí, animá i santifiká, ta duna bida i unidat i ta enrikesé ku su donnan.
Spiritu Santu ta sigui traha den Iglesia na hopi manera distinto, inspirando, motivando i impulsando kristiannan, den forma individual òf komo Iglesia kompletu, ora e ta proklamá e Bon Notisia di Hesus.
Por ehèmpel, E por inspirá Papa pa duna un mensahe importante na humanidat; e ta inspirá e Obispu di un diósesis pa promové un apostolado; ets.

Spiritu Santu ta asistí espesialmente e representante di Kristu riba Tera, Papa, p’asina e guia Iglesia den forma rekto i kumpli su labor di wardadó di e rebaño di Hesukristu.
Spiritu Santu ta konstruí, santifiká i ta duna bida i unidat na Iglesia.
Spiritu Santu tin e poder pa animá i santifiká nos i logra den nos aktonan ku, pa nos mes, nos lo no a realisá. Esaki e ta hasi pa medio di su shete donnan.

E shete donnan di Spiritu santu:

E donnan aki ta regalo di Dios i únikamente ku nos esfuerso nos por laga nan krese o desaroyá. Nan mester di akshon di Spiritu Santu pa por atende ku nan.

1. SABIDURIA: Ta permití nos komprendé, eksperimentá i saboriá kosnan divino, pa por husga nan di forma rekto.
2. ENTENDIMENTO: pa medio di dje, nos inteligensia ta bira apto pa komprendé intuitivamente e bèrdatnan revelá i e natrualnan di akuerdo na e fin sobrenatural ku nan tin. E ta yuda nos komprendé e pakiko di kosnan ku Dios ta manda nos.
3. SIENSIA: Ta hasi nos inteligensia kapas pa husga di forma rekto e kosnan krea di akuerdo ku nan fin sobrenatural. E ta yuda nos pensa bon i pa komprendé kosnan di mundu ku fe.
4. KONSEHO: E ta permití ku e alma ta sinti ku rektitut loke e mester hasi den un sirkunstansia determiná. E ta yuda nos pa ser bon konsehero di otro, guiando nan riba e bon kaminda.
5. FORTALESA: E ta fortalesé e alma pa praktiká tur klase di birtut heroiko ku konfiansa invensibel pa superá mayor peliger òf difikultat ku por surgi. E ta yuda nos pa no kai den tentashon ku demoño ta presentá na nos.
6. PIEDAT: Ta un regalo ku Dios ta duna e alma pa yud’é stima Dios komo Tata i hende komo ruman, yudando i respetando nan.
7. TEMOR DI DIOS: Ta duna e alma humildat pa apartá su mes di piká dor di temor a disgustá Dios ku ta su bondat ku ta su bondat supremo E ta yuda nos pa respetá Dios, pa dun’é su lugá komo persona mas importante i bon di mundu, pa nunka bisa nada kontra di djE.

Orashon na Spiritu Santu

Bini Spiritu Santu, yena kurason di bo fielnan i sende den nan kandela di bo amor; manda Señor bo Spiritu Kreador i renobá kara di tera.
Oh Dios, ku tabata ke iluminá kurason di bo fielnan ku lus di Spiritu Santu, konsedé na nos ku, guiá pa e mesun Spiritu, nos obra den forma rekto i gosa di bo konsuelo pa medio di Hesukristu, nos Señor
Amèn.

Neokatechumenaat kampioen van Vaticaanstad

Hilversum (Van onze redactie) 25 mei 2009 - De priesterstudententen van het Romeinse seminarie Redemptoris Mater van het Neokatechumenaat hebben voor het tweede opeenvolgende jaar beslag gelegd op de Clericus Cup. Aan het door het Vaticaan georganiseerde voetbalkampioenschap nemen elftallen deel van seminaristen uit heel de wereld die in Rome studeren.


Serie A
Het elftal van het Neokatechumenaat versloeg in de finale eergisteren de North American Martyrs. Het enige doelpunt kwam op naam van centrale verdediger Davida Tisato die de priesteropleiding verkoos boven een aanbieding van Chievo Verona dat in de Italiaanse Serie A uitkomt.

Legionairs
Twee jaar geleden wonnen de seminaristen van Redemptoris Mater ook al de titel. Vorig jaar ging de Clericus Cup naar de Legionairs van Christus.


Vloekverbod
De spelregels in de Clericus Cup wijken op een paar punten af van het FIFA-reglement. Zo geldt er een vloekverbod en duurt een wedstrijd slechts één uur. Ook heeft de scheidsrechter meer strafmogelijkheden. Naast het uitdelen van een gele en een rode kaart, mag de arbiter een speler ook bestraffen met een blauwe kaart. In dat geval moet een voetballer voor vijf minuten het veld verlaten.

Bron: www.katholieknederland.nl

DI SHETE DJADUMINGU DI PASKU DI RESUREKSHON

Promé Lektura : Echonan 1, 15-17
Salmo : Salmo 103, 1-2. 11-12. 19-20ab.
Di dos Lektura : 1 Huan 4, 11-16
Evangelio : Huan 17, 11b-19

Ningun di nos a konosé Hesus. I ningun di nos a mira Dios. Pero nos tur ta manera e mucha ku yen di entusiasmo i imaginashon a kai sinta pa krea un pintura di Dios. Ora su mama a mir’é, ela bis’é: Kon bo ta bai na pinta Dios si ningun hende sa kon E ta? I e mucha, den tur su inosensia a kontesta: boso lo sa ora mi kaba mi pintura.
Ami, tambe a purba di pinta Hesus ku mi no a konosé i ku palabra e Dios ku mi a no mira: palabranan di Santa Skritura i mi palabranan. I algun hende lo por a bisa: kon mi por papia di un hende ku nunka mi a mira?
I mara ami tambe lo por a bisa ku inosensia di e mucha: boso lo sa ora mi kaba di papia; boso lo sa ora ku boso skucha proklamashon di e Palabra; boso lo sa ora ku boso kuminsá biba segun E Palabra; nan lo sa ora ku nan stima manera Dios ta stima.
Nos sa ku un hende ta e mihó futbolista, no pasobra prensa ta informá, sino pasobra e ta gana e weganan i ta hasi su trabou bon.
Nos sa ku Dios ta amor, no pasobra padernan ta bisa nos, sino pasobra Hesukristu a duna bida pa nos tur, pa esnan bon i esnan malu.
Nos sa ku Dios ta amor, no pa loke nos ta bisa òf manera nos ta pint’é, sino pa e bon ku nos ta hasi pa otronan.
Dios no ta un siñansa maravioso. Dios ta un bida simpel i entregá.
Nos ta potrèt di Dios i di Hesukristu ora nos ta stima. Nos ta embahadornan di Dios i di Hesukristu i nos tin ku representá nan bon, nos tin ku papia bon i nos tin ku hasi loke nan ta hasi, STIMA.
Hesus, den e evangelio di awe, ku ta su diskurso di despedida, ta hasi un orashon pa nos, su disipelnan, su siguidónan. Hesus ta resa pa nos.
"Hesus hisando su wowo na shelu i a bisa: Tata santu warda esnan ku Abo a duna mi, pa nan tur sea un. Awor mi ta bin bèk serka Bo. Mi no ta pidi pa bo kita nan for di riba mundu, pero si bo protehá nan kontra di malbadonan. Santifiká nan pa medio di bèrdat".
Esaki ta e orashon di Hesus pa nos. Ki diferente di nos orashon!
Nos ta resa i nos ta pidi kos strabagante, kos for di òrdu innesesario i tin bia skandaloso.
Hesus ta pidi su Tata santu union di su siguidónan. Union ta señal di amor; divorsio ta señal di falta di amor. .... "inkompatibilidat di karakter", forma fini pa bisa ku amor a kaba di bisa ku amor a kaba, ku nos no por soportá otro mas.
Dios no ta separá di su yunan. Su fieldat ta pa semper, i Hesus ta resa pa nos no separá ni de Dios ni di e rumannan.
Hesus ta kabes di e kurpa, di Iglesia, i nos mester ta uní kun’E pa medio di amor i uní na komunidat ku huntu nos ta forma.
Laga nos tur ta UN. Un den e Dios ku ta salba nos.

Tabatin dos hòmber ku a noufragá i landando, nan a alkansá un isla isolá. Un di nan tabata grita desesperá: aki nos lo bai muri, aki no tin awa ni lus, no tin nada.
E otro a bisé pa no tene miedu, konfia den mi. Mi ta gana shen mil dòler pa siman.. I di kiko bo dòlernan lo sirbi nos aki riba, e kompañero a bis’é.
No preokupá bo pasobra tur siman mi ta duna un désimo na mi iglesia i sigur, sigur, ku mi pastor lo haña mi.
Dios no ta pidi nos un désimo. Dios ta pidi nos shen por shentu di nos amor. I Dios no ke esaki únikamente p’E, E ke pa nos dun’é esaki na nos rumannan.’E union ku Hesus ta resa p’e ta union den amor , den e úniko Dios i Tata di nos tur.
Aki, den misa nos ta bin pa selebrá unidat di Hesus i den Hesus. Hopi i tur distinto, hopi i tur manchá ku e mesun pikánan, hopi pero tur mirando e mesun Señor, keriendo den e mesun Tata i guiá pa e mesun Spiritu.
Aki, nos ta biba alegria di orashon i don di la unidat. Aki nos tur ta sinti nos mes komo ruman. Pero Señor ke pa e unidat aki ta prolongá parti pafó.
"Mi no ta resa pa boso saka esakinan for di riba mundu, ma pa boso defendé nan kontra di e malbado".
Nos mundu chikí, yen di egoismo, droga, krímen divorsio, odio, soledat, fèrmidat… mester salba e mundu aki i riba e mundu aki nos ta yamá pa biba nos fe, duna speransa na tur hende i praktiká amor. I for di e mundu chikí aki, tin biaha difísil pa komprendé i pa akseptá, nos tin ku traha un brùg pa yega na un mundu mas grandi, mas limpi, mas puru ku mas fraternidat, e mundu di amor di Dios.
Nos ta biba, traha, sufri i muri riba nos mundu chikí, pero nos ta di e mundu di Hesus.
I mandá na mundu pa kontinuá e tarea ku Hesus a kuminsá:
• anunsiá e Dios amor.
• ser embahadornan di Dios.
• sana mundu.
• derotá e maligno.
• krea unidat entre hende.

In memoriam pader A. Engeln O.P.

Riba 12 di mei 1009, ocho dia promé ku su kumpleaños, pader Andre Engeln a fayese. E tabata un saserdote ku a dediká mayoria di su añanan na Antia, na parokia di Sagrado Kurason na Janwe.

Un saserdote ku kurashi, ku na komienso di su periodo den nos parokia, a organisá un elekshon ofisial ku yudansa di buzonnan di Kranshi, pa parokianonan eliji un konseko parokial. E kier a usa un sistema demokrátiko pa yega na representashon di tur grupo den e konseho menshoná. Esaki ta tipifiká su pensamentu durante hinter su periodo: loke e ta kere ta bon e tabata pone komo prioridat i bai p’e. Tin bes, manera sa sosodé ku tur hende, esaki tambe tabata un strobamentu den su funshonamentu, pasobra e ta parse e ora ei ku ta loke e tabata ke, mester a sosodé.
Pero ta su sentido grandi di responsabilidat tabata e motibu prinsipal, su sentido ku ta e tin ku guia su parokia na bienestar di un i tur. Ku disponibilidat i dedikashon ela organisá su trabou pastoral i duna kuenta i rason riba esaki tambe.

Ta konosi kon ela reorganisa santana na un manera adekuá, ku te ainda nos ta gosa di e sistema ku ela start kune. E misa su aspekto ela kambia, hasié mas moderno i bon tené. Su smak pa imágennan tabata di kalidat, esei ta konta tambe pa tur kambio ku ela trese, tur ta duna muestra ku ela pensa bon riba e produkto ku e mester ta duradero i di bon kalidat.

Banda di e parti material, ela duna atenshon na e aspekto sosial: bishita konsistente na hospital di tur enfermo di parokia, ela lanta Ayudo Sosial Janwe i sòru pa via di entrada di kolèkt, e fundashon risibí mensualmente un suma ku nan por yuda esnan den nesesidat. E fundashon ta eksistí te dia di awe.

Tur fiesta grandi e tabata prepará, pa tur kos bai manera e tabata deseá.

Awor su bida komo wardador a yega na su fin. Nos ta spera ku Dios lo rekompense pa tur loke ela duna di su bida na nos parokia i laga pader Engeln gosa di un sosiegu eterno bon meresí.

Ku e sosegá na pas!

Un parokiano di Janwe.

Erich van der Hoeven

DI SEIS DJADUMINGU DI PASKU DI RESUREKSHON

Promé Lektura : Echonan 10, 25-26. 34-35. 44-48
Salmo : Salmo 98, 1-4.
Di dos Lektura : 1Huan 4, 7-10
Evangelio : Huan 15, 9-17


Hesus ta papiando den konteksto di último sena i pa ta motibu su palabranan tin asta forsa mas fuerte. Pues su palabranan ta final òf nos lo por a bisa “testamentario.” E tabata sa ku su disipelnan lo a tarda pa komprendé loke tabata na punto di sosodé i ta p'esei e tabata ke yuda nan den tal proseso. Kiko lo tabata pasa den mente di e disipelnan? Hudas Iskariot tabata rabiá pasobra su maestro no tabata di akuerdo ku e esfera di poder (fariseo i saduseonan), por ta ku Pedro tabata pensando ku e tabata tin ku lucha pa salba su maestro di kualkier atake di su enemigunan; Huan lo tabata konfundí pasobra na tal momentu e no tabata komprendé Hesus; Hakobo i Andrés talbes pensando riba puesto ku nan lo tabatin si Hesus triunfá riba romanonan; i asina kada disipel tabata pensando segun tabata kumbiní nan. Pero Hesus tabata sa ku nada di esaki lo a pasa i ku E lo a keda krusifiká pa despues e resusitá pa medio di su Tata. Ta p'esei, pa Hesus lo mas importante tabata ku nan lo a sinti nan stimá, serka di djE: “Meskos ku Mi Tata ta stima Mi, asina Mi ta stima boso. Keda den mi amor.”

Hesus ta laga bon kla pa nan ku no ta poder ni violensia ta loke lo hiba nan na alegria berdadero. E ta buska algu mas sublime i trasendental, keda den amor di su Tata i kumpli ku su mandamentunan. Ta p'esei e ta pidi e disipelnan mesun kos.

Awendia nos ta topa ku hopi situashon ku lo por a ser resolvé ku muchu mas trankilidat si nos lo a komprendé i kere den palabra di Kristu. Ta tristu mira kon matrimonio ta keda destrosá pasobra un di e dosnan , òf tur dos no a komprendé ku amor ta bal mas ku plaka , fama òf plaser, i ku lo no por biba e amor ei si bo no ta rekonosé su fuente: Dios. Na tur e matrimonionan ei ku awendia tin tantu difikultat Hesus ta bisa nan: “Boso stima otro, manera Ami a stima boso”. Pero, kon nan por kumpli ku e mandamentu ei si nan keda na márgen di djÉ? Na tur e hóbennan ku no ta haña nan felisidat i ta buska huida den músika, den moda, alkohòl, droga, plaka o poder; awe Hesus ta reklamá nan su amistat i ta bisa nan: “mi no ta yama boso sirbidó sino amigu”, i “no ta boso ta esnan ku a skohe Mi, ta Ami ta esun ku a skohe boso i a destiná boso pa bai den fruta i boso fruta lo keda”. No laga nos tin miedu di ser yamá i stimá pa Hesus! Ta E ta fuente di nos felisidat, ta E ta esun ku a duna su bida pa nos; tur esnan ku ke hiba nos den kaminda di huida i plaser (hedonismo) nunka tabata dispuesto pa duna nan bida pa nos.

Laga nos aserká Hesus, laga nos biba stimá p’E, kumpliendo ku su mandamentunan, yen di legria pasobra nos sa ku nos ta stimá infinitamente pa Esun ku tabata ke duna su bida pa nos.

Ningun hende por duna loke e no tin. E siman aki Dios ta yama nos pa keda den su amor i duna fruta. Por lo tantu, dos akshon mashá konkreto ku ta duna e palabranan aki bida lo ta: aserká bo pa rekonsiliá ku Dios, si ainda no a hasié; i na di dos lugá duna testimonio di e amor ei ku ta risibí di Dios, stimando, pordonando òf skuchando esun ku pa hopi tempu no ta hasiendo.