Den tur pais di mundu awe ta hasi orashon pa mishonnan i misioneronan ku ta enkargá pa hiba e palabra di Dios na esnan ku no konosÉ òf na esnan ku a lubid’É. Ta dikon ta dediká e dia aki na mishonnan? Tin un djadumingu dediká na mishonnan pasobra tur hende mester di Dios pa por yega na shelu. Misioneronan tin komo tarea pa siña nos e Evangelio pa por alkansá bida eterno. Nan trabou ta di gran importansia. Misioneronan ta personanan ku ta bai na otro lugá pa papia ku hendenan tokante di Hesus, pa siña nan resa, pa bisa nan ku nos tur mester stima i yuda otro, pa anunsiá nan e bon notisia: ku Dios ta stima nos i E ke pa hendenan salba. Nan ta atendé leprosonan, hospitalnan, hogarnan pa wèrfano i ansiano, skolnan i universidatnan. Nan labor no ta fásil, nan ta topa ku hopi difikultat ku nan tin ku vense pa logra transmití palabra di Dios na otronan. Nan mester di nos yudansa spiritual, humano i material. Trabou di un misionero ta masha balioso. E promé tereno di mishon ta nos propio hogar, ku nos yunan i famia. Einan e kristian tin ku ta testigu di Hesus, e tin ku laga e bon aroma ei na Kristu. E mundu di trabou, ei kaminda ta realisá tur aktividat diario, sea den fábrika, den kunuku, riba karetera, den hogar, ei kaminda tin un kristian, lo tin un testimonio di un hende ku sa ku Hesus a resusitá, ku E ta sperando nos ku mannan habrí pa duna nos felisidat eterno. Finalmente, e kristian lo por buska e apostoladonan ku ta permití’é pa hiba e mensahe di Salbashon na mas persona, na mas yu di Dios. Kuantu hende di bo komunidat no konosé Hesus i no tin ningun hende ku ta bai hib’é pa konos’É ? Ei abo lo ta, komo misionero, yudando otronan p'asina nan deskubrí, topa, konosé i namorá di Señor. Vokashon na apostolado ta pa tur kristian. Nos no por keda ku mannan krusá ora ku tin tantu i tantu enemigu di Dios ku ta kana eifó, konfundiendo otronan. Tur kristian ta yamá pa vokashon na evangelisashon, na apostolado. Nos tur ta risibí e mandato divino di bai i prediká e Evangelio na tur kriatura. Apostolado tin ku ser inspirá dor di orashon, pues ningun hende por duna loke e no tin. Den apostolado, loke nos ta hiba pa otronan ta na e mesun Hesukristu. I, kon hib’É, kon papia kunÉ, kon invitá otronan pa nan konosÉ miéntras ami mes no konosÉ ? I bo ta konosé Señor den orashon, den e trato serkano i familiar. Tene kuidou ku esun ku ta papia hopi di Dios, pero no ta papia ku Dios. Awe, mas ku nunka, ta un nesesidat pa nos tur fiel kristian komprometé nos mes generosamente pa prediká e Evangelio n’e komunidat kaminda nos ta, pues tin hopi enemigu di Kristu i di su Iglesia ku ta buska moda pa destruyé. Nos no por keda sintá miéntras maldat ta krese riba mundu. Nos no por laga hinter tarea di evangelisashon den man di saserdote i katekísta. Nò. Ta korespondé na nos tur komo kristian pa kolaborá ku orashon i ku akshon den e apostolado.
- Hesukristu a duna nos su último mandato riba dia di Asenshon pa Shelu.
- E mandato aki tabata: "Bai i prediká e Evangelio na tur kriatura".
- Tur kristian tin dor di vokashon e tarea pa hiba e bon notisia na otronan.
- Laga nos kuminsá e apostolado den kas i na trabou. Despues nos ta bai mas ayá.
- Alma di tur apostolado ta orashon.
1 opmerking:
Eerste reactie
Een reactie posten