DI TRINTIUN DJADUMINGU SIKLO C

Promé Lektura : Sabiduria 11, 22-12, 2
Salmo : Salmo 145, 1-2. 8-11. 13cd-14
Di dos Lektura : 2Tesalónika 1, 11-2, 2
Evangelio : Lukas 19, 1-10


E enkuentro aki entre Hesus, Yu di Dios, i Zakeo, hòmber hudiu ku nan tabata konsiderá un pekadó pa motibu di su trabou komo kobradó di impuesto pa Roma, ta manera un ikono di e dinámika di salbashon ku Hesus a bin anunsiá. Un ikono parse un pintura, pero e ta muchu mas ku esei, e ta un orashon, un eksperensha, un palabra di salbashon. Asina, e enkuentro entre Hesus i un pekadó ta mas ku un anékdota di Hesus. Den dje nos ta deskubrí Dios ku ta sali na enkuentro di e hende ku ta pèrdí. Manera e wardadó ku ta rekohé e karné pèrdí ku goso, Hesus no ta pone kondishon pa hiba salbashon di Dios na kas di Zakeo. E ke keda serka dje, biba ku e pekadó i hiba presensia di Dios t’e den intimidat di su kas. Esaki ta duna nos un idea di e gratitut i universalidat di e “oferta di salbashon” ku Dios ta hasi na nos. Den mesun esena nos ta mira aseptashon di salbashon di parti di e pekadó. Zakeo ta renunsia fuente di su piká, e ta legumai su aktonan di inhustisia e ta kambia su kurason. Si promé e tabatin su kurason dirigí riba plaka, awor lo e tini’é riba su próhimo, pasobra el a eksperensia e amor inkondishonal i mizèrikòrdioso di Dios. E ora ei, nos por bisa ku e ikono aki ta transmití pa nos e gratitut di e amor di Dios i e nesesidat di kombershon di hende pa por biba e amor aki otorgá pa Dios.

Ta doloroso mira kon tantu kristian ta kana tristu den bida, sin speransa, pasobra nan ta kere ku Dios a bandoná nan. Talbes pasobra nan a kometé hopi piká, òf pasobra nan a biba momentunan difísil, nan ta pensa ku ya nan no ta “digno” di e amor di Dios. Sin embargo, despues di lesa e Evangelio aki nos por puntra nos mes: Ken ta pafó di e amor di Dios? E Evangelio ta bisa no ku ta ningun hende. Nos tur ta stimá pa Dios!

E djadumingu aki Hesus ta bisa nos: “awe mi ta bai biba den bo kas”. Asin’aki manera bo ta, sin kondishon, Hesus ke drenta t’e den intimidat di bo bida. Gratuitamente e ke yenabo ku su presensha i ku su amor. Pero, Kon Señor lo haña bo kas, òf kon e lo a haña bo bida, bo trabou?

Talbes abo tin ku kontesta manera Zakeo i renunsia e loke no ta laga bo gosa di e presensia di Hesus. Transformá bo aktitut na kas: skucha ku pasenshi, prekupá pa bo pareha den forma personal, pordoná bo mayor- òf bo yunan, pordoná bo mes, bira kara pa mira e otro. E otro ku mester di bo tempu, di bo espasio, di bo amistat òf di bo amor. Transformá tambe bo aktitut na trabou òf den bo bida personal: pone mentira un banda, korupshon, egoismo, inhustisia i envidia.

Salbashon ta sin kosto finansiero. Nos ta risibié ora nos eksperensiá di ta stimá inkondishonalmente pa Dios; pero pa por gosa di dje nos mester pone nos mes interiormente disponibel lagando un banda tur loke ta alehá nos di e ruman i di kreashon di Dios.

Laga e siman aki nos aseptá ku goso bishita di Hesus den nos bida. Laga nos dialogá kuné hinter siman. Talbes su presensia ta iluminá nos pa sa kiko ta e loke nos tin ku transformá den nos bida pa biba su amor ku mas plenitut, pero riba tur kos, laga nos siña kon gosa di su presensia den nos kas. For di e goso aki nos kombershon lo brota.