Karta di Atvènt 2007

"Lo yega un tempu”, Señor ta bisa, “ku Mi ta laga sosodé loke mi a primintí pueblo di Israel i di Huda” ( Jer 33:14).

Rumannan,

Riba Fiesta di Kristu Rei, 25 di novèmber 2007, nos a inisiá e Aña di Hubileo di Oro di nos Diósesis di Willemstad. Un Aña di Hubileo ku tin ku bira “un aña di grasia di Señor, un aña di pordon di pikánan i un aña di rekonsiliashon” (Tertio Millennio Adveniente, 14). Pasobra esensia di e aña spesial aki ta ankrá den historia di pueblo di Israel, un aña den kua tur debe tabata ser kanselá i tur hende por a kuminsá di nobo.

Pa prepará nos mes mas mihó posibel pa nos hubileo, den un enkuentro ku tur saserdote di nos Diósesis den siman di 22 di òktober último, nos a deliberá riba un programa prepará dor di un komishon spesial. Un enkuentro for di kua nos a sali ku un konsenso grandi i determinashon pa nos traha huntu pa hasi nos Aña di Hubileo di Oro un aña di grasia i bendishon di Dios riba tur isla di nos Diósesis.
Un aña di selebrashon di Dios su presensia den nos historia ku tin tres parti esensial, esta, pa rekordá e pasado ku gratitut, pa biba i partisipá den e aña aki di Hubileo ku entusiasmo i pa wak futuro ku hopi konfiansa.

Nos tin motibu grandi pa gradisí.
Komo katóliko nos a risibí un herensia di fe, speransa i amor, pasá pa nos dor di nos mayornan, nos saserdotenan, nos religiosonan, nos skolnan, nos gruponan religioso. Un tesoro ku nos na nos turno mester pasa pa futuro generashonnan.
E herensia ku nos a risibí tin su fundeshi den amor i bondat di Dios ku ta surpasá tur límite. Esaki ta hasi ku tur dia nos tin motibu pa gradisí i selebrá. Tur nos pensamentu i orashonnan di gratitut ta honra Dios i ta hasi nos digno di risibí mas bondat. Salmo 95 ta invitá nos: “Ban presentá su dilanti ku alabansa, kanta su gloria ku salmo i músika” (Sal 95, 2).

Den e Aña di Hubileo, nos ke reflekshoná riba pasado ku gratitut i yama Dios danki pa su grasia, su inspirashon, su bendishon ku El a yena nos kuné. Yamando danki nos ta rekonosé tambe e faltanan personal i komunitario ku a daña santidat di su Iglesia. Nos ta pidi humildemente pordon, pa nos risibí e grasia di rekonsiliashon ku Hubileo ta ofresé. Ya nos por drenta nos próksimo 50 aña spiritualmente mas determiná pa bira realmente disipel i misioneronan di Hesukristu, pa nos sigui den su pasonan. E ta urgí nos pa hasi esei ku su palabranan: “Ami ta Kaminda, Bèrdat i Bida” (Huan 14,6).
E reflekshon aki nos por hasié komo komunidat, bario, parokia, skol i individualmente.

Ma e lugá mas apropiá pa yama Dios danki i reflekshoná ta den nos famia, nos hogar.

Den Katisashi di Iglesia Katóliko nos por lesa ku “E famia kristian ta e lugá kaminda e yunan ta risibí e promé anunsio di fe. Pa e motibu aki kas di famia ku rason ta ser yamá: “Iglesia doméstiko”, un komunidat di grasia i di orashon, skol di birtutnan humano i di karidat kristian” (Katisashi di Iglesia Katóliko, 1666).

Famia ta e sentro kaminda, dor di amor, komprenshon i atenshon pa otro, e kuater tareanan importante ta haña nan realisashon:

1. den famia tin formashon di un komunidat di hende;
2. nos ta siña defendé i sirbi bida;
3. nos ta siña partisipá den desaroyo di sosiedat, i
4. famia ta siña nos partisipá den bida i mishon di Iglesia (Familiaris Consortio 17).

Papa Huan Pablo II a enfatisá, ku “tur miembro di famia, segun nan donnan, tin e grasia i responsabilidat di konstruí, dia pa dia, e komunion di hende, hasiendo di nan famia ‘un skol di humanidat’ mas profundo. Esaki ta sosodé ora tin kuido i amor pa esnan chikí, pa esnan malu, pa esnan mas grandi, i kaminda nos ta sirbi otro tur dia, nos ta kompartí biennan, alegria i tristesa” (FC 21).
Den e Dokumento final di Aparecida, Papa Benedicto XVI ta bisa ku famia ta ‘patrimonio di humanidat’, tesoro presioso di pueblonan di Amérika Latino i Karibe. Famia ta skol di fe, tereno ideal pa transmití e balornan humano i sivil, hogar kaminda bida humano ta nase i ta keda aseptá generosamente i responsablemente. Ningun otro instansia por sustituí famia den su kapasidat di krea serenidat personal i edukashon pa e yunan (Benedicto XVI, Diskurso di Apertura). “Famia kristian ta fundá riba sakramentu di matrimonio entre un hende hòmber i un hende muhé, signo di amor di Dios pa humanidat i di e entrega di Kristu pa Iglesia, su esposa” (Dokumentu di Aparecida 433). Sinembargo, aktualmente famianan ta sufri di situashonnan negativo debí na e sekularismo, relativismo étiko, migrashon i leinan sivil kontrali na matrimonio i ku ta menasá futuro di pueblonan di mundu.
.
Rumannan, kon nos por krea un komunidat salú, ora ku fundeshi di e komunidat aki no ta funshonando asina aki? Pa e motibu ei tambe, nos mester para kla pa yuda otro, yuda famianan den nesesidat pa nan por kumpli ku e eksigensianan fundamental di un famia. Esta un entrada pa por kubri gastunan primordial, un bibienda desente, un ambiente den bario ku ta salú, liber di droga, di mal influensia, liber di abuso di tur forma.
Un aspekto sigur pa reflekshoná riba dje den nos Aña di Hubileo ta: kon nos por yuda nos famianan kumpli mas i mas ku nan mishon di ‘iglesia doméstiko’, i ‘skol di humanidat’?.
[Kada parokia lo pone atenshon riba esaki, ora nos ta prepará pa Pasku di Nasementu i selebrá e fiesta di Santa Famia, djadumingu 30 di Dezèmber: e famia den kua Hesus a nase i krese bou di guia di Maria i Hosé].


Rumannan, laga nos drenta temporada di Atvènt ku un siguransa grandi: Dios nunka no ta kibra su promesa. Hesus a bini na mundu pa konfirmá e promesa aki: “Lo mi ta ku boso te na fin di tempu” (Mt 28, 20).
Ku e konfiansa grandi aki, mi ke gradisí Dios, nos Bon Tata un biaha mas, pa tur bondat ku El a yena nos Diósesis den e 50 aña ku nos tin tras di lomba. Nos ta gradisiÉ spesialmente pa e trabou inkansabel di mi antesesornan, mgr. Holterman i mgr. Ellis, pa tur saserdote, religioso i laikonan ku a sirbi nos Diósesis den e último 50 añanan.
Alabes, nos ta pidiÉ un bendishon spesial den e Aña di Hubileo aki, pa kada un di boso personalmente i pa boso famia. Ku Bon Dios por drama su grasia riba boso i laga Pasku di Nasementu lo ta en bèrdat un Fiesta di Lus pa nos tur.
Esaki nos ta pidiÉ bou di protekshon spesial di Mama Maria, Immaculata i Auksiliadora, Patrono di nos Diósesis.

Mi ta deseá boso un temporada di Atvènt yen di fervor i na final un bon Pasku di Nasementu!.

Boso sirbidó, den Hesus i Maria,

Mgr. Luis A Secco, SDB
Obispu di Willemstad