BOUTISMO DI SEÑOR

Promé Lektura : Isaiah 42:1-4, 6-7
Salmo : Salmo 29:1-4, 3, 9b-10
Di dos Lektura : Echonan 10, 34-38
Evangelio : Mateo 3, 3-17


Mateo ta konta nos di e enkuentro entre Huan Boutista i Hesus. Ta manera e enkuentro entre Tèstamènt Bieu i Tèstamènt Nobo, entre profetanan i e Mesias anunsiando. Ku Huan anunsio di binida di e Mesias ta terminá pasobra e ku Hesus e yegada aki a keda realisá. Hesus ta asumí t’e den delaster detaye su kondishon di hende i ta uni ku otronan pa kompartí su speransa, siendo ku E mes ta e realisashon dje speransa aki.

Ku e boutismo aki awanan lo no ta mas signo di purifikashon sino di bida, no mas speransa sino di realisashon. Hesus ta e Yu stimá, ku ta kompartí su boutismo, ta kompartí kuné su kondishon di Yu i e realisashon pleno di speransa di hende.
Komo kontesta riba e akshon di Hesus di asumí e boutismo di Huan, Dios Tata ta reakshoná ungiendo su Yu ku su Spiritu. E unkshon aki di Hesus, na semehansa di hendenan di Dios di Tèstamènt Bieu (rei, profeta i saserdote), ta señal dje mandamentu ku e Tata ta hasi na su Yu. Hesus, komo hende ungí pa medio di e Spiritu, ta mandá pa su tata pa biba komo Yu di Dios i proklamá e realisashon di salbashon. Di tal manera Hesus ta e sirbidó kua Dios Tata a yama, a tum’é na man, form’é i a hasi di dje aliansa di un pueblo, lus di nashonnan, pa e habri wowo di esnan siegu, pa saka esnan presu for di prizon i duna lugá di lus na esnan ku tabata biba den skuridat.
Skuchando e istoria aki di boutismo di Hesus, kon ku nos no ta keda sin mira hopi relashon ku nos propio eksperensia di boutismo. Por ta nos no ta kòrda di a mira shelu habri, mira un palomba bula baha òf a skucha bos di Dios dirigí na nos. Sinembargo, tur loke sosodé ku Hesus ta sosodé ku nos den nos boutismo. Laga nos no spera di mira manifestashonnan “kósmiko” den nos boutismo, pero si nos mester ta konsiente di ku ora nos partisipá na boutismo, nos ta risibí e mesun bida di Kristu, di su ser Yu di Dios, Lus di mundu i hende di Spiritu. Kada un di esnan batisá den nòmber di Tata, di Yu i di Spiritu Santu, ta yamá pa biba no ménos ku loke Hesus a biba den su eksperensia entre nos.
Laga nos kuminsá e aña aki kuestionando nos mes riba nos kompromiso di boutismo. Ningun hende tin buki ku historia di su bida, di moda ku kada un di nos tin ku siña skirbi nos propio istoria. Un istoria kaminda ta reflehá donnan ku nos a risibí , kaminda nos por biba komo yunan di Dios Tata, kaminda nos ta duna testimonio di e unkshon di e Spiritu ku nos a risibí.
Imaginá nos mes nos problema, nos difikultatnan: situashonnan ku ta molestiá nos, personanan ku nos no por pordoná òf komprondé, e bisio ku nos no por vense, e paso ku nos no ta disidí pa dal, e donnan ku nos tin bon wardá. Unda Dios ta den kada un dje situashonnan aki, kua ta boluntat di e Tata, manera Hesus ta bisa na nos ku nos tin ku aktua, i te na unda e Spiritu ta hiba nos?
Laga nos purba e siman aki pa biba komo Yunan di Dios, ku nos ta. Dios ta bisa nos tambe: “ABO ta mi yu stimá den kende mi ta alegrá “. Di bèrdat Dios ta sinti komplasensia di nos bida? Laga pa esaki ta nos propósito den e siman aki.