DI KUATER DJADUMINGU DI PASKU DI RESUREKSHON

Promé Lektura : Echonan 2,14a. 36-41
Salmo : Salmo 23, 1-6
Di dos Lektura : 1Pedro 2, 20b-25
Evangelio : Huan 10, 1-10


Pa por komprendé e pasashi aki mihó nos tin ku tuma nota di e personahenan ku ta intervení den dje. For di un prinsipio e fariseonan ta menshoná den e esena i lo mas sigur ta na nan i na restu di e dirigentenan religioso Hesus ta refiriendo ora el a menshoná e ladron ku no ta drenta dor di porta pa bai ku e karnénan. E karnénan lo ta tur esnan ku ta stimá pa Dios; tur hende ku ta buska pa sigui’E. E Wardadó lo ta Hesus, di kende ta Sali e bos ku ta hiba nos na kaminda di bida.
Awor si, e personahenan identifiká, nos lo por puntra nos mes: ta dikon Hesus ta yama e dirigentenan religioso ei ladron? E mesun evangelio ta kontestá: pasobra nan únikamente a buska pa hòrta, mata i destruí. Ke men ku nan a sinti nan mes “doño” di e rebaño i nan tabata ke bai ku nan p'asina nan sirbi nan interes mas ku buska na “skucha” bos di e berdadero Wardadó. Nan delitu ta konsistí antó den skohe otro kaminda, alehá di e kaminda fihá pa Dios, pa kana bai na felisidat di bida pleno.
Na otro banda nos tin e karnénan, di kua Hesus ta bisa ku “si nan skucha otro stèm ku no ta esun di nan wardadó, nan lo no siguié”, ke men ku nan no konosé bos di esnan ku pa nan ta straño. Esaki ta loke Hesus ta spera di su karnénan, maske ku no semper esaki ta sosodé den realidat.
Por último nos ta haña e bunita figura di e Wardadó. E imáhen aki no ta un invento di Hesus, tin un tradishon largu denter di e pueblo Israelita ku ta relashoná e akshon di Dios ku e Wardadó: profeta Ezekiel ta bisa (34,13.23) ““Manera un wardadó úniko lo mi sòru pa nan den e serunan i kantu di roinan di Israel, tur lugá kaminda tin hende ta biba den e pais”. I den 34,16 tambe e lo bisa: “Mi ta bai buska karnénan pèrdí , karnénan ku a pèrdè kaminda Mi ta trese nan bek, pa karnénan herida lo Mi mara ferbant i karnénan malu lo mi laga kohe forsa; pero esnan ku ta gordo i fuerte lo mi destruí”. I kon lubidá e bunita salmo 23: “Señor ta mi wardadó, pues mi no tin falta di nada...” Asina, Hesus identifikando su mes komo e Wardadó, e ta hasi tur e tradishon pastoral aki di dje ta mustra nos e solisitut, e ternura, e sensibilidat, i e mizèrikòrdia di Dios.

Buskando un aktualisashon di e imágennan aki nos lo por a mira den e ladron tur esnan ku ta presentá nos kaminda te na plenitut di manera ku ta yega na perdishon. Ke men tur esnan ku ta pretendé ku nos ta haña felisidat únikamente den plaser, den banidat, egoismo, individualismo, haraganería, i inkluso mustrando nos ideanan falsu di Dios. Nan ta stèm ku nos ta skucha ta bisa: kumpra esaki òf esaya i lo bo ta un hende total; bishitá tal òf kua lugá i lo bo ta felis; bisti tal òf kual prenda p'asina bo por presentá bo mes manera un berdadero dama; pensa riba bo mes i lubidá otro; no hòrta, no kometé adulterio i resa na Dios i esaki lo ta basta pa realisá bo mes komo ser humano; òf esnan ku ta pretendé na mustra nos Dios manera un energia, indiferente na historia di hende, impersonal, ku no ta afektá pa nos kondishon sino ku únikamente e ta duna nos e “forsa vital” ku ta mantené nos bibu. Tur esakinan ta stèm di e ladron ku ta pretendé drenta kouchi i desviá karnénan for di e kaminda di plenitut riba kua nos ta yamá.
Di otro banda tin e bos di Kristu, e bos di e Wardadó. Esaki nos ta haña den nos konsenshi; den esnan ku ta sufri pa motibu di inhustisia humano i ta sklama pa ser atendé; den situashonnan di guera, di hamber, i di miseria ku gritando ta laga nos mira ku nos ta riba mal kaminda i mas ku tur kos den Palabra di Dios ku ta tira lus riba kada un di e realidatnan aki i ta hala nos atenshon riba nos aktitut pa nos no keda indiferente dilanti tantu infelisidat i sufrimentu.
Por último nos tin e karnénan, di kua Hesus ta spera ku nan lo no skucha bos di esnan straño, pero ku den realidat pa hopi e “bos straño” ta esun di Hesus. Kuantu di nos ta aseptá ku interes grandi stèm ku konsumismo i individualismo ta proponé na nos na lugá di esun di Kristu! Kua ta e stèm Na kua nos oido ta afiná? Kua ta e stèm ku nos ta rekonosé ku mas fasilidat komo esun ku ta guia nos na felisidat? Nos ta e karnénan ku tin ku identifiká bos di nos Kreador i Tata, pero ta parse ku nos a lubidá tal zonido . I ta p'esei nos tin tendensha di sinti muchu mas felisidat ora nos entrega nos mes na plaser ku na servisio di otro.

Laga nos traha e siman un lista di e aktividatnan ku ta provoká mas sentido di realisashon, p'asina nos lo por duna nos mes kuenta kua bos ta mas importante pa nos. Si tin tempu meditá ku kapítulo 10 di evangelio di San Huan, ei ta haña hinter e diskurso di e Bon Wardadó.