DI TRES DJADUMINGU DI PASKU DI RESUREKSHON

Promé Lektura : Echonan 2, 14. 22-28
Salmo : Salmo 16, 1-2, 5. 7-11
Di dos Lektura : 1Pedro 1, 17-21
Evangelio : Lukas 24, 13-35


Dos disipel di Hesus ta kana riba kaminda. E biaha aki e kanamentu no ta kondusí na sanashon òf na enkuentro ku Hesus. Ta un kanamentu desorientá. Nan tabata sa ku nan tabata bai na su lugá di orígen pero ya sin speransa. E persona den kua tantu nan a kere a muri. Nan a mira kon a dera su kurpa; nan a biba e desánimo di nan kompañeronan; nan a sinti e sla di frakaso dilanti di opshon tumá un dia. No tabata straño ku nan tabata diskutiendo na kaminda.
E dos disipelnan ei ta representá hopi mion di persona ku tabatin kontakto ku Hesus, pero no ku Esun Resusitá, sino ku e Kristu di milagernan, e Kristu lider, esun di e entusiasmo di Djadumingu di Rama. Pero e amigunan aki no ta yega na komprondé ku e Hesus di e krus, esun ku ta risibí preguntanan desafiante durante e sufrimentu " No t’Abo ta Dios? Awèl baha for di e krus..." ; esun ku ta sangra i sufri, sea e Dios ei ku nan ta imaginá nan mes.. Na tal momentu den bista di mundu Hesus ta bira su pió tresedó di notisia.
Doló i sufrimentu ta haf kaminda ku ningun hende no ke yega n’e. Nos komo kristian no ta masokista ku ta disfrutá dilanti nos doló. Doló ta malu, pero e por ta motibu di salbashon. E amigunan di nos tabata riba kaminda yen di doló sin resurekshon.
E Palabra ta bisa ku nan tabata tristu. Hesus a bai kana huntu ku nan pero nan no a rekonosé. Doló pa motibu di frakaso no a tapa únikamente nan wowo sino tambe nan kurason. Nan tabata siegu di nan mes ya ku nan no tabata sa kon apsorbá frakaso di nan maestro.Nan tabata sinti nan mes kibrá paden pasobra tur kos a keda na palabra.
Nan ta konta Hesus e vershon di loke a sosodé, pero nan ta hasié sin speransa. Nan tabata warda pero nan espera tabata inútil. Awor nan ta bolbe mas desilushoná ku nunka. Palabranan di Hesus tabata animá nan pero su morto, silensio di palabra di e maestro a laga nan bashí.
Hesus ta kuminsá splika nan di nobo tur loke nan a bisa di djE den Skrituranan. Nan ta skucha pero ya sin konvikshon. Nan ta sigui riba kaminda.
Nan ta yega na e pueblo i Hesus ta hasi komosifuera e ta sigui su kaminda, pero nan ta kombid’é pa e keda. Nan ta sinta na mesa i Hesus ta bolbe tuma e pan i gradisiendo Dios, ta kibra e pan i duna nan. Skritura ta bisa ku na e momentu ei nan wowo a habri i nan a rekonosé Hesus, pero El a disparsé.
E delaster gesto ku Hesus tabatin ku su Apòstelnan tabata na e sena. Awor, despues di su resurekshon e ta bolbe hasi e gesto di kibramentu di pan, ku ta alimentá, ku ta salba, ku ta habri wowo di esun ku ta siegu.
Eukaristia ta e lugá di enkuentro ku Hesus. E ta laga nan mir’é entregando su mes di nobo, e biaha aki sin derame di sanger. El a parti pa ... i ku nan e pan i ta bindishoná Dios. I nan ta deskubrié...
Bida kristian lo ta semper mará entre Eukaristia, Krus i Resurekshon. Kada bia den bida di e siguidó di Kristu e tres momentunan aki lo ta presente.
Tin un pregunta ku nos amigunan no kreyente òf no masha kreyente tin kustumber di hasi na nos: Si Hesus a resusitá, unda E ta aworakí?
Hesus no ta den graf. E graf a keda bashí. Tampoko resurekshon ta nifiká bai bèk den pasado. E berdadero enkuentro ku Kristu awe ta den e Palabra, den Eukaristia i den e profeshon di fe.
Señor ta den e bida nobo ku a yega den transformashon di sufrimentu di e mundu aki. Topa kuné ta nifiká haña e kaminda di salbashon.
Hesus resusitá ta den Eukaristia. Eukaristia ta e lugá prinsipal di presensia di Kristu. Partisipá den Eukaristia ta nifiká tin un enkuentro personal ku Kristu resusitá.
Tambe esun resusitá ta presente kaminda hende ta sinti nan mes komo ruman di otro, kaminda kurason ta bati ku mesun ritmo Esun resusitá ta entre esnan mas débil i pober di sosiedat, esnan ku semper ta pèrdè. Hesus ku superashon di morto ta yuda nan rekuperá forsa pa e kaminda di bida, ilushon i alegria pa nan kurason, i mira ...... riba tur kos mira ku E ta semper huntu ku nan, na tur momentu riba kaminda di nan eksistensha.