DI BINTISEIS DJADUMINGU SIKLO A

Promé Lektura : Ezequiel 18, 25-28
Salmo : Salmo 25, 4-9
Di dos Lektura : Filipi 2, 1-11
Evangelio : Mateo 21, 28-32


Konteksto di e pasashi aki ta basta iluminante pa komprondé mihó e intenshon di Hesus ora e ta kont’é. Hesus ta den Herusalèm i Pasku tabata aserkando; E sa ku momentu a yega pa papia kla ku e doktornan di lei i fariseonan mas rebelde ku tabatin na Herusalèm. Promé ku e pasashi aki, ya Hesus a “limpia” Tèmpel di komersiantenan ku tabata praktiká inhustisia relashoná ku e ideologia i a kuestioná lidernan religioso tokante nan rechaso di Huan Boutista. Durante siguiente tres djadumingu nos lo lesa pasashinan ku kontenido mashá konkreto: saserdote-, doktornan di lei i fariseonan ku a faya ku kumplimentu i tabata rechasando “boluntat di Dios”. E djadumingu aki nos ta skucha e promé manera ku nan a rechasá e boluntat divino aki: nan inkoherensia entre nan palabra i obranan.

Ya Hesus a papia a yega di papia riba e tema aki den otro ambiente, por ehèmpel ora e ta bisa: “No tur hende ku ta yamami Señor, Señor lo drenta Reino di Shelu”; òf ora e ta bisa: “E pueblo aki ta honra mi ku boka pero no ku kurason”, òf ora e ta papia di e fariseonan bisando: “hasi loke nan ta bisa, pero no imitá nan akshonnan.”; ora e ta papia di e kas konstruí riba santu, òf e simia ku no a saka rais. Enfin, no ta e promé biaha ku Hesus ta papia di e nesesidat pa tin koherensia entre palabra i akshon. Pero sí ta promé bia ku den forma direkto Hesus ta kompará saserdotenan, doktornan di lei i fariseonan ku e kobradónan di impuesto i prostitutanan. Esta un kurashi di parti di Hesus! Tabata konsiderá e kobradónan di impuesto komo traidor di patria pasobra nan tabata traha pa e imperio Romano i e prostitutanan tabata kondená na morto si a denunsiá nan públikamente.

¿Dikon Hesus ta tribi hasi e komparashon aki? Hesus ta hasié pasobra E tin e realidat di reino masha kla: esnan ku ta pertenesé na e Reino ta esnan ku ta “HASI” boluntat di Dios. Ke men, no ta sufisiente pa ta di akuerdo ku Dios, no ta basta ku skucha su palabra òf pa ta serka di su presensia (den Tèmpel), mester SIGUI su pasonan, mester laga mira ku e BOLUNTAT ta influenshá pa medio di su palabra i su presensia. Laga nos kòrda e palabranan di Hesus: “dichoso esnan ku ta skucha palabra di Dios i ta poné den práktika”.


Kuantu biaha nos ta bisa ku boka, “mi ta kere den Dios” i den realidat nos akshonnan ta parse ku nos ta kere mas den plaka, fama, plaser o den poder? Por ta ku nos si ta kere den Hesus, inklusive si nos ta bai misa, i nos ta trata na kumpli ku e mandamentunan. Sinembargo, ora Dios pidi pa nos rekonosé i stim’é den realidatnan kontrali, nos ta nenga di hasié. Rekonosé presensia di Hesus den su Palabra, den misa, den sakramentunan, den kosnan bon ku ta sosodé ku nos, ta loke ku nos por hasi ku fasilidat. Sin embargo, rekonosé nan ora nos tin ku pordoná, ora ku tin mester di nos pasenshi, di nos mizèrikòrdia òf simplemente di nos komprenshon… esei sí ta parse nos algu mas ku imposibel.
E fariseonan si tabata por rekonosé Dios den tèmpel, i einan nan tabata bisa “SI” na Dios, pero ora Dios a pidi nan rekonos’é den Hesus, den esnan pober i den esnan malu … e ora ei nan no tabata ke rekonos’é.

Awe Hesus ta yama nos na un saminamentu di konsenshi riba nos forma di bida, riba rektitut di nos akshon ora nos bisa ku nos ta kere den Dios tata, den su Yu Hesukristu i den e Spiritu Santifikadó.
Ya Hesus a bisa nos djadumingu pasá ku no ta importá kuantu nos tarda pa kontestá, pero ku nos mester a pone nos kla pa traha den e kunuku di wendreif di su Tata si nos ke gosa di e Reino. Awe E ta laga bon kla pa nos ku no ta importá loke nos tabata kana hasi den tempu anterior, no tin piká, no tin situashon ku lo por alehá nos kompletamente di Dios; si tin arepentimentu, si tin kombershon di kurason, Dios ta risibí nos ku goso den su Reino.

Realisá e propósito ku bo a pone un banda pa tempu largu i ku bo sa ku ta importante; talbes un palabra di pordon; rekonsiliá ku un ser kerí; yuda un e persona ku a ku tin nesesidat ; òf talbes dediká un momento di dia na orashon pa rekonsiliá ku Dios si ta konsiderá esaki nesesario.