DI DIESTRES DJADUMINGU SIKLO B

Promé Lektura : Sabiduria 1, 13-15; 2, 23-24
Salmo : Salmo 30, 1 i 3. 4-5. 10-11. 12b
Di dos Lektura : 2Korintio 8, 7.9. 13-15
Evangelio : Marko 5, 21-43


E dos milagernan di Hesus ta aparesé denter di un seri di kuenta den kua e evangelista San Marko ke aksentuá e nesesidat di fe frente e poder i palabra di Hesus. Siman pasá nos a skucha Hesus pidiendo su disipelnan fe dilanti e tormenta ku a parse di lo a hundi nan; i e siman aki nos ta mira dos berdadero modelo di fe: e muhé ku tabata sangra i Jairo, hefe di snoa. Den tur dos milager ku awe nos ta skucha, Hesus ta rekonosé òf pidi nan fe den su persona p’asina E por aktua.

Ta kere ku e dos kuentanan aki ta siña nos elementonan mashá importante di nos relashon di fe ku Hesus. Promé, e kapasidat pa tin fe den Hesus no ta den relashon direkto ku nos “puresa” religioso; ke men, Jairo, komo hefe di snoa, talbes por a pensa ku Hesus mester a bai kuné pasobra e tabata un hudiu prominente ku tabata biba mashá envolví ku leinan religioso. Pero kua tabata su sorpresa ku tin un muhé, konsiderá komo impuro pa motibu di su fèrmidat, tambe Hesus ta kura. Esaki ta mustra nos ku kualke hende por akudí na Hesus, no ta importá nos kondishon anterior na momentu di kontra ku Kristu. Na di dos lugá, fe ta surgi di un enkuentro personal ku Hesus; den tur dos kaso, esun ku tabata bludu i Jairo tin un diálogo profundo ku Hesus i esaki ta loke ta transformá nan internamente. Di tres, e salbashon ku fe den Hesus ta trese pa nos ta bai mas ayá di un salbashon físiko; salbashon di e dos personanan ei , a sosodé ora nan a kere den Hesus, ora nan no a duda den e poder i forsa di Kristu i asina nan por a drenta den e mundu maravioso di e Reino di Dios.

Awendia nos ta biba un krísis di fe. Hende ta konsentrá riba su mes i ta kere ku e por splika hinter mundu ku ta rondó di dje for di su mes persona. Ku regularidat nos ta skucha hende ku ta bisa di biba mihó sin “asina tantu ideanan religioso”; ku ke topa ku un Dios ku ta skucha nan ora ku nan ke pero ku no ta komprometé nan mes na nada. I mayoria be esnan ku ta pensa asina no ta mal hende, inklusive nos ta topa nan de bes en kuando den misa, pasobra “a duna nan un gana di bai misa riba tal dia!” Pero tin fe, no ta únikamente kere ku Dios ta eksistí, e fe ei hasta demoño tin’e , pasobra E ta esun mas konsiente di esaki! Tin fe ta nifiká topa ku un persona, ku kende nos ta komprometé nos mes i ku nos ta yuda; ta nifiká laga e persona aki ku ta Hesus transformá nos bida ; ta permití’é kambia nos kustumber-, nos pasatempu, nos forma di bisti i nos manera di trata otro hende.. Tin fe den Kristu ta nifiká permitiÉ kura nos “heridanan” p’asina ku nos por sirbi manera E ta pidi nos; ta skuch’É i laga ku e palabra ei ta transformá nos, asina manera e mucha chikí ku a muri i ku palabra di Kristu a transform’é.

Ban purba di tin fe den Kristu. E ta primintí nos salbashon, pero no un salbashon terenal, sino salbashon eterno. Ta p’esei, ora nos ta kere den djE no ta únikamente pa E kura nos di tal òf kual fèrmidat, sino pa e kura nos interiormente pa di tal forma nos por rekonosé su plan den e bida ku a toka nos di biba. Laga nos aserká Hesus, laga nos mishi ku su Kurpa i su Sanger, laga nos skucha su palabra ku ta duna bida i laga nos sigui konstruí e Reino ei ku E a bini pa inougurá.

E siman aki, laga nos trata pa “duna bida”na un hende: ku nos tempu, nos pordon, ku nos solidaridat. Laga nos trata di duna testimonio ku Kristu, den kende nos ta kere i nos ta karga paden di nos, ku ta transformá den bida tur loke e toka.