DI BINTIDOS DJADUMINGU SIKLO B

Promé Lektura : Deuterenomio 4, 1-2. 6-8
Salmo : Salmo 15, 2-3a. 3cd-4ab. 5.
Di dos Lektura : Hakobo 1, 17-18. 21b-22. 27
Evangelio : Marko 7, 1-8. 14-15. 21-23.


Nos komo ser humano pa kualke aktividat di bida mester di un seri di guia òf norma pa yega na un resultado eksakto.. Nos tin norma de tráfiko, akadémiko, legal, médiko... pero tambe nos tin normanan religioso...
E Evangelio di awe ta un poko delikado pasobra e ta move entre e ideal ku Dios ta proponé na nos i e delikadesa humano ku hopi biaha nos no ta yega na alkansá.
Bo tin FE asina grandi den Señor ku e fe aki realmente por transformá bo bida? Kiko pa Hesus puresa ta nifiká?
Fe den esun ku a resusitá ku a transformá bida di miónes di ser humano a lo largu di istoria, ... Abo tin forsa den bo interior para kambia esun di bo? Kon, di ki manera?
Un bia mas, Hesus ta enfrentá e kustumbernan robes di e antepasadonan. E no ta mete kontra lei di Moises, sino kontra e normanan ku hende a imponé i ku tabata purba tin e supremacía riba dje. Dios ke e parti paden di e ser humano. Loke ta konta no ta únikamente loke bo ta hasi sino e rais interior ku ta produsí e bon fruta .
Maestronan di lei den transkurso di siglonan a krea míles di norma di tipo práktiko ku a kubri tur e momentonan di bida humano. Bida di e kreyente hudiu tabata limitá pa míles di presepto ku na lugá di aserká Dios, e loke nan tabata hasi tabata keda mas na aparensia.
Laba man promé ku kome den époka di Hesus no tabatin e sentido higiéniko, sino di limpiesa seremonial. Promé ku kada kuminda, i entre e diferente platonan, tabatin ku laba man i den sierto forma konkreto. Keda sin hasi e ritual aki den wowo di hudiunan di e époka, tabata impuro den wowo di Dios. Hesus en kambio no a duna ningun importansia na tur e reglanan aki. E huristanan awe lo bisa: E ora ei Hesus tabata un anarkista...? Por supuesto ku no. Loke Señor tabata purba ta pa nos sernan humano no keda den lo meramente eksterno p'asina otronan mira nos. E reto ku E ta proponé nos proponé ta ku rais di nos aktonan ta fundá den un kurason ku ta bon i yen di amor ta produsí frutanan di bondat.
E fariseonan di e époka tabata kere ku dor di kumpli ku tan amplio katálogo di normanan, maske nan kurason i nan pensamentu tabata na e otro banda, ya nan tabata mihó ku sobra. Legalismo tin na kuenta akshonnan eksterno di un persona, pero no su sentimentunan interior. Hende por kere ku na ta sirbiendo Dios de kosnan eksterno, i sin embargo desobedesiéndo e den esnan interno. Esaki ta hipokresia.
E ta un eror ora identifiká bondat di personanan ora nan realisá sierto aktonan ku nan ta konsiderá religioso. Bai Misa, lesa beibel, duna limosna i inkluso resa, riba su mes no ta laga ningun hende bira bon hende. Ta den interior, den loke nos ta denominá "e kurason", kaminda e berdadero bondat ta biba. Hesus ta bisa nos ku nos aktonan tin ku prosedé di un bon kurason. E kuestion fundamental ta kon e kurason di personanan den relashon ku Dios i ku nan semehante ta.
Kosnan no por ta limpi òf sushi den un sentido religioso, únikamente hende por ta, i loke ta kontaminá un persona ta su propio akshonnan ku ta produkto di su propio kurason.
Kua ta e akshonnan ku ta sali di un kurason impuro?

Mal pensamentu. Kualkier piká eksterno ta prosedé di un desishon interior.
Deseonan seksual no kontrolá. Deseá e otro den bo kurason ya ta duna kontenido na piká ku ta rondoná nos, pues e ta kita di e kurason, di e sentro di nos bida na Dios pa pone na un ser humano.
Ladronisia. Esun ku ta planifiká un delito ta tambe promé ku un akto material, un intenshon ku ta fragua den nos interior.
Asesinato. Kita bida di un hende ta sera kurason pa e otro.
Adulterio. Bo ta traisioná e palabra ku bo a duna di kurason. Únikamente deseá e otro den bo kurason ya ta adulterio.
Kudishi ta e fuerte nesesidat di tin loke ta pertenesé na otro. Kudishi di poder, di sèn; e ta buska felisidat den kosnan na lugá di busk'é den Dios.
Maldat. Ta e persona ku den su kurason e tin e deseo di daña otronan. E malu siendo malu den bo mes, ta hasi otronan malu manera e.
Engaño. No bisa e bèrdat ni biba den bèrdat intencionadamente aparentando bondat.
Bisio. Ta maldat desbordada. E ta e persona ku a pèrdè tur sentido di bèrgwensa i desensia. Un hende ku ta malu por skonde su piká, pero esun ku ta bisisoso ta peka sin remordimentu i no ta basilá pa skandalisá su semehante.
Envidia. Bira tristu pa e alegria di e otro.
Redu. Insulto na personanan i blasfemia kontra Dios.
Orguyo. E persona ta sinti despresio pa tur loke no ta di dje mes. E aktitut aki por ta skondí kasi hinter bida den kurason di esun ku ta sufri esaki.
Falta di huisio. Ta referí na lokura moral. E ta esun ku hunga ròl di kèns pa Sali ku esun di dje.

Bon reportorio di maldatnan ku Hesus ta indiká na nos ku klaridat p'asina e no haña nos sin ta prepará.
Un kristian por ta kualkier kos: un ladron, asesino, orguyoso, inmoral òf adúltero, pero nunka lo e ta orguyoso di ta esaki, semper e lo lucha banda di Señor pa superá tantu infelisidat. E ser humano ku ta malu lo hasi meskos, pero e lo hasié ku orguyo i sin nesesidat di liberashon ku ta trese pa nos un bida ku ta topa ku e Bondat supremo. Na esaki nos ta yamá; na ser kreashon nobo.