DI TRINTIDOS DJADUMINGU SIKLO C

Promé Lektura : 2Makabeonan 1-2. 9-14
Salmo : Salmo 17, 1, 5-6.8. 15
Di dos Lektura : 2Tesalónika 2, 16-3, 5
Evangelio : Lukas 20, 27-38

Den e promé lektura nos ta lesa e teksto di Makabeo den kua shete ruman ta pèrdè nan bida pasobra nan no a kome karni di porko. Nos lo por puntra nos mes: Kon ta pusibel ku lei ta bal mas ku bida humano ? Pa komprondé morto pa kumpli ku Lei, nos tin ku bai mas ayá di loke tin skirbí. Lei no ta únikamente un kombinashon di norma, sino fruta di un aliansa, di un pakto entre Dios i hende; kaminda Dios ta komprometé su mes pa kana ku hende i pa e hende biba segun boluntat di e Dios ei ku ta kana kuné. Asina, e shete rumannan ta kombensí ku e Dios den kende nan ta kere ta e Dios di bida ku no por ser vensí pa medio di morto ku hende ta proboká. Di tal manera ku e hóbennan no a muri pa un lei, sino pa speransa den un bida mas pleno komo fruta di nan fieldat na e aliansa ku Dios: “abo lo ta mi pueblo, Ami lo ta boso Dios”.Na promé momento e Evangelio ta parse, ku resurekshon ta e tema ku ta hasi e saduseonan ku ta aserka Hesus intrankil. Sinembargo, mas dilanti nos ta duna nos mes kuenta ku loke ta interesá nan ta pon’é den konflikto, mas ku skucha e solushon pa nan inkietut di resurekshon. Ta p'esei Hesus, ta preokupá mas pa pasa e mensahe berdadero di Resurekshon: Dios ta un Dios di hende bibu i no di morto; mas ku reakshoná riba nan intriga akadémiko. E Evangelio di awe ke presentá na nos un di e aktitutnan fundamental di Hesus: Kere den resurekshon no manera idea òf konsepto, sino komo un realidat ku ta transformá nos ora ku aseptá presensia bibu di Dios den historia di humanidat. Testimonio sublime di e palabranan ku Hesus ta bisa nos awe nos lo mira riba e krus: ta for di su konfrontashon ku morto ku Hesus ta grita nos, “Dios ta Dios di esnan bibu i no di morto, maske boso matami, lo mi biba pa semper kun’E”.
Hopi biaha nos ta pensa den resurekshon komo algu ku lo pasa ku nos hopi tempu despues ku nos muri. Komosifuera resurekshon lo ta únikamente un momento den nos bida riba kua nos tin ku warda pasivamente pa e sosodé ku nos. Sinembargo, awe nos ta mira ku kere den resurekshon no ta únikamente un kestion akadémiko. Kere den dje ta nifiká transformá nos bida den testimonio di Dios di bida den kende nos ta kere. Awendia nos ta pensa kasi semper for di plaser i loke ta di inmediato. Pa nos no ta eksistí un Dios di nos mayornan, sino ku nos ke un Dios ku ta resolvé nos problemanan awe i awor, na e momento aki”. Nos ta lubidá ku e bida ku Dios a duna nos ta un bida eterno. Un bida ku ta bai muchu mas ayá di e poko añanan ku nos ta biba aki riba tera. Esaki ta provoká den nos ku nos no por mira mas ayá di nos problemanan. Mundu ta bin abou riba nos, pasobra nos no tin e perspektiva di resurekshon den nos bida. Nos ta pèrdè tur speransa i nos ta biba manera nos no ta kere den e Dios di bida ku Hesus a revelá na nos .
Laga pa e siman aki nos lo por trata pa biba ku un vishon mas “sobrenatural” den nos bida.Nunka nos tin ku lubidá nos problemanan, pasobra nan so lo no resolvé nan mes , pero SI nos lo por asumí nan ku e konfiansa di ku TA eksistí un Dios di bida ku ta papia di nan tur manera Ela papia riba e krus di su Yu.