Selebrashon Hubileo di Oro di Obispado Willemstad

E motibu di e informe aki ta na promé lugá, partisipá na tur fiel katóliko di e selebrashonnan relashoná ku nos fiesta di hubileo i na di dos lugá ekstendé un invitashon kordial na tur fiel pa partisipá masal na tur e eventonan di hubileo.

Nos komunidat Katóliko Antiano i Arubano ta para na apertura di e gran selebrashon di “Aña di Hubileo di Oro” di nos Obispado. Ku un konfiansa i speransa grandi nos ta drenta e aña aki di selebrashon di nos hubileo di oro ku pa nos lo ta un gran oportunidat pa:

• kòrda pasado ku gratitut;
• biba den presente ku entusiasmo
• wak futuro ku hopi konfiansa.
  

Monseigneur Luis Secco, Obispu di Willemstad, na okashon di e grandi aki a forma un komishon, Komishon Sentral Hubileo di Oro, ku ta konsistí di saserdote, religioso i laikonan bou di guia di obispu mes, pa organisá i kordiná e selebrashon i aktividatnan relashoná ku e hubileo. A forma tambe diferente Sup-komishon, entre otro “Sup-komishon Eventonan Religioso i Kultural” enkargá ku organisashon di e diferente aktividatnan ku a keda akordá den e komishon sentral

Mirando e importansha di e selebrashon di 50 aña di Obispado dia 28 di aprel 2008, Mons. Luis Secco, a stipulá e periodo ku ta kuminsá ku e fiesta di Kristu Rei, 2007 i ta terminá ku e fiesta di Kristu Rei, 2008 komo “AÑA DI HUBILEO DI ORO” di obispado di Willemstad.

E selebrashon di oro lo tin tres etapa kulminante:

1. Apertura 25 di novèmber 2007 riba Fiesta di Kristu Rei;
2. Selebrashon ku Misa Solèm di Hubileo dia 27 di aprel 2008
3. Klousura di e aña hubileo djadumingu 30 di novèmber 2008 riba Fiesta di Kristu Rei.

Ku mira riba e importansha grandi di e fiesta aki, lo selebrá riba tur e seis islanan e apertura di aña hubileo di oro di obispado riba e mes un dia. E klousura tambe lo keda selebrá riba tur isla riba e mes un dia. E selebrashon solèm di Hubileo dia 27 di Aprel 2008 lo ta aki na Kòrsou, ku entre otro invitadonan di islanan di Karibe

Pa kompaña e fiesta di 50 aña Obispado a skohe e lema: Seis Isla Ruman, Un den Kristu.

Na Kòrsou lo kuminsá ku e selebrashon di apertura ku un momento di “40 ORA DI ADORASHON” kontinuo, djaweps 22 di novèmber próksimo i ta klousur’é djasabra 24 di novèmber komo preparashon pa e fiesta di hubileo.

Djadumingu 25 di novèmber atardi pa anochi lo tin e grandioso selebrashon di apertura mes ku ta kuminsá ku un manifestashon religioso den kayanan di Brievengat, sigui pa un Santo Sakrifisio di Misa Pontifikal den Sentro Deportivo Kòrsou. E manifestashon religioso lo sali kuat’or di atardi for di plenchi di misa di Brievengat.

Ku e pensamentu aki di unidat na mente, nos ke konta ku tur nos fielnan i nos pueblo kompleto na e selebrashon aki di apertura.

Pa e okashon aki lo no tin misa djadumingu despues di 12 or di mèrdia na ningun misa di nos obispado. Lo tin misa solamente parti mainta promé ku diesdos or, duna entre otro personanan di edat grandi o ku no por asistí na e selebrashon di apertura tòg e oportunidat pa por kumpli ku nan misa di djadumingu. E intenshon ta si, pa tur sobra fielnan akudí i partisipá na un manera masal na e selebrashon di apertura dia 25 próksimo. Ta konta ku un asistensha hopi grandi na e selebrashon di apertura.

Pa logra esaki, e komishonnan di hubileo lo invitá e dianan aki representantenan di parokia, gruponan apostóliko i pastoral pa un reunion di informashon. E ophetivo prinsipal di e reunion aki ta pa informá , motivá nos fielnan, parokianan i gruponan apostóliko, pa partisipá aktivamente den e selebrashonnan di e hubileo. Ta di e forma aki nos por garantisá un partisipashon grandi di fielnan durante hinter e fiesta di hubileo.

Despues di e fiesta di Apertura lo sigui mas informashon pa tene tur fiel informá di e diferente evento i aktividatnan ku lo bai tuma lugá den e aña di hubileo di oro.

Na e momento aki, nos ke finalisá ripitiendo nos kaloroso invitashon na abo, bo famia, amigunan i konosínan pa huntu nos tur ban selebrá i yama danki pa e 50 aña di eksistensha di nos Obispado, dia 25 di Novèmber próksimo den SDK.