TRIUNFO DI SANTA KRUS

Promé Lektura : Numbernan 21, 4b-9
Salmo : Salmo 78, 1-2. 34-38
Di dos Lektura : Filipi 2, 6-11
Evangelio : Huan 3, 13-17

Awe nos ta interumpí lekturanan pertenesiente na djadumingunan komun, ya ku nos ta selebrá fiesta di Exaltación di Santa krus, fiesta antiguo ku e aña aki ta kai riba djadumingu. Di esaki ku e tekstonan ku nos a lesa ta ofresé nos un posibilidat pa kontemplá loke e krus di Hesukristu ta nifiká. I maske e tempu mas apropiá pa e kontemplashon aki ta den Kuaresma i Pasku di resurekshon, i spesial selebrashon di Bièrnè Santu ( tur esaki den lus di e krus glorioso) nos ta kere ku pa kualke kristian ta di probecho pa rekordá sentido di e krus. No ta pòrnada e ta signo ku ta presidí nos reunionnan; señal ku for di chikí a siña nos hasi komo distinshon i resúmen di nos fe; e signo ku lo ta presente na lugá di nos entiero, komo afirmashon di fe den resurekshon.

E KRUS, KAMINDA DI KADA DIA. Loke nos a kaba di rekordá por yuda nos pa fiha nos reflekshon: kiko e presensia konstante di e signo di e krus ta representá den bida di e kristian?. Lo e no ke bisa ku realidat di e krus tambe mester ta semper presente? Presente no únikamente komo rekuerdo òf manera un distinshon konvenshonal, por ehèmpel, e krus manera un prenda ku ta dòrna manera par renchi lo por hasié, ni tampoko komo sifuera un posibilidat di desgrasia ku semper ta menasa nos. –esun ku ta ekspresá frase popular bisando: "Dios a manda un bon krus p’e"-, sino e krus komo kaminda.

ESAKI ta loke p’E e krus a nifiká. No un final di desgrasia òf inesperá, sino e kulminashon di su kaminda. No tin kibramentu entre loke el a hasi promé i su krus. Hesukristu a yega na e krus presisamente pasobra tabata e lugá ku lo a hib’é na loke El a bisa i a hasi. E krus - e inkomprenshon, e persekushon, e oposishon - Hesukristu a haña esaki for di promé momentu, pero e no a desviá en apsoluto di su kaminda. Hesukristu no a skohe e krus, pero tampoko ela apartá di su kaminda maske esaki tabata hib’é na e krus. Pa bisa kla ta un problema di fidelidat , pa su lucha pa hustisia, pa su entrega na esnan marginá i despresiá, pa su kombatimentu di tur loke ta malu, tur trampa. Tur esaki –nos sa bon- ta nifiká krus pa kada dia.
E KRUS KAMINDA DI BIDA. Presentashon ku e lekturanan di awe ta hasi na nos di e krus, ta koinsidí den aksentuashon di su aspekto salbadó. Nan no tabata papia ku nos di e krus komo algu malu -maske lo ta inevitabel- sino di e krus komo algu bon. I no pa masokismo di buska sufrimentu pa medio di sufrimentu, sino pa medio di fe: e kristian ta partisipá den konvikshon di Hesukristu i e konvikshon di Hesukristu ta ku su kaminda di krus ta kaminda di Bida. Aki ta sinta base di e asuntu.
Krus no ta kondená; krus ta salba. Ta loke nos a skucha den e evangelio: "Dios no a manda su Yu na mundu pa kondená mundu, sino pa mundu ser salba pa medio di djE". Si nos kristianismo ta komprondé i tin bia ta papia di
krus komo algu malu, un kastigu, un desgrasia, lo no ta pasobra el a komprendé tiki di loke ta e Bon Notisia di Hesukristu? Aki e skandal ta i ta p’esei e fe kristian ta fe (Ke men, algu ku nunka lo por keda demostrá): pasobra nos ta kere ku un kaminda di krus por ta kaminda di bida.

Kòrta e Kaminda na e Krus i nenga ku e ta kaminda di bida, ta nifiká traishoná Hesukristu. Ta kombertí su Bon Notisia den Notisia Tristu.

KON? E krus, kaminda di kada dia. E krus, kaminda di bida, pero mi ta imaginá mi ku lo bo puntra: bon, tur esaki, kiko e ta nifiká den realidat? Ke men ku mester buska sufrimentu komo sifuera ta algu bon? No ta trata di esaki. Di loke ta trata ta di sigui Hesukristu, di purba biba manera E lo a biba (evidentemente, den nos sirkunstansianan, den nos realidat konkreto). Skohe un kaminda ku awor ta konsekuente ku loke E a siña nos: un kaminda ku por ehèmpel, ta sirbi bèrdat i no mentira, sirbi amor generoso i no egoismo insolidario, hustisia di kada dia i di no probechá di esnan debil, etc.., etc., etc.

I ku esaki ta basta. Si nos hasi esaki, ningun di nos lo mester buska e krus: lo hañ’é sin busk’é. Kada dia. Pero lo hañ’é manera Hesukristu: manera un kaminda di bida, un kaminda ku lo duna fruta.

Awor, ku basta aktividat personal i komunitario ta bolbe rekohé tareanan , duna e kurso nobo kara. ta bon di tin tur esaki presente. Ta nesesario skohe bon e kaminda i sa adelantá si ku esun di Hesus lo ta difísil. E kristian no ta buska sufrimentu, pero no por hui pa difikultat. E no por ta miedoso ni fofo ni kansa pasobra tin opstákulo ku e mester superá. Kaminda di bida ta kaminda di krus. No ta esaki -rumannan- loke nos ta selebrá kada djadumingu den Eukaristia?