DI DOS DJADUMINGU DI KUARESMA SIKLO B

Promé Lektura : Génesis 1-2. 9a 10-13. 15-18
Salmo : 116, 10. 15-19
Di dos Lektura : Romanonan 8, 31b-34
Evangelio : Marko 9, 2-10

Siman pasá e Evangelio a introdusí nos riba un kaminda di kombershon guiá pa e Spiritu; di esaki kuaresma lo trata. Ta p'esei , riba e djadumingu aki Señor ta mustra nos fundamentu di nos identidat: den Kristu, nos tur ta Yunan di Dios. Únikamente saliendo for di tal base nos lo por komprondé kiko ta loke nos mester transformá. Laga nos skucha kon e Evangelio ta iluminá nos riba e djadumingu aki.
Pa por komprondé e Transfigurashon, nos mester tuma na kuenta e anunsio ku Hesus a kaba di hasi relashoná ku su próksimo pashon, morto i resurekshon na Herúsalèm. E disipelnan no a komprondé kiko Hesus tabata ke bisa ku e palabranan ei, pues den realidat Hesus lo a bisa Pedro: “Bai for di mi Satanas” ora ku esaki kier a persuadi’E pa no bai Herusalèm pa e muri. Por lo tantu, den un promé mensahe, e transfigurashon lo ta un konfirmashon na e apòstelnan di e bida divino i e Gloria di kua Hesus ta duna testimonio ku su bida. Esaki ta a bida dibino i lus grandi ku tabata brota for di Hesus su interior , loke lo mester a manifestá su mes despues di su morto, den su resurekshon.
Dilanti di tal eksperensia , Pedro a kontesta: “Laga nos traha tres tènt”. Maske lo a parse infantil, ta komprendibel e aktitut di Pedro, pasobra ora hende ta biba presensia di e bida di grasia asina profundo, e no ke hasi otro kos sino di keda einan. Por ta ku e mesun kos a sosodé ku hopi di nos, ora nos ta haña un ambiente agradabel, di pas, di armonia , kaminda fe ta vense miedu i karidat ta vense egoismo, hende lo tabata ke keda einan pa semper. Ta p'esei nos ta komprondé e aktitut aki di Pedro. Pero e eksperensia no a kaba einan, Dios tabatin ku hasi un anunsio: “Esaki ta mi Yu stimá, skuch’é”. Esaki ta e di dos mensahe di e Transfigurashon: konfirmá Hesus komo Yu di Dios. Presensia di Moises (símbolo di Lei) i Elias (símbolo di profetanan), no ta sino konfirmashon di e plenitut ku Hesus a bin pa trese tantu den sentido di Lei, komo anunsio di profetanan.

Laga nos puntra nos mes esaki: di unda e lus briante aki ku a rondoná Hesus ta brota? Di su interior, di su bida di grasia, pasobra e ta Yu di Dios. Por lo tantu, riba e kaminda aki di kombershon riba kua nos ta bai kanando, nos tin ku buska prinsipalmente si nos ta kere ku nos ta yunan di Dios, si nos ta biba komo berdadero yunan di Dios, si nos ta trata otronan komo digno yunan di Dios.
Kuantu bia nos ’n ta biba buskando “pa gana shelu”, ora ku en realidat e bida dibino ku tantu nos ke alkansá ya nos tini’e den nos interior? For di ora ku nos a ser batisá, nos tur ta yu di Dios, den kende E ta komplasé! Realmente nos ta biba komo yunan di Dios ku nos ta ? Nos ta laga nos ser “transfigurá” pa e bida dibino ku nos ta hiba paden di nos?
Transfigurá nos ta nifiká esaki : laga karidat vense nos renkor, ku nos fe i speransa vense nos miedu, ku nos generosidat vense nos insensibilidai i sieges pa rekonosé nesesidat di nos próhimo. Talbes kada un konosé mihó, kiko ta nifiká p’e transfigurá, kier men biba e bida di yunan di Dios ku for di boutismo nos a risibí gratuitamente i laga un banda aktitut- i práktikanan ku ta alehá nos di nos berdadero identidat.


E siman aki, trata na “deskubrí” e tesoro ku bo tin paden di bo i ku bo aktitut a skonde asina bon; kòrda ku bida dibino ya ta presente den bo interior; ta djis mester para ketu un ratu pa permití pa ora e brota e transfigurá nos. Sigui traha den birtut ku abo a skohe pa e kuaresma aki, pero aworakí, hasi esfuerso pa risibí un òf vários virtut ku ta mas difísil pa bo akseptá. Kòrda: ta siman di Transfigurashon; por lo tantu, nos tin ku hasi esfuerso pa deskubrí e Yu di Dios ku nos tur tin paden di nos.